មន្ត្រីមជ្ឈមណ្ឌលសិទ្ធិមនុស្សកម្ពុជា ហៅកាត់ថា CCHR មានក្តីរំពឹងថា របាយការណ៍របស់ខ្លួន អាចជាផ្នែកមួយធ្វើឱ្យរាជរដ្ឋាភិបាលពិចារណា ហើយកែប្រែផលប៉ះពាល់ផ្សេងៗ និងបញ្ហាសិទ្ធិមនុស្សនៅតំបន់សេដ្ឋកិច្ចពិសេសឱ្យកាន់តែប្រសើរឡើង។
អ្នកសម្របសម្រួលគម្រោងធុរកិច្ច និងសិទ្ធិមនុស្សរបស់មន្ត្រីមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា គោលបំណងដែលខាងមជ្ឈមណ្ឌលចេញរបាយការណ៍នេះ គឺជាសារមួយជូនទៅរាជរដ្ឋាភិបាល តួអង្គពាក់ព័ន្ធ និងក្រុមហ៊ុនសាជីវកម្មដែលទទួលខុសត្រូវនៅតំបន់សេដ្ឋកិច្ចពិសេសឱ្យពិចារណា និងកែប្រែនូវចំណុចខ្វះខាត ព្រមទាំងផលប៉ះពាល់ទាំងឡាយដែលកើតមានកន្លងមក។
លោកមានប្រសាសន៍ដូច្នេះថា៖ «យើងចេញរបាយការណ៍ សាលាកបត្រព័ត៌មានហ្នឹង គឺជាសារមួយ ដើម្បីឱ្យអង្គពាក់ព័ន្ធទាំងអស់ហ្នឹង កាត់បន្ថយបាទ ធ្វើម៉េចកាត់បន្ថយភាពអវិជ្ជមានហ្នឹង ដើម្បីធានាការអភិវឌ្ឍ ក៏ដូចជាការប្រតិបត្តិការតំបន់សេដ្ឋកិច្ចពិសេសហ្នឹង ប្រព្រឹត្តិទៅដោយរលូន និងដោយនិរន្តរភាព»។
កាលពីថ្ងៃទី១ តុលា មជ្ឈមណ្ឌលសិទ្ធិមនុស្សកម្ពុជា បានចេញសាលាកប័ត្រព័ត៌មាន ឬរបាយការណ៍មួយបង្ហាញថា តំបន់សេដ្ឋកិច្ចពិសេសបានរីកចម្រើនគួរឱ្យកត់សម្គាល់នៅកម្ពុជា និងនៅជុំវិញតំបន់។
របាយការណ៍បន្តថា ខណៈអត្ថប្រយោជន៍នៃតំបន់សេដ្ឋកិច្ចពិសេស បាននាំមកនូវលក្ខខណ្ឌក្នុងការអភិវឌ្ឍសេដ្ឋកិច្ច និងការធ្វើពាណិជ្ជកម្មក៏ពិតមែន ប៉ុន្តែ ក៏មានបញ្ហាសិទ្ធិមនុស្សដែលកើតមាននៅតំបន់សេដ្ឋកិច្ចពិសេស ដូចជា កង្វះតម្លាភាព និងការផ្សព្វផ្សាយជាសាធារណៈ រួមមានកង្វះព័ត៌មានស្តីពីការបង្កើតតំបន់នេះ និងទទួលបានព័ត៌មានអំពីស្ថានភាពតំបន់សេដ្ឋកិច្ចពិសេសដែលអាចធ្វើឲ្យមានការបណ្តេញចេញដោយបង្ខំ ដោយគ្មានសំណងត្រឹមត្រូវ និងយុត្តិធម៌ព្រោះគ្មានការពិគ្រោះយោបល់ជាមុន។
បន្ថែមពីនេះ ការប្រើប្រាស់កម្លាំងពលកម្មដែលមានប្រាក់ឈ្នួលទាប និងកង្វះបទប្បញ្ញត្តិទាក់ទងនឹងប្រាក់ឈ្នួលមុនពេលដែលច្បាប់ស្តីពីប្រាក់ឈ្នួលអប្បរមាត្រូវបានអនុម័តកាលពីខែកក្កដា ឆ្នាំ ២០១៨ បណ្តាលឱ្យមានការកេងប្រវ័ញ្ចកម្លាំងពលកម្មរបស់កម្មករ ការធ្វើការងារលើសម៉ោង និងទទួលបានប្រាក់ឈ្នួលតិចតួច។
របាយការណ៍នេះ រកឃើញទៀតថា មានការរឹតបន្តឹងធ្ងន់ធ្ងរលើសេរីភាពបញ្ចេញមតិ ជួបប្រជុំ និងសមាគម ខណៈដែលសមាជិកសហជីព និងសមាគមមួយចំនួន ត្រូវបានរារាំង និងមានការរំលោភបំពានសេរីភាព។ លើសពីនេះ សហជីពប្រឈមនឹងការរើសអើងយ៉ាងខ្លាំង ការបំភិតបំភ័យ និងជួនកាលមានទាំងអំពើហិង្សា ក៏ដូចជាការយាយីពីប្រព័ន្ធតុលាការផងដែរ។
វីអូឌី(VOD) មិនអាចសុំការឆ្លើយតបតាមទូរស័ព្ទពីសំណាក់អគ្គលេខាធិការក្រុមប្រឹក្សាអភិវឌ្ឍន៍កម្ពុជា លោក សុខ ចិន្តាសោភា និងអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បាននៅឡើយទេ នៅថ្ងៃនេះ។
កាលពីខែកញ្ញា ប្រធានសហភាពសហជីពកម្ពុជា លោក រ៉ុង ឈុន មានប្រសាសន៍ថា នៅតំបន់សេដ្ឋកិច្ចពិសេសក្តី ឬនៅតាមសហគ្រាសមិនមែនតំបន់សេដ្ឋកិច្ចពិសេសក្តី ការរំលោភសិទ្ធិការងារ ទៅលើកម្មករតែងកើតឡើង ពិសេសនៅពេលមិនមានវត្តមានសហជីពឯករាជ្យ ឬសហជីពដែលការពារប្រយោជន៍ជូនកម្មករពិតប្រាកដ។ មិនតែប៉ុណ្ណោះ លោកថា សហជីពដែលមិនចំណុះរដ្ឋាភិបាល ឬចំណុះនិយោជក ពិតជាពិបាកបំពេញការងារជូនកម្មករ និងរងការរើសអើងប្រាកដមែន។
មជ្ឈមណ្ឌលសិទ្ធិមនុស្សកម្ពុជា បានផ្តល់អនុសាសន៍ក្នុងសាលាកប័ត្រព័ត៌មាននោះថា ដើម្បីដោះស្រាយបញ្ហាទាំងនេះ រាជរដ្ឋាភិបាល គប្បីបដិសេធការអនុញ្ញាតឲ្យបង្កើតតំបន់សេដ្ឋកិច្ចពិសេស លុះត្រាតែអាជ្ញាធរបានអនុវត្តការវាយតម្លៃផលប៉ះពាល់បរិស្ថាន និងសង្គម និងការពិគ្រោះយោបល់ជាមួយប្រជាសហគមន៍មូលដ្ឋាន។
បន្ថែមពីនេះ របាយការណ៍នោះ បានជំរុញឲ្យធ្វើកំណែទម្រង់ច្បាប់គ្រប់គ្រងតំបន់សេដ្ឋកិច្ចពិសេស តាមរយៈការគោរពសិទ្ធិមនុស្ស និងធានាការអនុវត្តតាមច្បាប់ការងារ។
របាយការណ៍នេះ បានជំរុញទៅរដ្ឋាភិបាល ឲ្យធានាថា អនុក្រឹត្យដែលបានអនុម័តយល់ព្រមក្នុងការបង្កើតតំបន់សេដ្ឋកិច្ចពិសេស អាចស្វែងរកបានដោយសាធារណៈ និងធានាឲ្យមានសេរីភាពសមាគម និងសហជីពនៅក្នុងតំបន់សេដ្ឋកិច្ចពិសេស ដើម្បីបំពេញការងារជូនកម្មករ ឬសមាជិករបស់ពួកគេដោយគ្មានការរើសអើង និងគំរាមកំហែង។
គេហទំព័រអង្គការទិន្នន័យអំពីការអភិវឌ្ឍនៅកម្ពុជា បង្ហាញថា រដ្ឋាភិបាលបានផ្តួចផ្តើមបង្កើតតំបន់សេដ្ឋកិច្ចពិសេសតាំងពីឆ្នាំ២០០៥ ហើយគិតត្រឹមឆ្នាំ២០១៦ តំបន់សេដ្ឋកិច្ចពិសេសនៅប្រទេសកម្ពុជាមានចំនួន ៣៨កន្លែងនៅទូទាំងប្រទេស៕