អាមេរិក នឹងបន្តដាក់កំហិតផ្នែកហិរញ្ញវត្ថុដល់អ្នកដែលនៅជុំវិញខ្លួនរបស់ប្រធានាធិបតីវេណេហ៊្សុអេឡាដែលរួមចំណែកធ្វើឲ្យប្រទេសនេះធ្លាក់ចូលក្នុងវិបត្តិដូចសព្វថ្ងៃ។
តាមសេចក្តីប្រកាសព័ត៌មានរបស់ក្រសួងរតនាគារអាមេរិក ដែលចេញកាលពីថ្ងៃទី២៥ ខែកញ្ញា បានឲ្យដឹង សហរដ្ឋអាមេរិកកំពុងចាប់ផ្តើមដាក់ទណ្ឌកម្មបន្តទៅទៀតទៅលើមនុស្សជុំវិញខ្លួនលោក នីកូឡាស ម៉ាឌូរ៉ូ ចំនួន៤នាក់ដូចជា លោកស្រី ហ្វ្រលរេ ភរិយារបស់លោក នីកូឡាស ម៉ាឌូរ៉ូ លោកស្រី ឌែលស៊ី រ៉ទ្រីហ្គើស អនុប្រធានាធិបតី លោក ច រ៉ទ្រីហ្គើស រដ្ឋមន្រ្តីក្រសួងថាមពលអគ្គិសនី និងលោក ប៉ាទ្រីណូ រដ្ឋមន្រ្តីក្រសួងការពារជាតិប្រទេសវេណេហ៊្សុអេឡា។
សេចក្តីប្រកាសព័ត៌មានដដែល បានឲ្យដឹងថាទ្រព្យសម្បត្តិឬផលប្រយោជន៍ផ្នែកហិរញ្ញវត្ថុនានារបស់អ្នកទាំងនោះដែលនៅសហរដ្ឋអាមេរិកត្រូវបង្កក។ តាមប្រភពដដែល អាមេរិកក៏ហាមជនជាតិរបស់ខ្លួនមិនឲ្យធ្វើជំនួួញណាមួយជាមួយអ្នកទាំងបួននាក់នោះផងដែរ។
តាមប្រភពខាងលើ ការដាក់ទណ្ឌកម្មប្រឆាំងនឹងអ្នកទាំងបួននាក់នោះមិនបានធ្វើឡើងជាអចិន្រ្តៃយ៍នោះទេ។ ការដាក់ទណ្ឌកម្មនេះគ្រាន់ចង់ឲ្យក្រុមមនុស្សទាំងនោះផ្លាស់ប្តូឥរិយាបថរបស់ខ្លួនតែប៉ុណ្ណោះ ពោលគឺចង់ឲ្យពួកគេជួយស្ដារប្រជាធិបតេយ្យនៅវេណេហ្សេអ៊ុឡាឡើងវិញតែប៉ុណ្ណោះ ហើយបញ្ឈប់ការចូលរួមរួមការរំលោភសិទ្ធិមនុស្ស ហ៊ាននិយាយរិះគន់អ្នកដែលរំលោភសិទ្ធិមនុស្ស និងហ៊ានចេញមុខប្រឆាំងនឹងអំពើពុករលួយ។
តាមការចុះផ្សាយរបស់សារព័ត៌មានរបស់អង់គ្លេស Reuters កាលពីម្សិលមិញ បណ្តាប្រទេសនៅអាមេរិកឡាទីន និងប្រទេសកាណាដា បានស្នើឲ្យតុលាការព្រហ្មទណ្ឌអន្តរជាតិឲ្យសើុបអង្កេតរដ្ឋាភិបាលវេណេហ៊្សុអេឡាលើការចោទប្រកាន់ពីបទឧក្រិដ្ឋកម្មប្រឆាំងនឹងមនុស្សជាតិ ក្នុងការប្រើប្រាស់កម្លាំងដើម្បីបង្ក្រាបក្រុមអ្នកនយោបាយដទៃ។
តាមការចុះផ្សាយរបស់ Reutuers ដដែល បានឲ្យដឹង ប្រធានាធិបតីរបស់ប្រទេសប៉េរូ អាហ្សង់ទីន ឈីលី កូឡុំបីុ និងប៉ារ៉ាហ្គាយ និងលោក ចាស្ទីន ទ្រូឌូរ នាយករដ្ឋមន្ត្រីនៃប្រទេសកាណាដា កាលពីថ្ងៃអង្គារ បានចុះហត្ថលេខាលើលិខិតមួយផ្ញើទៅតុលាការព្រហ្មទណ្ឌអន្តរជាតិឲ្យសើុបអង្កេតលើរដ្ឋាភិបាលវេណេហ៊្សុអេឡា។ ក្រុមអ្នកជំនាញបានរកឃើញថា រដ្ឋាភិបាលរបស់វេណេហ៊្សុអេឡាត្រូវទទួលខុសត្រូវចំពោះឧក្រិដ្ឋកម្មរាប់ចាប់ពីការធ្វើទារុណកម្ម ឃាតកម្ម និងការរំលោភឲ្យបាត់ខ្លួនដោយបង្ខំ និងការរំលោភបំពាននៃដំណើរការផ្សេងៗទៀត។
ក្រុមសិទិ្ធមនុស្សបានរកឃើញថាក្នុងការបង្ក្រាបចំនួនពីរនៅឆ្នាំ ២០១៤ និង ២០១៧ កងកម្លាំងសន្តិសុខវេណេហ៊្សុអេឡាបានប្រព្រឹត្តការរំលោភបំពានជាប្រព័ន្ធប្រឆាំងនឹងការរិះគន់ រួមទាំងការធ្វើទារុណកម្មនិងឃុំខ្លួនមនុស្សជាង ៥៤០០ នាក់ នៅចន្លោះខែមេសានិងខែកក្កដាឆ្នាំ 2017 ។
តាមការចុះផ្សាយរបស់សារព័ត៌មានCNBC កាលពីខែឧសភាកន្លងទៅ បានឲ្យដឹង បក្សប្រឆាំងនិងសហគមអន្តរជាតិ មិនទទួលស្គាល់លទ្ធផល នៃការបោះឆ្នោតនេះទេ ដោយសារតែបក្សកាន់អំណាចបានទិញទឹកចិត្តអ្នកបោះឆ្នោតដែលជាប្រជាជនក្រីក្រ តាមរយៈការផ្ដល់ជាចំណីនិងវេប្រាក់ឲ្យពួកគេ។ ម្យ៉ាងវិញទៀតគណបក្សសហភាពសង្គមនិយមវេណេហ្ស៊ុអេឡារបស់ប្រធានាធិបតី នីកូឡាស ម៉ាឌូរ៉ូ បានប្រើដោយសេរីនូវធនធានរដ្ឋនៅអំឡុងពេលឃោសនាបោះឆ្នោត។ ជ័យជំនះរបស់លោក នីកូឡាស ម៉ាឌូរ៉ូ កើតឡើងផងដែរដោយសារតែបក្សប្រឆាំងធំៗទាំងបី រួមមានគណបក្ស Justice First គណបក្ស Popular Will និងគណបក្ស Democratic Action បានធ្វើពលិការ មិនចូលរួមការបោះឆ្នោត ដោយសារតែពួកគេយល់ថាគណៈកម្មការជាតិរៀបចំការបោះឆ្នោតលំអៀងទៅខាង គណបក្សសហភាពសង្គមនិយមវេណេហ្ស៊ុអេឡារបសប្រធានាធិបតី នីកូឡាស ម៉ាឌូរ៉ូ ៕
