អន្តរជាតិ

រញ្ជួយដី និងរលកស៊ូណាមិនៅឥណ្ឌូណេស៊ី តួលេខអ្នកស្លាប់កើនដល់៨៣២នាក់ហើយ

លោក ឌិត សុខធី
| ៣០ កញ្ញា ២០១៨
ម៉ោង ១៧:៤១

ក្រុមជួយសង្គ្រោះផ្ដល់ការព្យាបាល និងថែទាំអ្នករងរបួសនៅខាងក្រៅបរិវេណមន្ទីរពេទ្យមួយ ស្ថិតនៅទីក្រុងប៉ាលូ កោះស៊ូឡាវ៉េស៊ី ឥណ្ឌូណេស៊ី ក្រោយរញ្ជួយដី និងរលកស៊ូណាមិ កាលពីថ្ងៃទី២៨ ខែកញ្ញា ឆ្នាំ២០១៨។ រូបថត៖ Jakarta Post

មនុស្សយ៉ាងតិច ៨៣២នាក់ហើយ ត្រូវបានរាយការណ៍ថា បានស្លាប់គិតត្រឹមរសៀលថ្ងៃនេះ ក្រោយការវាយប្រហារពីរលកស៊ូណាមិ ដែលបណ្ដាលមកពីរញ្ជួយដីកើតឡើងនៅលើកោះស៊ូឡាវ៉េស៊ី ប្រទេសឥណ្ឌូណេស៊ី។

សារព័ត៌មាន Jakarta Post របស់ឥណ្ឌូណេស៊ី បានដកស្រង់សម្ដីមន្ត្រីទីភ្នាក់ងារគ្រប់គ្រងគ្រោះមហន្តរាយឥណ្ឌូណេស៊ី បាននិយាយថា តួលេខអ្នកស្លាប់បណ្ដាលមកពីរញ្ជួយដីកម្លាំង ៧.៤រ៉ិចទ័រ និងរលកស៊ូណាមិកាលពីថ្ងៃសុក្រកន្លងមកនេះ នៅទីក្រុងប៉ាលូ និងដុងហ្កាឡា ភាគកណ្ដាលកោះស៊ូឡាវ៉េស៊ីនោះ បានកើនឡើងដល់ចំនួន ៨៣២នាក់ហើយ។

ប៉ុន្តែ មន្ត្រីឥណ្ឌូណេស៊ីក៏បានព្យាករថា តួលេខអ្នកស្លាប់នឹងបន្តកើនឡើងថែមទៀត ខណៈដែលក្រុមអ្នកជួយសង្គ្រោះកំពុងតែស្វែងរកអ្នកនៅរស់រានមានជីវិត។

ទីភ្នាក់ងារគ្រប់គ្រងគ្រោះមហន្តរាយឥណ្ឌូណេស៊ី ត្រូវបានសារព័ត៌មានដកស្រង់សម្ដីចុះផ្សាយបន្តថា មនុស្សយ៉ាងហោច ៥៤០នាក់ទៀត បានរងរបួសនៅអំឡុងគ្រោះមហន្តរាយនេះ ហើយត្រូវបានបញ្ជូនទៅសង្គ្រោះនៅតាមមន្ទីរពេទ្យនានា។

ជាងនេះទៅទៀត ពលរដ្ឋឥណ្ឌូណេស៊ីដល់ទៅ ១៦ ៣៧២នាក់ ត្រូវបានជម្លៀសចេញ និងស្នាក់នៅបណ្ដោះអាសន្ននៅតាមជម្រកភៀសខ្លួន៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។