មន្ត្រីជិត ៥០រូប ត្រូវបានតែងតាំងជាទីប្រឹក្សា និងជំនួយការរបស់ប្រធានរដ្ឋសភា លោក ហេង សំរិន ខណៈដែលមន្ត្រីកាន់តែច្រើន ត្រូវបានស្នើតែងតាំងជាបន្តបន្ទាប់ឲ្យធ្វើជាទីប្រឹក្សា ឬជាជំនួយការរបស់រដ្ឋាភិបាល ឬមេដឹកនាំរដ្ឋាភិបាល។
ក្នុងព្រះរាជក្រឹត្យកាលពីថ្ងៃទី២៧ ខែកញ្ញា ប្រមុខរដ្ឋស្ដីទី លោក សាយ ឈុំ បានសម្រេចតែងតាំងមន្ត្រី ៤១រូប ឲ្យធ្វើជាទីប្រឹក្សារបស់លោក ហេង សំរិន ដែលមានឋានៈចាប់ពីអនុរដ្ឋលេខាធិការ រហូតដល់ឋានៈស្មើរដ្ឋមន្ត្រី ខណៈដែលមន្ត្រី ៥រូបទៀត ត្រូវបានតែងតាំងជាជំនួយការមានឋានៈស្មើអគ្គនាយក។
ប្រមុខរដ្ឋស្ដីទី លោក សាយ ឈុំ បានសម្រេចបែបនេះ ទៅតាមសំណើរបស់ប្រធានរដ្ឋសភា លោក ហេង សំរិន។
ក្រៅពីលោក ហេង សំរិន លោក ងួន ញ៉ិល អនុប្រធានទី១ នៃរដ្ឋសភា ក៏បានស្នើទៅលោក សាយ ឈុំ ឲ្យតែងតាំងមន្ត្រីដល់ទៅ ២៥នាក់ ធ្វើជាទីប្រឹក្សារបស់លោកផងដែរ កាលពីថ្ងៃទី១៨ ខែកញ្ញាកន្លងមក ដោយមានឋានៈចាប់ពីរដ្ឋលេខាធិការរហូតដល់រដ្ឋមន្ត្រីផងដែរ។
ចំនួនទីប្រឹក្សា ឬក៏ជំនួយការរបស់មេដឹកនាំស្ថាប័នរដ្ឋសភា និងរដ្ឋាភិបាល បានកើនឡើងជាបន្តបន្ទាប់ ចាប់តាំងពីក្រោយការបង្កើតរដ្ឋសភា និងរដ្ឋាភិបាលអាណត្តិទី៦នេះ ក្រោយពីការបោះឆ្នោតជាតិកាលពីចុងខែកក្កដាកន្លងមក ដែលត្រូវបានប្រកាសថា គណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន បានឈ្នះអាសនៈទាំង ១២៥នៅរដ្ឋសភា ខណៈដែលគណបក្សសង្គ្រោះជាតិ ដែលជាគូប្រជែងដ៏ធំរបស់បក្សកាន់អំណាច ត្រូវបានរំលាយចោល និងហាមឃាត់មិនឲ្យចូលរួមប្រកួតប្រជែងក្នុងការបោះឆ្នោត ក្រោមហេតុផលថា «ពាក់ព័ន្ធនឹងអំពើក្បត់ជាតិ»។
ចាប់តាំងពីក្រោយការបង្កើតរដ្ឋាភិបាលរួចមក មនុស្សដល់ជិត ៣០០នាក់ហើយ ត្រូវបានលោក ហ៊ុន សែន ស្នើសុំ ឬក៏តែងតាំងដោយខ្លួនលោកផ្ទាល់ ឲ្យកាន់តំណែងជាទីប្រឹក្សា ជំនួយការ សមាជិកក្រុមពិធីការនៅក្នុងខុទ្ទកាល័យរបស់លោក ខណៈដែលមនុស្ស ២០៧នាក់ទៀត ត្រូវបានលោកស្នើសុំតែងតាំងជាទីប្រឹក្សារដ្ឋាភិបាល។
បើសរុបបញ្ចូលគ្នាជាមួយមន្ត្រីដែលត្រូវបានតែងតាំងជាអនុរដ្ឋ និងរដ្ឋលេខាធិការនៅតាមបណ្ដាក្រសួង និងស្ថាប័ននានាទៀត មនុស្សដល់ទៅ ១១១៨នាក់ហើយ ត្រូវបានលោក ហ៊ុន សែន ស្នើសុំ ឬក៏តែងតាំងដោយផ្ទាល់ គិតចាប់តាំងពីក្រោយការបង្កើតរដ្ឋាភិបាលថ្មីមក៕