បោះឆ្នោត

គ.ជ.ប គ្រោងចុះឈ្មោះពលរដ្ឋជិតកន្លះលាននាក់ក្នុងបញ្ជីបោះឆ្នោតឆ្នាំនេះ

លោក ឌិត សុខធី
| ១៩ កញ្ញា ២០១៨
ម៉ោង ០៩:៥០

ការបោះឆ្នោតជ្រើសតាំងតំណាងរាស្ត្រនីតិកាលទី ៦ ថ្ងៃទី២៩ ខែកក្កដា ឆ្នាំ២០១៨ មណ្ឌលក្រុងតាខ្មៅ ខេត្តកណ្ដាល។ (ជន ចាន់រ៉ែន)

គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. បានប្រកាសថា ខ្លួនគ្រោងនឹងចុះឈ្មោះពលរដ្ឋជិតកន្លះលាននាក់នៅក្នុងបញ្ជីបោះឆ្នោតនៅឆ្នាំនេះ។ នេះបើតាមសេចក្ដីប្រកាសព័ត៌មានមួយកាលពីថ្ងៃម្សិលមិញនេះ។

គ.ជ.ប. បានរៀបរាប់បន្ថែមថា ខ្លួននឹងចុះឈ្មោះពលរដ្ឋ ៤៨៩ ៩៦៣នាក់ ចូលក្នុងបញ្ជីបោះឆ្នោតប្រចាំឆ្នាំ២០១៨នេះ ប៉ុន្តែ គ.ជ.ប.ថា ក៏គ្រោងលុបឈ្មោះពលរដ្ឋចេញពីបញ្ជីបោះឆ្នោតជិត ១០ម៉ឺននាក់ផងដែរ។

បើតាមសេចក្ដីប្រកាសព័ត៌មាននោះ ពលរដ្ឋដែលនឹងត្រូវលុបឈ្មោះចេញពីបញ្ជីបោះឆ្នោតនោះ គ.ជ.ប. ថា ពលរដ្ឋទាំងនោះទទួលមរណភាព ត្រូវបានដកហូតសិទ្ធិបោះឆ្នោតបណ្ដោះអាសន្ន និងបានផ្លាស់ប្ដូរទីលំនៅរបស់ពួកគេ។

តួលេខរបស់ គ.ជ.ប. បង្ហាញថា ពលរដ្ឋកម្ពុជាជាង ៨លាន ៣៨ម៉ឺននាក់ ត្រូវបានចុះឈ្មោះក្នុងបញ្ជីបោះឆ្នោតកាលពីឆ្នាំ២០១៧កន្លងមក៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។