រដ្ឋាភិបាលកម្ពុជាបានសម្រេចបង្កើតគណៈកម្មាធិការជាតិរៀបចំវចនានុក្រមភាសាខ្មែរ ដែលមានសមាសភាពចំនួន៣០នាក់។
តាមសេចក្តីសម្រេចរបស់រាជរដ្ឋាភិបាលកម្ពុជា ដែលធ្វើនៅថ្ងៃទី២១ ខែសីហា បានឲ្យដឹង សមាសភាពនៃគណៈកម្មាធិការជាតិរៀបចំវចនានុក្រមភាសាខ្មែរទាំង៣០នាក់នៃក្រុមប្រឹក្សាជាតិភាសាខ្មែរ នៃរាជបណ្ឌិត្យសភាកម្ពុជា ត្រូវមានភារកិច្ចរៀបចំធ្វើវចនានុក្រមភាសាខ្មែរ ដោយឈរលើស្មារតីអភិរក្ស និងអភិវឌ្ឍភាសានិងអក្សរខ្មែរ និងយកវចនានុក្រមខ្មែររៀបចំដោយសម្តេចព្រះសង្ឃរាជ ជួន ណាត ដែលបានបោះពុម្ពផ្សាយដោយវិទ្យាស្ថានពុទ្ធសាសនបណ្ឌិត្យ គ្រាទី៥ ឆ្នាំ១៩៦៧ ជាគោល។
អនុប្រធានវិទ្យាស្ថានភាសាជាតិ លោក វង្ស មេង បានឲ្យដឹងថា វចនានុក្រមភាសាខ្មែរនេះបានចាប់ផ្តើមរៀបចំតាំងពីខែឧសភា ឆ្នាំ២០១៨ មក ហើយបច្ចុប្បន្ននេះ គឺកំពុងតែរៀបចំដំណើរការនៅឡើយ។ នៅក្នុងវចនានុក្រមនោះផងដែរ គឺមានពាក្យថ្មីៗ ចន្លោះពី ២៥០០០ ទៅ៣០០០០ពាក្យ។
វចនានុក្រមខ្មែរដំបូងបំផុតដែលបានរៀបរៀងដោយសម្តេចព្រះសង្ឃរាជ ជួន ណាត បានបោះពុម្ពផ្សាយលើកទីមួយនៅឆ្នាំ១៩៣៨៕
