លោកនាយករដ្ឋមន្ត្រី ហ៊ុន សែន បានថ្លែងនៅចំពោះមុខតំណាងក្រុមហ៊ុនចំនួន៦របស់ចិន ថារដ្ឋាភិបាលរបស់លោកនឹងមិនលុបចោលកិច្ចសន្យាចាស់ណាមួយនោះទេ លើសពីនេះមានតែជំរុញឲ្យមានការវិនិយោគមកកម្ពុជាឲ្យច្រើនថែមទៀត។
លោកនាយករដ្ឋមន្ត្រី ហ៊ុន សែន បានសរសេរក្នុងទំព័រហ្វេសបុករបស់លោកកាលពីម្សិលមិញថា រាជរដ្ឋាភិបាលថ្មីនីតិកាលទី៦ នឹងបន្តជំរុញលើកទឹកចិត្តនិងផ្តល់នូវការគាំពារខ្ពស់ចំពោះអ្នក វិនិយោគទុនបរទេសទាំងអស់ ក្នុងនោះរាប់ទាំងវិនិយោគទុនចិនដែលមានគម្រោងទៅបណ្តាក់ទុនវិនិយោគក្នុងប្រទេសកម្ពុជា នៅថ្ងៃអនាគតផងដែរ។
ការលើកឡើងរបស់លោកនាយករដ្ឋមន្ត្រីហ៊ុន សែន ស្របពេលដែលលោកទៅបំពេញទស្សនកិច្ចនៅប្រទេសចិន។ ការលើកឡើងរបស់លោកហ៊ុន សែន ពេលនេះក៏ធ្វើឡើងស្របពេលដែលមេដឹកនាំថ្មីរបស់ម៉ាឡេស៊ី បានលុបចោលគម្រោងវិនិយោគធំៗរបស់ក្រុមហ៊ុនចិន។
ចិនជាប្រទេសវិនិយោគធំជាងគេបំផុតនៅកម្ពុជា ដែលគិតពីដើមទសវត្សរ៍ទី៩០ ដល់ឆ្នាំ២០១៨នេះទំហំវិនិយោគរបស់ចិនមានទឹកប្រាក់ជាង១៧ពាន់លានដុល្លារអាមេរិក។
អ្នកវិនិយោគចិនវិនិយោគលើវិស័យមួយចំនួន រួមមាន កម្មន្តសាល សំណង់ វាយនភ័ណ្ឌ និងថាមពលអគ្គិសនី និងប៉ុន្មានឆ្នាំចុងក្រោយនេះចិនវិនិយោគលើវិស័យសំណង់ និងអចលវត្ថុកម្ពុជាឈានមុខគេ៕