គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. បានចាប់ផ្ដើមយុទ្ធនាការចុះឈ្មោះបោះឆ្នោតថ្មីនៅថ្ងៃនេះ ដោយថា ចាប់ផ្ដើមចុះឈ្មោះពលរដ្ឋរហូតដល់តាមមូលដ្ឋាន។
ក្នុងសេចក្ដីប្រកាសព័ត៌មានរបស់ខ្លួននៅថ្ងៃនេះ គ.ជ.ប. បានឲ្យដឹងថា ការធ្វើបច្ចុប្បន្នភាពនៃបញ្ជីបោះឆ្នោត និងការចុះឈ្មោះពលរដ្ឋថ្មីទៅក្នុងបញ្ជីបោះឆ្នោត ត្រូវបានចាប់ផ្ដើមនៅថ្ងៃនេះ និងមានរយៈពេល ១៨ថ្ងៃ។
អនុប្រធាន គ.ជ.ប. លោក នុត សុខុម ត្រូវបានដកស្រង់សម្ដីនៅក្នុងសេចក្ដីប្រកាសព័ត៌មាននោះ ដែលបាននិយាយថា គ.ជ.ប. នឹងផ្ដល់សេវាចុះឈ្មោះបោះឆ្នោតនៅតាមឃុំ-សង្កាត់ និងតាមបណ្ដាភូមិនានា។
គ.ជ.ប. បានប្រកាសកាលពីថ្ងៃទី១៨កញ្ញាថា ខ្លួនគ្រោងចុះឈ្មោះពលរដ្ឋជិតកន្លះលាននាក់ទៀត (៤៨៩ ៩៦៣) នៅក្នុងបញ្ជីបោះឆ្នោតឆ្នាំ២០១៨នេះ និងថា គ្រោងលុបឈ្មោះពលរដ្ឋជិត ១០ម៉ឺននាក់(៩៥ ៩២៨) ពីបញ្ជីបោះឆ្នោតក្នុងឆ្នាំនេះ។
បើតាមគ.ជ.ប. ពលរដ្ឋជាង ៨លាន ៣៨នាក់ ត្រូវបានចុះឈ្មោះក្នុងបញ្ជីបោះឆ្នោតកាលពីឆ្នាំ២០១៧កន្លងមក៕
