លោកនាយករដ្ឋមន្ត្រី ហ៊ុន សែន បានប្រកាសលុបចោលការសិក្សាលើគម្រោងបំបែកខេត្តថ្មី ចំនួនពីរ ក្នុងភូមិសាស្ត្រ ខេត្តកណ្តាល ខេត្តរតនៈគិរី និងមណ្ឌលគិរី។
ការប្រកាសនេះ ធ្វើឡើងនៅព្រឹកថ្ងៃទី ៥ តុលា ក្នុងទិវាគ្រូបង្រៀនពិភពលោក នៅវិទ្យាស្ថានជាតិអប់រំ។ លោកនាយករដ្ឋមន្ត្រីហ៊ុន សែន បានប្រកាសឱ្យទីស្តីការគណៈរដ្ឋមន្ត្រី ចេញសេចក្តីជូនដំណឹងថ្មីថ្ងៃនេះ ឱ្យបញ្ឈប់ការសិក្សាអំពីគម្រោងបំបែកខេត្តថ្មីដែលស្នើឡើងដោយក្រសួងមហាផ្ទៃ កាលពីពេលកន្លងមក។ លោក បញ្ជាក់ថា មិនបាច់យកលេសបង្ខិតសេវាឱ្យកៀកពលរដ្ឋ មកធ្វើជាកម្មវត្ថុដើម្បីបែងចែកខេត្តថ្មីនោះទេ។ លោកថា សំណើរបំបែកខេត្តថ្មីនេះ ធ្វើឱ្យពេលមានការរត់ការជាបន្តបន្ទាប់ដើម្បីបានតំណែងអភិបាល អភិបាលរងខេត្តថ្មី ដែលធ្វើឱ្យលោកមិនសប្បាយចិត្ត។
លោកមានប្រសាសន៍ថា ៖ «ដាក់ដំបូងដាក់អីចឹងតែម្តងថា ប្រញាប់ងាប់ទៅណា?សញ្ញាសួរ។ ឯងមិនទាន់នឹងធ្វើស្អីផង សម្រេចបង្កើតឬមិនបង្កើតផង វាចែកគ្នាធ្វើចៅហ្វាយខេត្ត ធ្វើអនុខេត្តទៅហើយ។ ឥលូវនេះរាលដាលដល់ស្ថាប័ន ព្រោះបើត្រូវធ្វើគឺ ធ្វើមុនបោះឆ្នោតក្រុមប្រឹក្សា។រាលដាលដល់ស្ថាប័នហើយ អីចឹងបើចែកចេញជាពីរ ត្រូវលោកឯងអនុត្រូវធ្វើប្រធានអនុ។ អនុខេត្តនេះ ត្រូវឡើងទៅធ្វើចៅហ្វាយខេត្តនេះ ឥលូវឈប់នៅឱ្យស្ងៀម បានហើយ។ មហាផ្ទៃបិទកុំព្យូទ័រចោលទាំងអស់ថ្ងៃនេះកុំធ្វើអីឱ្យសោះ ខ្ញុំគ្មានពេលស៊ីញ៉ែគ្មានពេលអីទៀតទេ។រួចហើយមន្ត្រីទីស្តីការគណៈរដ្ឋមន្ត្រី យកសេចក្តីប្រកាសរបស់ខ្ញុំ ចេញស.ជ.ណ មួយបញ្ចប់តែម្តងទៅ »។
លោកនាយករដ្ឋមន្ត្រី បន្ថែមថាមានមន្ត្រីខិលខូចមួយចំនួនដែលបានរត់ការផ្គូរផ្គងតំណែងអភិបាល អភិបាលរងខេត្ត និងតំណែងស្ថាប័នផ្សេងទៀត និងឱ្យមន្ត្រីដែលមានខ្លួនទាំងឡាយទៅទារប្រាក់ត្រឡប់មកវិញ។
លោក ហ៊ុន សែន ថ្លែងមិនបានប៉ុន្មានម៉ោងផង ទីស្តីការគណៈរដ្ឋមន្ត្រី បានចេញលិខិតមួយ ភ្លាមៗ ជូនទៅរដ្ឋមន្ត្រីក្រសួងមហាផ្ទៃ លោក ស ខេង ដោយបញ្ជាក់ថារាជរដ្ឋាភិបាលសម្រេចបញ្ឈប់ការសិក្សាស្រាវជ្រាវពីគម្រោងបង្កើតខេត្តពីរជាផ្លូវការចាប់ពីថ្ងៃទី ៥តុលាតទៅ។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ សាទរចំពោះការសម្រេចនេះ ព្រោះលោកយល់ថាការបង្កើតខេត្តថ្មីបន្ថែមទៀត ពុំមែនជាជម្រើសល្អ និងពុំទាន់ចាំបាច់នៅឡើយទេ។ លោកថា ដើម្បីឱ្យសេវាបម្រើជូនពលរដ្ឋបានមានប្រសិទ្ធភាព គឺ រាជរដ្ឋាភិបាលគប្បី ពង្រឹងរដ្ឋបាលថ្នាក់ក្រោមជាតិដែលមានស្រាប់ឱ្យបានខ្លាំង ពិសេសរដ្ឋបាលថ្នាក់ឃុំ និងស្រុក ដែលនៅកៀកប្រជាពលរដ្ឋ តាមរយៈការបញ្ជូនធនធានមនុស្ស និងថវិកា ឱ្យចំគោលដៅ និងប្រើប្រាស់ឱ្យមានប្រសិទ្ធភាព។ ចំណែកសកម្មភាពរត់ការណាមួយដើម្បីបានតំណែងឬ បានអំណាចសម្រាប់ការបង្កើតខេត្តថ្មីនោះ លោកថាជាទម្រង់នៃការប្រព្រឹត្តអំពើពុករលួយ ហើយប្រសិនបើរកឃើញថាពួកគេមានជាប់ពាក់ព័ន្ធសកម្មភាពបែបនេះ មន្ត្រីទាំងនោះត្រូវប្រឈមមុខចំពោះផ្លូវច្បាប់។
លោកមានប្រសាសន៍បន្ថែមថា៖ «សព្វថ្ងៃនេះ រដ្ឋបាលពីរកម្រិតហ្នឹងនៅខ្វះធនធានហរិញ្ញវត្ថុ និងធនធានមនុស្ស ដែលមានឆន្ទះក្នុងបម្រើប្រជាពលរដ្ឋ។ អីចឹងកាលណារដ្ឋបាលស្រុក និងឃុំ ខ្លាំងហើយ ការទំនាក់ទំនង ជាមួយខេត្តក៏មានការឆាប់រហ័សដែរ។ អីចឹងយើងគ្មានហេតុផលណា ដែលយើងមើលឃើញថាទាល់តែយកខេត្តទៅដាក់តំបន់នោះទើបសកម្មទេ។ បើវាអសកម្ម សូម្បីយកខេត្តហ្នឹងបំបែកឱ្យបានច្រើនយកទៅដាក់ នៅភូមិប្រជាពលរដ្ឋក៏អសកម្មដែរ។ »
កាលពីខែសីហា ក្រសួងមហាផ្ទៃ បានស្នើទៅលោកនាយករដ្ឋមន្ត្រី ហ៊ុន សែន ដើម្បីសិក្សាបង្កើតខេត្តថ្មីចំនួនពីរបន្ថែមទៀតក្នុងភូមិសាស្ត្រខេត្តកណ្តាល និង ភូមិសាស្ត្រខេត្តមណ្ឌលគិរី និងរតនគិរី។ សំណើរសុំបង្កើតខេត្តថ្មីនេះ ក្រោមហេតុផលដើម្បីជួយលើកម្ពស់ប្រសិទ្ធិភាពគ្រប់គ្រងរដ្ឋបាលថ្នាក់ក្រោមជាតិ ថែរក្សាសន្តិសុខ សណ្តាប់ធ្នាប់សាធារណៈ ជំរុញការអភិវឌ្ឍនៅមូលដ្ឋាន និងងាយស្រួលផ្តល់សេវាសាធារណៈជូនប្រជាពលរដ្ឋជាដើម។ យ៉ាងណាក្តី សំណើរនេះ ក៏ត្រូវលោក ហ៊ុន សែន បានចុះហត្ថលេខាយល់ព្រមផងដែរកាលពីពេលនោះ៕
