ធនាគារជាតិកម្ពុជាបានអំពាវនាវឲ្យសាធារណជនមានការប្រុងប្រយ័ត្ន ចំពោះសេវាផ្តល់កម្ចីក្រៅផ្លូវការ ដែលកំពុងផ្សព្វផ្សាយទាក់ទាញអតិថិជនតាមរយៈផ្ញើសារលើបណ្តាញទូរសព្ទ។
តាមលិខិតរបស់ធនាគារជាតិចេញផ្សាយនៅថ្ងៃនេះ បានលើកឡើងថា នាពេលថ្មីៗនេះ មានការផ្ញើសារទាក់ទងក្នុងប្រព័ន្ធទូរសព្ទ ឃោសនាផ្តល់ប្រាក់កម្ចីរហ័យដោយមិនចាំបាច់មានឯកសារឬ ទ្រព្យធានា។
ធនាគារជាតិចាត់ទុកក្រុមទាំងនេះថា កំពុងតែធ្វើសកម្មភាពខុសច្បាប់ស្តីពីគ្រឹះស្ថានធនាគារ និងហិរញ្ញវត្ថុដោយថា ក្រុមហ៊ុនឬធនាគារទាំងនោះមិនបានទទួលសិទ្ធិអនុញ្ញាតពីធនាគារជាតិនោះទេ។
ធនាគាររំឭកឲ្យសាធារណជនប្រុងប្រយ័ត្នកុំឲ្យចាញ់បោកក្រុមចងការប្រាក់ទាំងនេះ ប៉ុន្តែធនាគារមិនបានបញ្ជាក់ថា តើការចាញ់បោកក្រោមរូបភាពយ៉ាងណាខ្លះនោះទេ។
