លោកនាយករដ្ឋមន្ត្រី ហ៊ុន សែន នៅថ្ងៃនេះ បានរំឭកឡើងវិញអំពីការប៉ុនប៉ងធ្វើឃាតរូបលោកកាលពី ២០ឆ្នាំមុន អំឡុងពេលលោកធ្វើដំណើរទៅប្រជុំសភានីតិកាលទី២ នៅឯខេត្តសៀមរាប ប៉ុន្តែ លោកថា បានអធ្យាស្រ័យរួចទៅហើយចំពោះបុគ្គលដែលប៉ុនប៉ងសម្លាប់រូបលោក។
លោក ហ៊ុន សែន បានរំឭកឡើងវិញអំពីព្រឹត្តិការណ៍ប៉ុនប៉ងសម្លាប់រូបលោកបែបនេះ នៅលើទំព័រហ្វេសប៊ុកផ្លូវការរបស់លោកនៅព្រឹកថ្ងៃនេះ។
នាយករដ្ឋមន្ត្រីកម្ពុជារូបនេះ បានរៀបរាប់ថា គ្រាប់រ៉ុកកែតបេ ៤០ មួយគ្រាប់ នៅក្នុងចំណោម ៤គ្រាប់ ត្រូវបានបាញ់សំដៅលើរថយន្តរបស់លោក នៅឯខេត្តសៀមរាប ប៉ុន្តែ លោកថា គ្រាប់រ៉ុកកែតនោះបានហោះទៅបុកផ្ទះប្រជាជន ដែលបណ្ដាលឲ្យប្រជាជនម្នាក់ស្លាប់ និងម្នាក់ទៀតរងរបួសធ្ងន់ កាលពីថ្ងៃទី២៤ ខែកញ្ញា ឆ្នាំ១៩៩៨។
មេដឹកនាំបក្សកាន់អំណាចរូបនេះ បានរំឭកទៀតថា ការប៉ុនប៉ងធ្វើឃាតរូបលោកដែលមិនបានសម្រេចនេះ បានកើតឡើងអំឡុងពេលនៃការបើកប្រជុំសភាលើកដំបូងនៅក្នុងព្រះរាជដំណាក់នៅខេត្តសៀមរាប ក្រោយការបោះឆ្នោតជ្រើសតាំងតំណាងរាស្ត្រនីតិកាលទី២ កាលពីចុងខែកក្កដាឆ្នាំ១៩៩៨។
លោក ហ៊ុន សែន បានបញ្ជាក់នៅលើទំព័រហ្វេសប៊ុករបស់លោកទៀតថា លោកបានអហោសិកម្មចំពោះបុគ្គលដែលប៉ុនប៉ងធ្វើឃាតរូបលោកទៅហើយ បើទោះបីជាលោកអះអាងថា អាចមានពន្លឺស្រាវជ្រាវរកអ្នកនៅពីក្រោយគម្រោងធ្វើឃាតរូបលោកក៏ដោយ។
លោកនាយករដ្ឋមន្ត្រី ហ៊ុន សែន
ជាងនេះទៅទៀត លោក ហ៊ុន សែន ចោទសួរថា ប្រសិនបើលោកស្លាប់នាពេលនោះ តើនឹងមានរឿងអ្វីកើតឡើង ហើយតើសង្គ្រាមស៊ីវិលនៅកម្ពុជា អាចនឹងត្រូវបានបញ្ចប់បានឬយ៉ាងណា។
លោក ហ៊ុន សែន និងគណបក្សប្រជាជនកម្ពុជារបស់លោក បានឈ្នះការបោះឆ្នោតដ៏ចម្រូងចម្រាស់នៅក្នុងការបោះឆ្នោតជ្រើសរើសតំណាងរាស្ត្រកាលពីចុងខែកក្កដាឆ្នាំ១៩៩៨។
គណបក្សហ៊្វុនស៊ិនប៉ិចដឹកនាំដោយសម្ដេចក្រុមព្រះ នរោត្ដម រណឫទ្ធិ និងគណបក្ស សម រង្ស៊ី ដែលដឹកនាំដោយលោក សម រង្ស៊ី បានជំទាស់ទៅនឹងលទ្ធផលនៃការបោះឆ្នោតនាពេលនោះ ដោយចោទបក្សកាន់អំណាចថា បានលួចបន្លំលទ្ធផលនៃការបោះឆ្នោត។
លោក សម រង្ស៊ី បានរំឭកនៅលើទំព័រហ្វេសប៊ុករបស់លោកកាលពីថ្ងៃម្សិលមិញថា អាជ្ញាធរទីក្រុងភ្នំពេញបានបង្ក្រាបដោយហិង្សាទៅលើក្រុមពលរដ្ឋ ដែលបានតវ៉ាជំទាស់នឹងលទ្ធផលនៃការបោះឆ្នោតកាលពីថ្ងៃទី២៦ ខែកក្កដា ឆ្នាំ១៩៩៨។
បើតាមអតីតមេដឹកនាំបក្សប្រឆាំងរូបនេះ វិបត្តិនយោបាយកម្ពុជាកាលពី ២០ឆ្នាំមុន បានឈានដល់ទីបញ្ចប់ បន្ទាប់ពីមានជំនួបរវាងក្រុមមេដឹកនាំគណបក្សប្រជាជនកម្ពុជា គណបក្សរាជានិយមហ៊្វុនស៊ិនប៉ិច និងគណបក្ស សម រង្ស៊ី។
លទ្ធផលនៃការបោះឆ្នោតកាលពីឆ្នាំ១៩៩៨ ត្រូវបានប្រកាសថា គណបក្សកាន់អំណាចរបស់លោក ហ៊ុន សែន ឈ្នះបានអាសនៈ ៦៤ គណបក្សហ៊្វុនស៊ិនប៉ិច ឈ្នះបានអាសនៈ ៤៣ ហើយគណបក្ស សម រង្ស៊ី ទទួលបានអាសនៈសភាចំនួន ១៥៕
