សាលាដំបូងរាជធានីភ្នំពេញ សម្រេចចោទប្រកាន់ជនសង្ស័យចំនួន ៨ នាក់ ពីបទរៀបចំចាត់តាំងក្រុមជនប្រដាប់អាវុធ សន្និធិអាវុធនិងរឿងផ្ទុះដោយគ្មានការអនុញ្ញាតិ និងពីបទ ចូលរួមក្នុងក្រុមជនប្រដាប់អាវុធ តាមមាត្រា៤៨៥ មាត្រា ៤៨៦ និងមាត្រា៤៨៨ នៃក្រមព្រហ្មទណ្ឌ ។ នេះ បើយោងតាម អ្នកនាំពាក្យសាលាដំបូងរាជធានីភ្នំពេញ លោក លី សុផាណា ដែលបានប្រាប់វី.អូ.ឌីតាមប្រព័ន្ធតេឡេក្រាម នៅថ្ងៃទី ២ កញ្ញានេះ។
ការចោទប្រកាន់នេះធ្វើឡើង ក្រោយពេល សមត្ថកិច្ចនៅរាជធានីភ្នំពេញ សមត្ថកិច្ចនៅខេត្តកំពត និង នៅខេត្តពោធិ៍សាត់ រកឃើញអាវុធចំនួន២៨ ដើម និងឃាត់ជនជាប់ចោទទាំងនោះ នៅទីតាំងទាំងបីផ្សេងគ្នានេះ។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន មានប្រសាសន៍ថា ពិតជាមានប្រតិបត្តិការនេះប្រាកដមែន ប៉ុន្តែលោកមិនអាចជម្រាបលម្អិតបានឡើយ ព្រោះសំណុំរឿងនេះស្ថិតនៅក្នុងការស៊ើបអង្កេត និងស្ថិតនៅក្នុងនីតិវិធីរបស់តុលាការ ។
លោកមានប្រសាសន៍ដូចនេះថា៖ « មិនទាន់ជូនបានទេអូន! បើតួលេខបងមិនហ៊ានផ្តល់ជូនថាប៉ុន្មាននាក់ផង។ ហើយឃើញព័ត៌មានខ្លះគាត់ចុះគាត់អី អាហ្នឹងគាត់ទទួលខុសត្រូវខ្លួនឯងចុះ។ បងមិនបានជូនតែប៉ុណ្ណឹងថា បងទទួលស្គាល់ថាមានប្រតិបត្តិការនេះមែន » ។
យ៉ាងនេះក្តី លោកឱ្យដឹងថា សំណុំរឿងនេះ កំពុងតែដំណើរការ ដើម្បីឈានទៅរកមេខ្លោងបន្តទៀត៕