ប្រទេសជប៉ុនផ្ដល់ជំនួយជាង៤០ម៉ឺនដុល្លារដល់អង្គភាពកម្ចាត់មីនកម្ពុជាហៅកាត់ថា ស៊ីម៉ាក់ ដើម្បីសម្អាតមីនក្នុងស្រុកចំនួន២ក្នុងខេត្តបន្ទាយមានជ័យ រហូតដល់ខែតុលា ឆ្នាំ២០១៩។
អគ្គនាយកស៊ីម៉ាក់លោក ហេង រតនា បានសរសេរនៅលើទំព័រហ្វេសបុករបស់លោកកាលពីម្សិលមិញថា រដ្ឋាភិបាលជប៉ុនតាមរយៈអង្គការJMAS របស់ជប៉ុនបានសម្រេចចុះហត្ថលេខាផ្ដល់ជំនួយជាថវិកាចំនួនប្រមាណ៤២ម៉ឺនដុល្លារអាមេរិកសម្រាប់បោសសំអាតចម្ការមីនជាង៣០០ហិតា ស្ថិតនៅស្រុកម៉ាឡៃ និងស្រុកអូរជ្រៅ ខេត្តបន្ទាយមានជ័យ ចាប់ពីខែតុលាឆ្នាំ២០១៨នេះ ដល់ខែតុលា ឆ្នាំ២០១៩។
លោក ហេង រតនា ក៏បានបញ្ជាក់បន្ថែមផងដែរថា គម្រោងនេះក៏បានគាំទ្រអ្នករងគ្រោះដោយសារមីន តាមរយៈការអភិវឌ្ឍន៍ក្នុងមូលដ្ឋាននៃតំបន់បោសសំអាតមីនរួចផងដែរ។
យោងតាមរបាយការណ៍របស់អាជ្ញាធរមីនកម្ពុជា រហូតដល់ឆ្នាំ២០១៧ គ្រាប់មីន និងគ្រាប់មិនទាន់ផ្ទុះបានធ្វើឲ្យមនុស្សស្លាប់ និងរបួសចំនួន៦៤ ៧២០នាក់ ក្នុងនោះស្លាប់១៩ ៧៥៨នាក់ របួស ៣៥ ៩៤១នាក់ និងពិការចំនួន ៩ ០២១នាក់។ ក្នុងចំណោមអ្នកស្លាប់ និងរបួសទាំងនោះចំនួន ៨១ភាគរយជាបុរស ១១ភាគរយជាកុមារ និង៨ភាគរយជាស្ត្រី៕
