ស្ថានទូតអាមេរិកប្រចាំកម្ពុជាបានជំរុញទៅកាន់ក្រុមហ៊ុនអាមេរិកជិត២០ក្រុមហ៊ុនឲ្យស្វែងយល់ពីវិស័យកសិកម្ម ដោយសង្ឃឹមថាអាចនឹងឈានដល់ការធ្វើពាណិជ្ជកម្មជាមួយគ្នាផងដែរ។
នៅព្រឹកថ្ងៃទី២៦ កញ្ញា នេះស្ថានទូតអាមេរិក និងសភាពាណិជ្ជកម្មអាមេរិកប្រចាំកម្ពុជាបានរៀបចំវេទិកាពាណិជ្ជកម្មមួយដោយផ្តោតលើវិស័យកសិកម្មកម្ពុជា ដើម្បីជួយឲ្យក្រុមហ៊ុនអាមេរិកមានការយល់ដឹងស៊ីជម្រៅទៅលើវិស័យនេះ ហើយស្វែងរកមើលអនាគតដៃគូវិនិយោគ និងពាណិជ្ជកម្មដ៏មានសក្ដានុពលមួយ។
ក្រុមហ៊ុនអាមេរិកចំនួន១៦ បានចូលរួមក្នុងកម្មវិធីនេះរួមមាន 3M, Absolute Packaging and Automation, Cargill, Humate USA, Hydro-Thermal Corporation, Intervet, John Deere, និងក្រុមហ៊ុន Syngenta ជាដើម ។
ថ្លែងប្រាប់ក្រុមអ្នកសារព័ត៌មានបន្ទាប់ពីបើកវេទិកានៅព្រឹកនេះ ឯកអគ្គរដ្ឋទូតអាមេរិកប្រចាំកម្ពុជាលោក William Heidt ថានៅប៉ុន្មានឆ្នាំចុងក្រោយនេះវិស័យកសិកម្មកម្ពុជាហាក់មានកំណើនយឺត លើសពីនេះទៀតគឺត្រូវប្រឈមនឹងការប្រកួតប្រជែងជាមួយប្រទេសនៅក្នុងតំបន់ទៀតផងដែលចាំបាច់ត្រូវការបច្ចេកទេសកសិកម្មទំនើប និងទីផ្សារធំដើម្បីឲ្យកសិកម្មកម្ពុជាអាចឈានទៅប្រកួតប្រជែងបាន ហើយអាមេរិកគឺជាអ្នកវិនិយោគមួយដែលមានអ្វីទាំងនេះ។
ឯកអគ្គរដ្ឋទូតអាមេរិកប្រចាំកម្ពុជាលោក William Heidt
តំណាងក្រុមហ៊ុនទាំង១៦ និងជាអនុប្រធានប្រចាំតំបន់អាស៊ីប៉ាស៊ីហ្វិកនៃក្រុមហ៊ុនផលិត និងចែកចាយកសិកម្មរបស់អាមេរិក Cargill លោក Bruce W. Blakeman មានប្រសាសន៍ប្រាប់ក្រុមអ្នកសារព័ត៌មានថា ពេលនេះក្រុមហ៊ុនលោកកំពុងពិនិត្យមើលពីផលិតផលកសិកម្មមួយចំនួនរបស់កម្ពុជា ដែលអន្តរជាតិកំពុងត្រូវការ ដែលអាចឲ្យក្រុមហ៊ុនលោកជួយដល់កសិករខ្មែរក្នុងការបង្កើនបច្ចេកទេស ដើម្បីដល់កម្រិតគុណភាពអន្តរជាតិដែលអាចទទួលយកបាន។
តំណាងក្រុមហ៊ុនទាំង១៦ និងជាអនុប្រធានប្រចាំតំបន់អាស៊ីប៉ាស៊ីហ្វិកនៃក្រុមហ៊ុនផលិត និងចែកចាយកសិកម្មរបស់អាមេរិក Cargill លោក Bruce W. Blakeman
រដ្ឋលេខាធិការក្រសួងពាណិជ្ជកម្មលោកស្រី ចម និម្មល បានថ្លែងក្នុងវេទិកានោះ ដោយគាំទ្រចំពោះការរៀបចំវេទិកានេះ ដោយថាការវិនិយោគរបស់ក្រុមហ៊ុនអាមេរិកមិនត្រឹមតែជួយរក្សាចំណូលរបស់កសិករកម្ពុជានោះទេ គឺបានធ្វើឲ្យចំណូលរបស់ពួកគេកើនឡើងផងដែរ ខណៈលោកស្រីអះអាងថារដ្ឋាភិបាលកម្ពុជាមានគោលនយោបាយអនុគ្រោះច្រើនដល់អ្នកវិនិយោគ។
អនុប្រធានសហព័ន្ធស្រូវអង្ករកម្ពុជាលោក ហ៊ុន ឡាក់ គាំទ្រចំពោះការរៀបចំវេទិកានេះដោយថា ប្រសិនជាផលិតផលកសិកម្មកម្ពុជាអាចចូលទៅកាន់ទីផ្សារសហរដ្ឋអាមេរិកកាន់តែច្រើននោះវានឹងអាចផ្ដល់ប្រយោជន៍ច្រើនដល់កម្ពុជា។
អនុប្រធានសហព័ន្ធស្រូវអង្ករកម្ពុជាលោក ហ៊ុន ឡាក់
បើតាមសេចក្ដីប្រកាសព័ត៌មានរបស់ស្ថានទូតអាមេរិក សមាជិកប្រតិភូពាណិជ្ជកម្មអាមេរិក នឹងសិក្សាអំពីវិស័យផ្សេងៗទាក់ទងនឹងកសិកម្មកម្ពុជា ដូចជាស្រូវអង្ករ ចំណីសត្វ បសុសត្វ និងវារីវប្បកម្ម ជាមួយនឹងក្រុមអ្នកជំនួញក្នុងស្រុក និងចុះទៅកាន់ទីតាំងផលិតកម្មដោយផ្ទាល់ផងដែរ ចាប់ពីថ្ងៃទី២៦ ដល់ថ្ងៃទី២៧ កញ្ញានេះ។
យោងតាមក្រសួងពាណិជ្ជកម្ម ក្នុងឆ្នាំ២០១៧ វិស័យកសិកម្ម បានរួមចំណែកនៅក្នុងផលិតផលក្នុងស្រុកសរុប (GDP) ២៤,៩% ខណៈឧស្សាហកម្មមាន ៣២,៩% និងសេវាកម្មមាន ៤២,២%។ វិស័យកសិកម្ម គឺជាសសរស្ដម្ភដ៏សំខាន់មួយនៃសេដ្ឋកិច្ចកម្ពុជា ដោយសារតែជាង ៨០% នៃប្រជាជនកម្ពុជារស់នៅតំបន់ជនបទ គឺជាកសិករ៕
