រដ្ឋលេខាធិការដ្ឋានអាកាសចរណ៍ស៊ីវិលកម្ពុជា កំពុងដំណើរការការត្រួតពិនិត្យគម្រោងសាងសង់អាកាសយានដ្ឋានអន្តរជាតិដែលមានទីតាំងនៅក្នុងខេត្តកណ្ដាល ខណៈមិនទាន់អាចបញ្ជាក់ពេលវេលាសាងសង់បាននៅឡើយទេ។
អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល លោក ស៊ីន ចាន់សិរីវុត្ថា បានឲ្យVOD ដឹងថានៅពេលនេះគម្រោងព្រលានយន្តហោះថ្មីកំពុងឈានដល់ដំណាក់កាលនៃការត្រួតពិនិត្យឡើងវិញដែលនឹងត្រូវចំណាយពេលបន្ថែមទៀត។ លោកក៏មិនទាន់អាចបញ្ជាក់ពីថ្ងៃសាងសង់បាននៅឡើយទេ។
លោកលើកឡើងទៀតថា៖ « អត់មានអីផ្លាស់ប្ដូរថ្មីទេ ព្រោះយើងធ្លាប់និយាយហើយថានឹងមានព្រលានយន្តហោះថ្មីនៅទីតាំងម្ដុំហ្នឹង ប៉ុណ្ណាប៉ុនហ្នឹង ចំណាយលុយអស់ប៉ុន្មាន អត់មាននិយាយអីលើសពីហ្នឹងទេ » ។
កាលពីម្សិលមិញ តំណាងក្រុមហ៊ុនចិន Beijing Urban Construction Group Co Ltd., ដែលជាដៃគូររបស់ក្រុមហ៊ុន OCIC ដែលសាងសង់ប្រលានយន្តហោះនេះ លោកស្រី Annabella ក្នុងជំនួបរវាងរដ្ឋមន្ត្រីទទួលបន្ទុករដ្ឋលេខាធិការអាកាសចរណ៍លោក ម៉ៅ ហាវណ្ណាល់ បានលើកឡើងអំពីសមត្ថភាពរបស់ក្រុមហ៊ុនក្នុងការសាងសង់អាកាសយានដ្ឋាន នៅប្រទេសចិន និងបណ្ដាប្រទេសនានាលើពិភពលោក និងស្នើសុំការពិចារណាក្នុងសាងសង់អាកាសយានដ្ឋានអន្តរជាតិភ្នំពេញថ្មីផងដែរ។
អ្នកនាំពាក្យអាកាសចរណ៍ស៊ីវិលលោក ស៊ីន ចាន់សិរីវត្ថា បានអះអាងថាជំនួបរវាងភាគីចិននិងលោក ម៉ៅ ហាវណ្ណាល់ កាលពីម្សិលមិញគឺគ្រាន់តែជាការសំដែងការគួរសមប៉ុណ្ណោះ មិនមានបញ្ហាអ្វីទាក់ទងនឹងគម្រោងព្រលានយន្តហោះនោះទេ។
លោកបញ្ជាក់ថា៖ « OCIC គាត់ជាម្ចាស់គម្រោង អញ្ចឹងគាត់រកអ្នកនេះជាអ្នកសាងសង់ អ្នកនេះជាអ្នកចែកចាយ ហើយដល់ពេលមកគាត់សុំជួបយើង សំដែងការគួរសមអញ្ចឹងទៅតែប៉ុនហ្នឹងទេ » ។
រដ្ឋាភិបាលកម្ពុជាកាលពីចុងឆ្នាំ២០១៧ បានសម្រេចឲ្យក្រុមហ៊ុន Cambodia Airport Investment Co., Ltd ដែលជាក្រុមហ៊ុនដៃគូវិនិយោគរវាងវិស័យសាធារណៈ និង ឯកជន សាងសង់ប្រលានយន្តហោះទំហំ ២៦០០ ហិតា នៅក្រុងតាខ្មៅ និង ស្រុកកណ្ដាលស្ទឹង ខេត្តកណ្ដាល ដែលទឹកប្រាក់ក្នុងការវិនិយោគនេះមានតម្លៃ ១៥០០លានដុល្លារសហរដ្ឋអាមេរិក។
ទុនក្នុងការសាងសង់ប្រលាននេះមាន៩០ភាគរយជារបស់ក្រុមហ៊ុនវិនិយោគOCIC ខណៈរដ្ឋលេខាធិការដ្ឋានអាកាសចរស៊ីវិលតំណាងឲ្យរដ្ឋាភិបាលកម្ពុជាមាន ១០ភាគរយ៕
