រដ្ឋាភិបាលបានបញ្ជាទៅស្ថាប័នរដ្ឋនៅតាមខេត្ត និងរាជធានី ឲ្យត្រួតពិនិត្យមើលរោងចក្រសហគ្រាស និងគ្រឹះស្ថាននានា ដើម្បីរៀបចំទីកន្លែងសម្រាប់កម្មករនិយោជិតបរិភោគអាហារថ្ងៃត្រង់ ។
ក្នុងលិខិតកាលពីថ្ងៃម្សិលមិញនេះ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា បានណែនាំទៅប្រធានមន្ទីរនៅតាមរាជធានី និងខេត្តទាំងអស់ ឲ្យចុះត្រួតពិនិត្យមើលរោងចក្រសហគ្រាស និងគ្រឹះស្ថាននានា ដើម្បីរៀបចំឲ្យមានកន្លែងសម្រាប់កម្មករនិយោជិតសម្រាក និងទទួលទានអាហារថ្ងៃត្រង់។
ក្នុងលិខិតដដែល លោក ជា សុផារ៉ា បានណែនាំទៅម្ចាស់គម្រោងសាងសង់រោងចក្រសហគ្រាសនានា ឲ្យរៀបចំប្លង់អាហារដ្ឋាន សម្រាប់កម្មករសម្រាក និងពិសារអាហារថ្ងៃត្រង់។
លោក ជា សុផារ៉ា បានលើកឡើងក្នុងលិខិតនោះថា វិធានការនេះ គឺដើម្បីជួយសម្រួលដល់ការបំពេញការងាររបស់កម្មករនិយោជិតនៅតាមរោងចក្រ សហគ្រាស និងគ្រឹះស្ថាននានា។
លោក ជា សុផារ៉ា បានបញ្ជាទៅប្រធានមន្ទីរនានាបែបនេះ តែប៉ុន្មានម៉ោងប៉ុណ្ណោះក្រោយពីលោកនាយករដ្ឋមន្ត្រី ហ៊ុន សែន បានថ្លែងទៅកាន់ក្រុមកម្មករ-កម្មការិនីរោងចក្រកាត់ដេរនៅឯខេត្តកំពង់ស្ពឺ កាលពីព្រឹកថ្ងៃម្សិលមិញនេះ៕
