អ្នកកាសែតអូស្ត្រាលីដែលទើបតែត្រូវបានលើកលែងទោសឲ្យមានសេរីភាពឡើងវិញកាលពីសប្ដាហ៍មុននោះ បានអះអាងថា នឹងវិលត្រឡប់មកប្រទេសកម្ពុជា បន្ទាប់ពីលោកបានវិលត្រឡប់ទៅដល់ប្រទេសកំណើតរបស់លោកនោះ។
សារព័ត៌មានអូស្ត្រាលី ABC បានចុះផ្សាយថា លោក James Ricketson បានធ្វើដំណើរការចាកចេញពីប្រទេសកម្ពុជា និងបានទៅដល់អូស្ត្រាលីកាលពីម៉ោង ៨ល្ងាច(ម៉ោងនៅអូស្ត្រាលី)ម្សិលមិញនេះ។
លោក James Ricketson ត្រូវបានទូរទស្សន៍ ABC ដកស្រង់សម្ដីដែលបានថ្លែងថា លោកនឹងវិលត្រឡប់មកប្រទេសកម្ពុជាវិញក្នុងពេលឆាប់ៗតាមតែអាចធ្វើទៅបាន ប៉ុន្តែ លោកថា លោកត្រូវការស្ដារស្ថានភាពសុខភាពរបស់លោកសិន។
ប៉ុន្តែ ប្រធានផ្នែកស៊ើបអង្កេត និងអនុវត្តន៍នីតិវិធី នៃការិយាល័យអន្តោប្រវេសន៍កម្ពុជា លោក អ៊ុក ហៃសិលា ត្រូវបាន ABC ដកស្រង់សម្ដីដែលបាននិយាយថា ប្រសិនបើអ្នកកាសែតអូស្ត្រាលីរូបនេះ ចង់វិលត្រឡប់មកកម្ពុជា ទាល់តែមានការយល់ព្រមពីរដ្ឋមន្ត្រីមហាផ្ទៃ លោក ស ខេង។
បើតាម ABC ការហាមឃាត់លោក James Ricketson មិនឲ្យចូលមកប្រទេសកម្ពុជាជាថ្មី នឹងប៉ះពាល់ទៅដល់រូបលោក ដែលបានកសាងទំនាក់ទំនងជាមួយពលរដ្ឋដ៏ក្រីក្ររបស់ប្រទេសនេះ ជាពិសេសកូនចិញ្ចឹមរបស់លោកឈ្មោះ «ចន្ទី»។
អ្នកសារព័ត៌មានអូស្ត្រាលីរូបនេះ ត្រូវបានអាជ្ញាធរកម្ពុជាចាប់ខ្លួនកាលពីខែមិថុនាឆ្នាំ ហើយត្រូវបានកាត់ទោសឲ្យជាប់ពន្ធនាគារ ៦ឆ្នាំ នៅក្រោមអ្វីដែលអាជ្ញាធរកម្ពុជាចោទថា «ប្រមូលព័ត៌មានដែលអាចធ្វើឲ្យអន្តរាយដល់កិច្ចការពារសន្តិសុខជាតិ»។
លោក James Ricketson ត្រូវបានប្រមុខរដ្ឋស្ដីទី លោក សាយ ឈុំ លើកលែងទោសទៅតាមសំណើរបស់លោកនាយករដ្ឋមន្ត្រី ហ៊ុន សែន កាលពីថ្ងៃទី២១ ខែកញ្ញា ក្រោយពីជាប់ឃុំអស់រយៈពេល ១៦ខែ៕
