ស្ត្រីពពោះជំនួសមួយចំនួនសម្រាលបានកូនភ្លោះ ខណៈពេលជាប់ឃុំបណ្តោះអាសន្នដើម្បីរងចាំការកាត់ទោសពីតុលាការក្រុងភ្នំពេញ ប៉ុន្តែមិនទាន់ដឹងថានណាជាអ្នកទទួលខុសត្រូវចិញ្ចឹមទារកទាំងនោះទេ។
ស្រ្តីពពោះជំនួសជាង១០នាក់ ក្នុងចំណោម៣២នាក់ ដែលបានចាប់ខ្លួនកាលចុងខែមិថុនា ឆ្នាំ២០១៨កន្លងទៅនេះ បានសម្រាលកូន ហើយអ្នកខ្លះមានកូនភ្លោះ ខណៈពេលដែលពួកគេឃុំខ្លួនបណ្តោះអាសន្ន ដោយចោទពីបទជួញដូរមនុស្សឆ្លងដែន ប៉ុន្តែមន្រ្តីសង្គមស៊ីវិលស្នើឲ្យលើកលែងការចោទប្រកាន់។
អនុប្រធានអចិន្ត្រៃយ៍របស់គណៈកម្មាធិការជាតិប្រយុទ្ធប្រឆាំងការជួញដូរមនុស្ស លោកស្រី ជូ ប៊ុនអេង បានប្រាប់ VOD ថាស្រ្តីពពោះជំនួសទាំង៣២នាក់បានបញ្ជូនទៅមន្ទីរពេទ្យមួយក្នុងទីក្រុងភ្នំពេញដោយមានការយាមកាមពីមន្ត្រីមណ្ឌលអប់រំនិងកែប្រែ (ម២) បន្ទាប់ពីពួកគេត្រូវបានតុលាការសម្រេចឃុំខ្លួនបណ្តោះអាសន្ន។ ស្រ្តីជាង១០នាក់បានសម្រោលកូននៅមន្ទីរពេទ្យនោះ។
លោកស្រី ជូ ប៊ុនអេង បានមានប្រសាសន៍ថា៖ [Quote]
លោកស្រី ជូ ប៊ុនអេង បានបន្តថាទារកនិងស្រ្តីជាម្តាយកំពុងរស់នៅជាមួយគ្នានៅមន្ទីរពេទ្យក្រោមការជួយឧបត្ថមពី គណៈកម្មាធិការជាតិប្រយុទ្ធប្រឆាំងការជួញដូរមនុស្ស ហើយរងចាំការសម្រេចពីតុលាការ ថាតើត្រូវធ្វើយ៉ាងណាចំពោះទារកទាំងនោះ។
លោកស្រី ជូ ប៊ុនអេង បានមានប្រសាសន៍ថា៖ «វាអាស្រ័យនឹងតុលាការថាតើសម្រេចក្តីយ៉ាងមេចប៉ុន្តែឥឡូវយើងគ្រាន់តែថែទាំគាត់សិនក្នុងដំណាក់កាលដែលមិនទាន់មានការសម្រេចក្តី»។
ការិយាល័យប្រឆាំងការជួញដូរមនុស្ស រាជធានីភ្នំពេញកាលពីខែមិថុនា ឆ្នាំ២០១៨ បានឃាត់ខ្លួនស្រ្តីពពោះជំនួស៣២នាក់ និងមនុស្ស៥នាក់ទៀតជាមេខ្យល់ ក្នុងនោះមានជនជាតិចិនម្នាក់។
លោកស្រី ជូ ប៊ុនអេង បានបញ្ជាក់ប្រាប់ VOD ថាបច្ចុប្បន្ន អាជ្ញាធរកំពុងតែធ្វើការស្រាវជ្រាវបន្តទៀតលើករណីពពោះជំនួសនេះ តែនៅមិនទាន់អាចបញ្ជាក់បានទេថាមានការរកឃើញករណីផ្សេងទៀតឬយ៉ាងណានោះទេ។ លោកស្រីថាស្រ្តីទាំង៣២នាក់នោះមិនមែនជាជនរងគ្រោះទេ តែពួកគេជាជនល្មើសទៅវិញព្រោះពួកគេបានមានគំនិត្យជួញដូរកូនទាំងនោះ។
លោកស្រី ជូ ប៊ុនអេង បានបន្តថា៖ <<រឿងនេះវាមិនគ្រាន់តែជាប់ពាក់ពន្ធ័ត្រឹមតែអន្តរការីទេ( មេខ្យល់)គឺវាចូលទៅក្នុងច្បាប់ស្តីពីការបង្ក្រាបអំពើជួញដូរមនុស្សនិងអំពើធ្វើអាជីវកម្មផ្លូវភេទត្រង់មាត្រា១៤ឬមាត្រា១៦ហ្នឹងដែលនិយាយអំពីការប៉ុនប៉ងនាំអនីតិជនឆ្លងដែនដោយខុសច្បាប់។ អញ្ចឹងម្តាយក៏ដោយ បើសិនជាគាត់នៅតែសហការជាមួយគេ គាត់នៅតែមានឆន្ទៈសហការជាមួយគេក្នុងការបង្កើតកូនដើម្បីនាំកូនចេញយកតែលុយហើយអត់គិតពីកូននឹង។ អាហ្នឹងវានៅក្នុងហ្នឹងហើយ>> ។
ប្រតិកម្មទៅនឹងការអះអាងរបស់លោកស្រី ជូ ប៊ុនអេង នាយកប្រតិបត្តិរបស់អង្គការយេនឌ័រកម្ពុជានិងការអភិវឌ្ឍ(GADC) លោកស្រី រស់ សុភាព បានមានប្រសាសន៍ថា ទោះបីជាស្រ្តីទាំងនោះ បានប្រព្រឹត្តខុស តែពួកគាត់គឺជាជនរងគ្រោះពីការកេងប្រវ័ញ្ចពីសំណាក់ភ្នាក់ងាររកសេវាពពោះជំនួសនិងមេខ្យល់ទៅវិញទេដែលបានបោកបញ្ឆោតឲ្យពួគគេទៅពពោះជំនួសដោយផ្តល់ប្រាក់ឈ្នួលតិចតួចទៅស្ត្រីហើយភ្នាក់ងារនិងមេខ្យល់បានចំណែកយ៉ាងច្រើន។ លោកស្រីសុភាព មិនពេញចិត្តទៅនឹងចំណាត់ការចាប់ឃុំខ្លួនស្រ្តីទាំងនោះ ហើយស្នើឲ្យទំលាក់ការចោទប្រកាន់ទៅលើពួកគេ។
លោកស្រី រស់ សុភាព បានមានប្រសាសន៍ថា៖ << ចំណាត់ការបែបនេះគឺកាន់តែដាក់បន្ទុកឲ្យស្ត្រីគាត់កាន់តែគេហៅថារងគ្រោះមួយជាន់ទៀត ព្រោះយើងដឹងហើយថាស្ត្រីដែលពពោះហ្នឹងគាត់ធ្វើដោយបង្ខំចិត្តហើយដើម្បីដោះស្រាយជីវភាពរស់នៅ ។ ហើយអឹញ្ចឹងបើសិនជាគាត់បានស្ថិតក្នុងស្ថានភាពបែបនឹងហើយក្រសួងក៏ដូចជារដ្ឋាភិបាលគួរតែមានជម្រើសផ្សេងដើម្បីយកចិត្តទុកដាក់ថែទាំគាត់ ឲ្យគាត់រួចផុតពី អឺ!ការកេងប្រវ័ញ្ចទៅលើពួកគាត់ហ្នឹង ពួកគាត់គឺរងគ្រោះទៅហើយ»។
លោកស្រី រស់ សុភាព បានសម្តែងការព្រួយបារម្ភពីការថែទំារបស់ទារកខណៈពេលដែលម្តាយរបស់ពួកគេជាប់ឃុំហើយមិនដឹងថាអនាគតរបស់ពួកគេយ៉ាងណានោះទេ។
លោកស្រី សុភាព បានបន្ថែមថា៖ <<អានោះរឹតតែធ្វើឲ្យមានបន្ទុកថែមមួយទៀតទៅឲ្យគាត់ហើយណា។ រដ្ឋាភិបាលគួរតែមានគោលការណ៏ឲ្យច្បាស់លាស់ក្នុងការថែរក្សាទារកនឹងធ្វើយ៉ាងណាឲ្យប្រាកដថា សិទ្ធិសេរីភាពរបស់ម្តាយមិនត្រូវបានជាប់ឃុំឃាំង ហើយសុវត្តិភាពនៃផ្នែកសុខភាពក៏ត្រូវបានថែរក្សា ហើយកូនដែលកើតត្រូវបានចឹញ្ចឹមបីបាច់ថែរក្សាឲ្យបានល្អប្រសើរ»។
ទាក់ទិនទៅនឹងករណីពពោះជំនួសនេះ រាជរដ្ឋាភិបាលកម្ពុជា បានសម្រេចពន្យាពេលចេញច្បាប់ស្តីពីការពពោះជំនួស កាលពីដើមឆ្នាំ២០១៨នេះផងដែរ។ រាជរដ្ឋភិបាលយល់ថាកម្ពុជាមិនទាន់សាកសមអនុវត្តច្បាប់នេះនៅឡើយទេ។ ប៉ុន្តែ ក្រសួងមហាផ្ទៃក៏បានចេញគោលការណ៏ណែនាំ កាលពីចុងឆ្នាំ២០១៧ថាអ្នកដែលជួលស្រ្តីពពោះជំនួស អាចស្នើទៅតុលាការដើម្បីទទួលបានសិទ្ធិធ្វើជាឳពុកម្តាយទារកទាំងនោះ សម្រាប់ទារកដែលកើតមុនថ្ងៃទី៨ ខែមករា ឆ្នាំ២០១៨ ប៉ុន្តែទារកដែលកើតក្រោយថ្ងៃកំណត់នេះម្តាយទាំងឡាយណាមានបំណងឲ្យទារកទៅអ្នកផ្សេងនឹងត្រូវផ្តន្ទាទោសពីបទជួញដូរមនុស្សនិងអនីតិជន។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន បានប្រាប់ VOD ថា តុលាការកំពុងបន្តនិតវីធីស៊ើបអង្កេតលើករណីស្ត្រីពពោះជំនួសទាំងជាង៣២នាក់នេះ។
លោក អ៊ី រិន បានមានប្រសាសន៍ថា៖ <<ឥឡូវកំពុងស្ថិតនៅក្នុងដៃចៅក្រមស៊ើប ទាល់តែចប់ដំណាក់កាលស៊ើបអង្កេតទើបបន្តនិតិវិធីសវនាការ >>។
តុលាការក្រុងភ្នំពេញកាលពីថ្ងៃទី៥ ខែកក្កដា ឆ្នាំ២០១៨ បានសម្រេចចោទប្រកានស្រ្តីស៊ីឈ្នួលពពោះ៣២នាក់ ដោយចោទពីបទ «ការជួញដូរមនុស្សដោយឆ្លងដែន» ដែលស្ថិក្នុងមាត្រា ១៦ នៃច្បាប់ស្តីពីការបង្រ្កាបការជួញដូរមនុស្សនិងអំពើធ្វើអាជីវកម្ម។
ទាក់ទងនឹងករណីនេះដែរ តុលាការក្រុងភ្នំពេញកាលពីថ្ងៃទី២៨ ខែមិថុនា ឆ្នាំ២០១៨ បានសម្រេចចោទប្រកាន់ស្រ្តីខ្មែរបូននាក់ និងបុរសជនជាតិចិនម្នាក់ជាមេខ្យល់ ដែលជាប់ពាក់ព័ន្ធនឹងការពពោះជំនួស។