ភ្លើងឆេះព្រះវិហារមួយនៅក្នុងស្រុកព្រៃឈរខេត្តកំពង់ចាម កាលពីម្សិលមិញ បណ្តាលឲ្យខូចខាតសម្ភារមួយចំនួន ហើយសមត្ថកិច្ចប្រើប្រាស់រថយន្តបាញ់ទឹកពន្លត់។
គេហទំព័រនគរបាលជាតិបានឲ្យដឹងកាលពីល្ងាចម្សិលមិញថា មានអគ្គិភ័យឆាបឆេះព្រះវិហារនៅក្នុងវត្តស្រង៉ែ ឃុំស្រង៉ែ ស្រុកព្រៃឈរ ខេត្តកំពង់ចាម បន្ទាប់មកកម្លាំងផ្នែកជំនាញ កម្លាំងប៉ុស្តិ៍នគរបាលស្រង៉ែ និងកម្លាំងអធិការដ្ឋាននគរបាលស្រុកជើងព្រៃចុះជួយអន្តរាគមន៍ ហើយគ្រប់គ្រងស្ថានការបានទាំងស្រុង ដោយប្រើប្រាស់រថយន្តពន្លត់អគ្គីភ័យចំនួន០២គ្រឿង និងប្រើប្រាស់ទឹកចំនួន០២ស៊ឺទែន។
គេហទំព័រដដែលឲ្យដឹងបន្តថា ករណីនេះបណ្តាលអោយខូចខាតសម្ភារតុបតែងបាល័ង្កព្រះ ផ្នែកខ្លះនៃផ្ទាំងគំនូរពិដាន និងសម្ភារមួយចំនួនទៀត។
គេហទំព័របញ្ជាក់ថា អគ្គិភ័យនេះមិនបង្កគ្រោះថ្នាក់ដល់ប្រជាពលរដ្ឋឡើយ ហើយមូលហេតុបណ្តាលឲ្យឆេះនេះ មកពីការដុតភ្លើងទៀនទុកចោលមិនមានអ្នកនៅមើលខុសត្រូវ៕
