ក្រុមសិទ្ធិមនុស្សអន្តរជាតិមួយ បានជំរុញទៅអាជ្ញាធរកម្ពុជាឲ្យចាត់ទុកជាមិនបានការនូវសាលក្រមកាត់ទោសមន្ត្រី និងអតីតមន្ត្រីអាដហុក ដោយហៅសេចក្ដីសម្រេចនោះថា អយុត្តិធម៌ សម្រាប់ក្រុមអ្នកការពារសិទ្ធិមនុស្ស។
មន្ត្រីការពារសិទ្ធិមនុស្សនៃសមាគមអាដហុក ៤រូបមានលោក នី សុខា អ្នកស្រី លឹម មុន្នី លោក យី សុខសាន្ត លោក ណៃ វង់ដា និងអគ្គលេខាធិការរងគណៈកម្មាធិការជាតិរៀបចំការបោះឆ្នោត (គ.ជ.ប.) លោក នី ចរិយា ដែលជាអតីតមន្ត្រីអាដហុកផងនោះ ត្រូវបានសាលាដំបូងរាជធានីភ្នំពេញសម្រេចដាក់ទោសឲ្យជាប់ពន្ធនាគារម្នាក់ៗ ៥ឆ្នាំ នៅក្រោមការចោទប្រកាន់ថា បានសូកប៉ាន់សាក្សី ប៉ុន្តែ ទោសរបស់ពួកគេត្រូវបានព្យួរ។
ប៉ុន្តែ ក្នុងសេចក្ដីថ្លែងការណ៍របស់ខ្លួនពីរថ្ងៃក្រោយសាលក្រមនោះ អង្គការ ការពារសិទ្ធិមនុស្សអន្តរជាតិ Front Line Defenders បានចាត់ទុកសេចក្ដីសម្រេចរបស់តុលាការកម្ពុជាថា «អយុត្តិធម៌» ហើយជឿជាក់ថា សកម្មជនការពារសិទ្ធិមនុស្សកម្ពុជាទាំង ៥រូបនោះ ត្រូវបានកាត់ទោសបែបនេះ ដោយសារតែពួកគេបានបំពេញការងារការពារសិទ្ធិមនុស្សនៅកម្ពុជាស្របតាមច្បាប់ និងដោយសន្តិវិធី។
ទន្ទឹមនឹងនេះ អង្គការសិទ្ធិមនុស្សដែលមូលដ្ឋាននៅទីក្រុងឌូប្លីន ប្រទេសអៀរឡង់នេះ បានជំរុញទៅអាជ្ញាធរកម្ពុជា ឲ្យធ្វើមោឃភាពចំពោះសាលក្រមនោះ។
ក្រុមមន្ត្រី និងអតីតមន្ត្រីនៃសមាគមការពារសិទ្ធិមនុស្សអាដហុកទាំងនេះ ត្រូវបានអាជ្ញាធរកម្ពុជាចាប់ឃុំខ្លួនចាប់តាំងពីថ្ងៃទី២៨ ខែមេសា ឆ្នាំ២០១៦ រហូតដល់ពេលពួកគេត្រូវបានដោះលែងឲ្យនៅក្រៅឃុំកាលពីថ្ងៃទី២៩ ខែមិថុនា ឆ្នាំ២០១៧ នៅក្រោមបទចោទប្រកាន់ «សូកប៉ាន់សាក្សី»នៅក្នុងសំណុំរឿងស្នេហាដ៏ចម្រូងចម្រាស់របស់មេដឹកនាំគណបក្សសង្គ្រោះជាតិ លោក កឹម សុខា ដែលត្រូវបានគេទម្លាយថា មានទំនាក់ទំនងស្នេហាលួចលាក់ជាមួយនាង ខុម ចាន់តារាទី ហៅស្រីមុំ៕