អង្គជំនុំជម្រះវិសាមញ្ញជុំវិញតុលាការកម្ពុជា(អ.វ.ត.ក ) ឬតុលាការខ្មែរក្រហមបានសម្រេចប្រកាសសាលក្រមលើមេដឹកនាំខ្មែរក្រហមក្នុងសំណុំរឿង០០២លើកទី២នៅដើមខែវិច្ឆិកាខាងមុខ បន្ទាប់ពីបញ្ចប់សេចក្ដីសន្និដ្ឋានកាលពីដើមឆ្នាំ២០១៧។
ក្នុងសេចក្ដីប្រកាសព័ត៌មានចុះថ្ងៃទី ២៦ កញ្ញា ម្សិលមិញ តុលាការខ្មែរក្រហមបានឲ្យដឹងថាខ្លួន នឹងប្រកាសសាលក្រមក្នុងសំណុំរឿង០០២វគ្គ២ ពាក់ព័ន្ធនឹងជនជាប់ចោទ នួន ជា ដែលជាអនុលេខាបក្សកុម្មុយនីស្តកម្ពុជា និង ខៀវ សំផន ជាប្រមុខរដ្ឋនៃរបបកម្ពុជាប្រជាធិបតេយ្យ នៅថ្ងៃសុក្រ ទី១៦ វិច្ឆិកា ឆ្នាំ២០១៨ ចាប់ពីម៉ោង ៩និង៣០នាទីព្រឹកតទៅ។
បើតាម អ.វ.ត.ក បទចោទនៅក្នុងសំណុំរឿង ០០២វគ្គ០២ ផ្តោតទៅលើឧក្រិដ្ឋកម្មប្រឆាំងនឹងមនុស្សជាតិ អំពើប្រល័យពូជសាសន៍ និងការបំពារបំពានយ៉ាងធ្ងន់ធ្ងរទៅលើអនុសញ្ញាទីក្រុងហ្សឺណែវ ពាក់ព័ន្ធទៅនឹងទីតាំងឧក្រិដ្ឋកម្ម ក្នុងការដ្ឋានការងារ និងសហករណ៍ មន្ទីរសន្តិសុខ និងទីតាំងសម្លាប់មនុស្ស ការប្រល័យពូជសាសន៍ទៅលើប្រជាជនចាម និងវៀតណាម ការប្រព្រឹត្តិចំពោះពុទ្ធសាសនិកជន និងអតីតមន្រ្តីរដ្ឋការនៃរបបសាធារណរដ្ឋខ្មែរ និងការរៀបអាពាហ៍ពិពាហ៍នៅទូទាំងប្រទេស៕