គ.ជ.ប អំពាវដល់ប្រជាពលរដ្ឋខ្មែរទាំងអស់ឲ្យទៅពិនិត្យបញ្ជីឈ្មោះនិងចុះឈ្មោះបោះឆ្នោត ដែលប្រព្រឹត្តទៅពីចាប់ថ្ងៃទី១ដល់ថ្ងៃទី១៨ ខែតុលា ឆ្នាំ២០១៨ នៅតាមសាលាឃុំសង្កាត់ និងតាមភូមិមួយចំនួនក្នុងឃុំសង្កាត់ទូទាំងប្រទេស។
សេចក្តីអំពាវនាវនៅថ្ងៃនេះ គ.ជ.ប អំពាវនាវឲ្យពលរដ្ឋខ្មែរដែលមានឈ្មោះក្នុងបញ្ជីបោះឆ្នោតឆ្នាំ២០១៧ ទៅពិនិត្យមើលឈ្មោះរបស់ខ្លួនដែលមានបិទផ្សាយនៅតាមសាលាឃុំ សង្កាត់ ដើម្បីឲ្យប្រាកដថាខ្លួនពិតជាមានឈ្មោះនិងទិន្នន័យត្រឹមត្រូវក្នុងបញ្ជីឈ្មោះបោះឆ្នោត។
សេចក្តីអំពាវនាវដដែល គ.ជ.ប បន្តទៀតថា ចំពោះប្រជាពលរដ្ឋខ្មែរដែលមានសិទ្ធិបោះឆ្នោត ហើយមិនទាន់បានចុះឈ្មោះបោះឆ្នោតពីមុនមក ពោលគឺចំពោះអ្នកដែលទើបគ្រប់អាយុ១៨ឆ្នាំគិតត្រឹមថ្ងៃទី៣១ ខែធ្នូ ឆ្នាំ២០១៨ មានន័យថា អ្នកដែលកើតមុនឬត្រឹមថ្ងៃទី១ ខែមករា ឆ្នាំ២០០១ និងប្រជាពលរដ្ឋខ្មែរដែលបានផ្លាស់លំនៅឋានឬទីសំណាក់ចូលក្នុងឃុំសង្កាត់ថ្មី គ.ជ.ប អញ្ចើញឲ្យទៅចុះឈ្មោះបោះឆ្នោតតាមកម្មវិធីរបស់ក្រុមចុះឈ្មោះបោះឆ្នោតនៅតាមឃុំសង្កាត់ដែលខ្លួនកំពុងរស់នៅ។
នៅក្នុងសេចក្តីប្រកាសព័ត៌មានដាច់ដោយឡែកមួយទៀតនៅថ្ងៃនេះដែរ គ.ជ.ប ក៏បានដាក់និងទទួលពាក្យសុំចុះឈ្មោះអ្នកសង្កេតការណ៍ជាតិ អន្តរជាតិនិងភ្នាក់ងារគណបក្សនយោបាយ សម្រាប់ការពិនិត្យបញ្ជីឈ្មោះនិងការចុះឈ្មោះបោះឆ្នោត ឆ្នាំ២០១៨ផងដែរ។
សេចក្តីប្រកាសព័ត៌មាននោះឲ្យដឹងថា ការដាក់និងការទទួលពាក្យសុំចុះឈ្មោះអ្នកសង្កេតការណ៍ជាតិ ត្រូវប្រព្រឹត្តទៅពីថ្ងៃទី១ ខែកញ្ញា រហូតដល់ថ្ងៃទី២១ ខែធ្នូ ឆ្នាំ២០១៨។ ចំណែកឯអ្នកសង្កេតការណ៍អន្តរជាតិ ត្រូវប្រព្រឹត្តទៅពីថ្ងៃទី១ ខែកញ្ញា រហូតដល់ថ្ងៃទី២៨ ខែធ្នូ ឆ្នាំ២០១៨។ សម្រាប់ការដាក់និងការទទួលពាក្យសុំចុះឈ្មោះអ្នកសង្កេតការណ៍គណបក្សនយោបាយ ត្រូវប្រព្រឹត្តទៅពីថ្ងៃទី២៤ ខែកញ្ញា រហូតដល់ថ្ងៃទី២១ ខែធ្នូ ឆ្នាំ២០១៨។
តាមរបាយការណ៍របស់គ.ជ.ប ដែលចេញកាលពីខែមករា ឆ្នាំ២០១៨ ប្រជាពលរដ្ឋចំនួន ៨ ៣៨០ ២១៧ នាក់ មានឈ្មោះនៅក្នុងបញ្ជីបោះឆ្នោត៕
