ក្រសួងអប់រំបានសម្រេចផ្លាស់ប្ដូរគណៈគ្រប់គ្រងវិទ្យាល័យព្រះស៊ីសុវត្ថិបណ្ដោះអាសន្ន បើទោះបីជាមានការតវ៉ាពីសិស្ស និងគ្រូមួយចំនួនក៏ដោយ។
ក្រុមគ្រូបង្រៀននៅវិទ្យាល័យចំណាស់មួយនេះ បានប្រមូលផ្ដុំតវ៉ាចាប់តាំងពីថ្ងៃម្សិលមិញនេះ ដោយជំទាស់ទៅនឹងការផ្លាស់ប្ដូរនាយកគ្រប់គ្រង លោក មូល ស៊ុយហេង និងការដាក់បញ្ចូលកម្មវិធីអប់រំថ្មីរបស់ក្រសួងនៅក្នុងសាលារៀនមួយនេះ។
ថ្លែងប្រាប់ VOD បន្ទាប់ពីការប្រកាសគណៈគ្រប់គ្រងបណ្ដោះអាសន្ននៃវិទ្យាល័យស៊ីសុវត្ថិនៅព្រឹកថ្ងៃនេះ ប្រធានមន្ទីរអប់រំ យុវជន និងកីឡារាជធានីភ្នំពេញ លោក ហែម ស៊ីណារ៉េត បានឲ្យដឹងថា ការផ្លាស់ប្ដូរនាយកសាលានេះ ត្រូវបានធ្វើឡើងទៅតាមគោលការណ៍របស់ក្រសួង មិនមែនជាវិធានការណ៍រដ្ឋបាល ឬទណ្ឌកម្មអ្វីទៅលើរូបលោកនោះទេ។
ប្រធានមន្ទីរអប់រំ យុវជន និងកីឡារាជធានីភ្នំពេញ លោក ហែម ស៊ីណារ៉េត
អនុប្រធានមន្ទីរអប់រំរាជធានីភ្នំពេញ លោក អ៊ុក សម្បត្តិ ដែលត្រូវបានចាត់តាំងឲ្យគ្រប់គ្រងលើវិទ្យាល័យស៊ីសុវត្ថិបណ្ដោះនោះ បានឲ្យដឹងថា គណៈគ្រប់គ្រងបណ្ដោះអាសន្ន ៩រូប ត្រូវបានចាត់តាំងឲ្យដឹកនាំអង្គភាពនេះ ដើម្បីឲ្យគ្រូបង្រៀននៅសាលាមួយនេះវាយតម្លៃ មុននឹងក្រសួងសម្រេចតែងតាំងនាយកគ្រប់គ្រងផ្លូវការ។
លោក អ៊ុក សម្បត្តិ បានប្រាប់ VOD ថា លោក និងសមាជិកផ្សេងទៀត គឺមកគ្រប់គ្រងសាលានេះ ដើម្បីរក្សានិរន្តភាពរបស់សាលាតែប៉ុណ្ណោះ ហើយក៏មិនមានការបែងចែកសាលារៀនជំនាន់ថ្មី និងចាស់នោះទេ។
អនុប្រធានមន្ទីរអប់រំរាជធានីភ្នំពេញ លោក អ៊ុក សម្បត្តិ
ស្របពេលដែលក្រសួងបានផ្លាស់ប្ដូរគណៈគ្រប់គ្រងបណ្ដោះអាសន្ននោះ នៅខាងមុខវិទ្យាល័យ លោកគ្រូ អ្នកគ្រូ និងសិស្សានុសិស្សជាច្រើននាក់ដែលគាំទ្រនាយកសាលាចាស់ បានឈរលើកបដារតវ៉ា ដែលមានខ្លឹមសារថា មិនទទួលស្គាល់សមាសភាពថ្មីរបស់សាលា។ ក្រុមគ្រូបង្រៀនទាំងនោះ បានហៅការផ្លាស់ប្តូរនាយកសាលានេះថា ធ្វើឡើងដោយគ្មានការជូនដំណឹងត្រឹមត្រូវ។
សិស្សថ្នាក់ទី១១ នៃវិទ្យាល័យស៊ីសុវត្ថិ កញ្ញា ស៊ិន ចាន់ឬទ្ធីយ៉ា បាននិយាយថា សិស្សានុសិស្សដែលតវ៉ានៅថ្ងៃនេះ មិនទទួលស្គាល់សមាសភាពថ្មីនោះទេ ហើយក៏មិនរំពឹងដែរថា សមាសភាពគ្រប់គ្រងសាលាថ្មីអាចដឹកនាំល្អដូចនាយកសាលាចាស់នោះ ខណៈដែលកញ្ញាបារម្ភពីវាសនាសាលានេះ អាចនឹងផ្លាស់ប្ដូរទៅជាសាលារៀនជំនាន់ថ្មី។
សិស្សថ្នាក់ទី១១ នៃវិទ្យាល័យស៊ីសុវត្ថិ កញ្ញា ស៊ិន ចាន់ឬទ្ធីយ៉ា
តំណាងគ្រូបង្រៀនដែលតវ៉ានៅថ្ងៃនេះ អ្នកគ្រូ ប៊ូ គន់នី មានប្រសាសន៍ថា ក្រុមគ្រូបង្រៀនទាមទារឲ្យរក្សានាយកគ្រប់គ្រង លោក មូល ស៊ុយហេង នៅដដែល និងស្នើឲ្យដកសាលារៀនជំនាន់ថ្មីចេញពីសាលា ដោយថា សាលារៀនជំនាន់ថ្មីនេះ គឺដូចជាសាលាមួយនៅក្នុងសាលា ហើយហាក់បានខណ្ឌដាច់ពីគ្នារវាងសាលាចាស់ និងសាលាថ្មី។
តំណាងគ្រូបង្រៀនដែលតវ៉ានៅថ្ងៃនេះ អ្នកគ្រូ ប៊ូ គន់នី
ប្រធានមន្ទីរអប់រំរាជធានីលោក ហែម ស៊ីណារ៉េត បានអះអាងថា មិនមានការផ្លាស់ប្ដូរទម្រង់នៃវិទ្យាល័យព្រះស៊ីសុវត្ថិនោះទេ ដោយស្នើឲ្យលោកគ្រូ អ្នកគ្រូទាំងអស់ដាក់លិខិតស្នើសុំការបញ្ជាក់ទៅកាន់ក្រសួងវិញ ជាជាងតវ៉ាបែបនេះ។
ប្រធានមន្ទីរអប់រំរាជធានីលោក ហែម ស៊ីណារ៉េត
បើតាមលោក ហែម ស៊ីណារ៉េត នាយកសាលាវិទ្យាល័យស៊ីសុវត្ថិចាស់លោក មូល ស៊ុយហេង ត្រូវបានផ្លាស់ប្តូរទៅកាន់នាយកដ្ឋានមធ្យមសិក្សានៃក្រសួងអប់រំ បន្ទាប់ពីលោកគ្រប់គ្រងវិទ្យាល័យស៊ីសុវត្ថិនេះរយៈពេល ១០ឆ្នាំហើយតាំងពីឆ្នាំ២០០៨មក។
សាលារៀនជំនាន់ថ្មីត្រូវបានដាក់ឲ្យអនុវត្តន៍ក្នុងចំណែកមួយផ្នែកនៃវិទ្យាល័យព្រះស៊ីសុវត្ថិ កាលពីខែមិថុនាឆ្នាំ២០១៦ ដោយយកផ្នែកមួយនៃវិទ្យាល័យនេះជាគំរូនៃការបង្រៀន៕