មន្ត្រីរដ្ឋាភិបាលឲ្យដឹងថា ក្នុងអំឡុងបុណ្យភ្ជុំបិណ្ឌខាងមុខនេះប្រជាពលរដ្ឋអាចធ្វើដំណើរតាមរថយន្តក្រុង និងរថភ្លើង ដែលរដ្ឋរៀបចំដោយឥតគិតថ្លៃពីភ្នំពេញនិងបណ្តាលខេត្តមួយចំនួន។
អ្នកនាំពាក្យក្រសួងសាធារណៈការលោក វ៉ា ស៊ឹមសូរិយា បានឲ្យVOD ដឹងថា ពលរដ្ឋអាចទៅពិនិត្យមើលថ្ងៃចេញ និងទទួលសេវារថភ្លើងឥតគិតថ្លៃសម្រាប់ការចេញដំណើរទៅកាន់ស្ថានីយប៉ោយប៉ែត និងខេត្តព្រះសីហនុបាន។
លោកថា៖ « រថភ្លើងមានកម្មវិធីមួយថ្ងៃទៅមួយថ្ងៃមកដែលបងប្អូនអាចទៅមើលកម្មវិធីនៅតាមស្ថានីយរថភ្លើងបាន » ។
មន្ត្រីទំនាក់ទំនងនៃស្ថានីយរថភ្លើងរាជធានីភ្នំពេញកញ្ញា សាល ស្រីនា បានឲ្យដឹងថាសេវារថភ្លើងឥតគិតថ្លៃនឹងចាប់ផ្ដើមពីថ្ងៃទី៦ ដល់ថ្ងៃទី១៥ សម្រាប់ការចេញដំណើរឆ្ពោះទៅកាន់ស្ថានីយក្រុងប៉ោយប៉ែត ហើយពីថ្ងៃទី៨ ដល់ថ្ងៃទី១០ សម្រាប់ការចេញដំណើរឆ្ពោះទៅស្ថានីយខេត្តព្រះសីហនុ។ កញ្ញា បញ្ជាក់ថា ការដឹកជញ្ជូនមិនយកលុយសម្រាប់មនុស្ស ប៉ុន្តែម៉ូតូ ឬ រថយន្តត្រូវគិតលុយ។
កញ្ញា សាល ស្រីនា៖ « សំបុត្រចំពោះការធ្វើដំណើរទៅខាងកំពង់សោមគឺត្រូវយកមុនមួយថ្ងៃ ដូចថាថ្ងៃ៨ត្រូវចេញដំណើរអញ្ចឹងគាត់អាចមកយកថ្ងៃ៧បាន ។ ចំពោះការធ្វើដំណើរភ្នំពេញ-ប៉ោយប៉ែត អាចមកយកសំបុត្រពីរថ្ងៃមុន » ។
ចំណែក សាលារាជធានីភ្នំពេញនៅពេលនេះកំពុងរៀបចំពិភាក្សាគ្នាពីការបញ្ចេញរថយន្តក្រុងសាធារណៈដើម្បីដឹកជញ្ជូនពលរដ្ឋទៅកាន់ខេត្តមួយចំនួនផងដែរ នេះបើតាមការបញ្ជាក់របស់អ្នកនាំពាក្យសាលារាជធានីភ្នំពេញលោក ម៉េត មាសភក្ដី។
ទោះជាយ៉ាងណា លោក ម៉េត មាសភក្ដី មិនទាន់អាចបញ្ជាក់បានទេថារថយន្តក្រុងប៉ុន្មានដែលនឹងដឹកជញ្ជូនពលរដ្ឋក្នុងអំឡុងពេលបុណ្យភ្ជុំនេះនោះទេ។
លោកថា៖ « យើងកំពុងតែគិតគូរហើយ ខ្ញុំជម្រាបជូនបានតែប៉ុណ្ណេះទេ យើងកំពុងគិតគូរលើកិច្ចការអស់នេះហើយចំពោះព័ត៌មានលម្អិតគឺខ្ញុំអត់អាចជម្រាបជូនបានទេ។ គឺថាឡានប៉ុន្មានគ្រឿង ទៅផ្លូវណាខ្លះ ទៅថ្ងៃណាថ្ងៃណីអី គឺខ្ញុំសុំបន្តិចទៀតទើបអាចជម្រាបជូនជាសាធារណៈ » ។
នាយកប្រតិបត្តិសម្ព័ន្ធគណនេយ្យភាពសង្គមលោក សន ជ័យ គាំទ្រចំពោះវិធានការរដ្ឋនេះ តែលោកលើកជាយោបល់ថាគួរតែផ្តល់ព័ត៌មានឲ្យបានច្រើនពីពេលវេលា និងទីតាំងដែលសេវាទាំងនោះផ្តល់ឲ្យពលរដ្ឋដើម្បីឲ្យពលរដ្ឋអាចប្រើប្រាស់សេវានេះបានទូលំទូលាយ។
លោកថា៖ « កុំឲ្យថាមានឡានហើយនៅតែពិបាករក ឬរកមិនឃើញ មិនអីអញ្ចឹងទៅ ហើយការផ្តល់ព័ត៌មានហ្នឹងវារាងដូចជា មិនគ្រប់ជ្រុងជ្រោយ។ អញ្ចឹងសួរថាមានអ្វីដែលនៅខ្វះរវាងមធ្យោបាយដែលជិះអត់អស់លុយ ហើយធ្វើឲ្យប្រជាពលរដ្ឋនៅតែបង្ខំចិត្តប្រើប្រាស់រថយន្តក្រុងឯកជនដែលមានតម្លៃថ្លៃស្រាប់ហ្នឹង » ។
លោកនាយករដ្ឋមន្ត្រីហ៊ុន សែន កាលពីដើមខែសីហាកន្លងទៅបានបញ្ជាឲ្យក្រសួងសាធារណការ ចរចាជាមួយក្រុមហ៊ុនរ៉ូយ៉ាល រ៉ែលវេ របស់លោក គិត ម៉េង ដើម្បីផ្ដល់សេវារថភ្លើងជូនពលរដ្ឋដោយឥតគិតថ្លៃក្នុងរដូវបុណ្យចូលឆ្នាំ និងភ្ជុំបិណ្ឌ បន្ថែមពីលើសេវារថយន្តក្រុងដោយដែលបានផ្ដល់ឲ្យពលរដ្ឋកន្លងមក។
ចាប់តាំងពីឆ្នាំ២០១៧ មករដ្ឋាភិបាលកម្ពុជាបានសម្រេចបញ្ចេញរថយន្តក្រុងសាធារណៈដើម្បីដឹកជញ្ជូនពលរដ្ឋទៅកាន់ខេត្តមួយចំនួនដោយឥតគិតថ្លៃរៀងរាល់រដូវបុណ្យចូលឆ្នាំ និងភ្ជុំបិណ្ឌ ដោយថាដើម្បីកុំឲ្យក្រុមហ៊ុនដឹកជញ្ជូនឯកជននៅតែបន្តដំឡើងថ្លៃក្នុងឱកាសនៃពិធីនេះ៕