ប្រទេសអូម៉ង់ បានប្រកាសហាមនាំចូលសត្វស្លាប និងផលិតផលសត្វស្លាបគ្រប់ប្រភេទពីប្រទេសចំនួន៣ក្នុងតំបន់អាស៊ាន ក្នុងនោះក៏មានកម្ពុជាផងដែរ ដោយថា ជំងឺផ្ដាសាយបក្សី បានផ្ទុះឡើងនៅក្នុងប្រទេសទាំងនេះ។
យោងតាមសារព័ត៌មានអូម៉ង់ Muscat Daily ដែលបានចុះផ្សាយកាលពីថ្ងៃទី២៩ កញ្ញា បានឲ្យដឹងថា ក្រសួងកសិកម្មប្រទេសនេះបានសម្រេចហាមនាំចូលសត្វ និងផលិតផលមាន់ទា និងសត្វស្លាបដទៃទៀត ពីប្រទេសកម្ពុជា ម៉ាឡេស៊ី និងវៀតណាម ដោយសារការបារម្ភពីការផ្ទុះឡើងនៃជំងឺផ្ដាសាយបក្សីក្នុងប្រទេសទាំងនេះ កាលពីខែសីហាកន្លងមក។
អគ្គនាយកនៃអគ្គនាយកដ្ឋានសុខភាព និងផលិតកម្មសត្វ លោក តាន់ ផាន់ណារ៉ា បានប្រាប់វីអូឌីថា លោកមិនទាន់ទទួលបានលិខិតផ្លូវការណាមួយពីក្រសួងកសិកម្មប្រទេសអូម៉ង់នៅឡើយទេ ខណៈលោកបញ្ជាក់ថា កម្ពុជាមិនទាន់មានសមត្ថភាពនាំផលិតផលសត្វស្លាបទៅលក់ក្រៅប្រទេសនោះទេ។ លោកចាត់ទុកថា ការបារម្ភរបស់អូម៉ង់នេះជាការបារម្ភមួយមិនសមហេតុផល។
លោកថា៖ «យើងមិនទាន់មានអីនាំចេញទៅប្រទេសគាត់ឯណា! ហើយបើនាំចេញក៏យើងធ្វើវិភាគត្រឹមត្រូវដែរ ត្រូវមានអាជ្ញាធរមានសមត្ថកិច្ចពេទ្យសត្វហ្នឹងស៊ីញ៉េ។ យើងវិភាគថា សត្វដែលនាំចេញហ្នឹង វាអត់មានជំងឺ យើងគោរពគោលការណ៍ទៅវិញទៅមកតើ តែប្រទេសហ្នឹងដូចជាអត់មានការព្រមព្រៀងនាំចេញនាំចូលជាមួយយើងទេ»។
ទោះជាយ៉ាងលោកទទួលស្គាល់ថា ប្រទេសកម្ពុជាធ្លាប់មានផ្ទុះជំងឺផ្ដាសាយបក្សីលើសត្វមែនកាលពីអំឡុង២ខែមុនក្នុងខេត្តត្បូងឃ្មុំ តែករណីនេះត្រូវបានក្រុមការងារក្រសួងចុះពិនិត្យ និងដោះស្រាយរួចហើយ។
ប្រធានកម្មវិធីបរិស្ថាន និងសុខភាពនៃមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជាហៅកាត់ថា សេដាក លោក គាម មករាឌី យល់ស្របចំពោះការលើកឡើងរបស់ក្រសួងកសិកម្ម តែអ្វីដែលលោកបារម្ភ គឺខ្លាចមានជនខិលខូចលួចប្រើឈ្មោះប្រទេសកម្ពុជា សម្រាប់នាំចេញទៅប្រទេសនោះ។
លោកថា៖ «អញ្ចឹងវាអាចប៉ះពាល់ដល់អ្នកផលិត អ្នកចិញ្ចឹមនូវបក្សី ឬក៏ទាហ្នឹង ហើយអាចប៉ះពាល់ដល់មុខមាត់របស់កម្ពុជាពីការលើកឡើងនៃការគ្រប់គ្រងការផ្ទុះឡើងនៃជំងឺហ្នឹងអត់បានដិតដល់អញ្ចឹង។ តែបើប៉ះពាល់ដល់សេដ្ឋកិច្ច យើងគិតថា មិនមានប៉ះពាល់អីអាក្រក់ទេ»។
បច្ចុប្បន្ន កម្ពុជាអាចនាំចេញផលិតផលសត្វគោតែមួយប៉ុណ្ណោះទៅក្រៅប្រទេស ខណៈប្រទេសវៀតណាមឈរលំដាប់ថ្នាក់លេខ១ ហើយថៃឈរលេខ២ ដែលបានទិញផលិតផលសាច់គោពីកម្ពុជា៕
