អង្គការចលនាមាតាធម្មជាតិបានរកឃើញថាកម្ពុជាបានទិញមាសពីប្រទេសសឹង្ហបុរីជាច្រើនតោនក្នុងរយៈពេល៥ឆ្នាំចុងក្រោយ ខណៈដែលទិន្នន័យគយកម្ពុជាពុំបានបង្ហាញច្បាស់លាស់ពីការទិញនេះទេ ដែលធ្វើឲ្យស្ថាប័ននេះដាក់ការសង្ស័យថាកម្ពុជាកំពុងជាប់ពាក់ព័ន្ធនឹងឧក្រិដ្ឋកម្មហិរញ្ញវត្ថុ។
ប្រធានចលនាមាតាធម្មជាតិដែលត្រូវហាមមិនឲ្យចូលកម្ពុជាលោក អាឡិច ហ្គន់សាឡេស ដេវិតសុន បានលើកឡើងក្នុងវីដេអូរយៈពេលជិត៣នាទីរបស់លោកដែលបានផ្សព្វផ្សាយតាមបណ្ដាញសង្គមហ្វេសប៊ុក ដោយបានរកឃើញថាក្នុងរយៈពេល៥ឆ្នាំគិតចាប់ពីឆ្នាំ២០១២ ដល់ឆ្នាំ២០១៧ កម្ពុជាបានទិញមាសពីប្រទេសសឹង្ហបុរី ក្នុងចំនួន៣៧០តោនដែលមានតម្លៃប្រមាណ ១៥ពាន់លានដុល្លារអាមេរិក ខណៈដែលទិន្នន័យពីគយកម្ពុជាពុំបានបង្ហាញពីការនាំចូលដ៏ច្រើនសម្បើមនេះឡើយ។ លោកបញ្ជាក់ថាចំនួននៃការទិញនេះគឺមានទំហំធំបើធៀបនឹងសេដ្ឋកិច្ចកម្ពុជា ដោយសារប្រទេសនេះមានលទ្ធភាពទិញមាសស្មើនឹងប្រទេសមហាអំណាចសេដ្ឋកិច្ចចិន។
លោកដាក់ការសង្ស័យថាប្រទេសកម្ពុជាអាចជាប់ពាក់ព័ន្ធទៅនឹងឧក្រិដ្ឋកម្មហិរញ្ញវត្ថុដែលរួមមាន ការគេចពន្ធ ការក្លែងបន្លំឯកសារ អំពើពុករលួយ និងលាងលុយកខ្វក់ជាដើម។
លោកលើកឡើងថា៖ « វាច្រើនជាងដាច់ បើប្រៀបធៀបនឹងចំនួនមាសដែលនាំចេញទៅ ប្រទេសនៅអាស៊ានមួយចំនួនដូចជា វៀតណាម ម៉ាឡេស៊ី ឥណ្ឌូណេស៊ី និងថៃជាដើម បើទោះបីទំហំសេដ្ឋកិច្ចកម្ពុជាទាបជាងប្រទេសទាំងនោះឆ្ងាយយ៉ាងណាក៏ដោយ » ។
ថ្លែងប្រាប់VOD បន្ថែមប្រធានចលនាមាតាធម្មជាតិលោក អាឡិច ហ្គន់សាឡេស ដេវិតសុន ថាចំនួននៃការនាំចូលនេះមានទំហំធំដែលអាចធ្វើឲ្យខាតបង់ប្រយោជន៍ពន្ធសម្រាប់ប្រជាជាតិខ្មែរទាំងមូលហើយ ស្ថាប័នពីររបស់រដ្ឋគឺធនាគារជាតិ និងអគ្គនាយកដ្ឋានគយ គឺជាអ្នកពាក់ព័ន្ធធំជាងគេក្នុងរឿងនេះ។
លោកស្នើឲ្យស្ថាប័នទាំងពីរនេះបកស្រាយពីភាពខុសគ្នារវាងទិន្នន័យកម្ពុជា និងសិង្ហបុរីនេះ។
លោកថា៖ « ខ្មែររាល់ថ្ងៃនេះយើងកំពុងតែត្រូវការ រដ្ឋត្រូវការលុយសម្រាប់សាងសង់សាលារៀនមន្ទីរពេទ្យ ដំឡើងប្រាក់ខែមន្ត្រីរាជការ ។ល។ អញ្ចឹងទៅ។ អញ្ចឹងនៅពេលដែលមានមាសគេចពន្ធដែលមានតម្លៃរាប់ពាន់លានដុល្លារ អញ្ចឹងវាប៉ះពាល់ដល់សេដ្ឋកិច្ចជាតិទាំងមូល ហើយមួយទៀតប្រសិនជាលុយហ្នឹងវាពាក់ព័ន្ធនឹងការលាងលុយកខ្វក់ហ្នឹង ក៏វាប៉ះពាល់ដល់មុខមាត់ប្រទេសកម្ពុជាផង ហើយក៏ប៉ះពាល់ដល់សន្តិសុខជាតិទាំងមូលហ្នឹង » ។
VODមិនអាចទាក់ទងសុំការបំភ្លឺពីអគ្គនាយកបច្ចេកទេសនៃធនាគារជាតិ លោកស្រី ជា សិរី អ្នកនាំពាក្យក្រសួងសេដ្ឋកិច្ចលោក គឹម សុភៈ អគ្គនាយកនៃអគ្គនាយកដ្ឋានគយលោក គុណ ញឹម និងអ្នកនាំពាក្យរដ្ឋាភិបាល លោក ផៃ ស៊ីផាន បានទេនៅថ្ងៃនេះ។
ប្រធានសម្ព័ន្ធគណនេយ្យភាពសង្គមលោក សន ជ័យ យល់ថាការកត់ត្រាទិន្នន័យរវាងប្រទេសមួយ និងប្រទេសមួយផ្សេងទៀតតែងមានការខុសគ្នា តែទោះជាយ៉ាងណាលោកក៏ជំរុញឲ្យរដ្ឋាភិបាលបកស្រាយភាពខុសគ្នានេះឲ្យបានច្បាស់លាស់ផងដែរ។
លោក សន ជ័យថា៖ « នេះគឺជាការរកឃើញមួយផ្នែកនៃការស្រាវជ្រាវ ស៊ើបអង្កេតបែបឯករាជ្យមួយ អញ្ចឹងខ្ញុំយល់ថាកាបង្ហាញភស្តុតាងជាសាធារណៈ ជាភស្តុតាងរឹងមាំមួយដែលអាចជួយដល់ការពង្រឹងនូវតម្លាភាព ហើយនឹងអាចនាំឲ្យមានប្រយោជន៍មួយ ជាពិសេសគឺអាចទាក់ទងនឹងការរត់ពន្ធគយដែរ » ។
ទោះជាយ៉ាងណាបើតាមមាតាធម្មជាតិ ក្នុងរយៈពេល២សប្តាហ៍ប្រសិនជាគ្មានការឆ្លើយតបពីកម្ពុជាជុំវិញករណីនេះខ្លួននឹងដាក់ពាក្យប្ដឹងទៅកាន់អាជ្ញាធរសឹង្ហបុរីដើម្បីឲ្យស៊ើបអង្កេតផងដែរ។
របាយការណ៍របស់ international center for asset recoveryក្នុងឆ្នាំ២០១៧ បានចាត់ថ្នាក់ប្រទេសកម្ពុជាជាប់លេខ៩ក្នុងចំណោមប្រទេស១៤៦ផ្សេងទៀតដែលមានន័យថាប្រទេសនេះមានការប្រឈមខ្ពស់នៃការលាងលុយកខ្វក់៕