ក្រសួងការងារ នៅរសៀលថ្ងៃសុក្រ ទី០៥ ខែតុលា ឆ្នាំ២០១៨ បានសម្រេចដំឡើងប្រាក់ឈ្នួលកម្មករកាត់ដេរចំនួន១២ដុល្លារបន្ថែម សម្រាប់ឆ្នាំ២០១៩ លើប្រាក់ឈ្នួលគោលចំនួន១៧០ដុល្លារ។
ការសម្រេចនេះ ធ្វើឡើងបន្ទាប់ពីក្រុមការងារត្រីភាគី មានតំណាងសហជីព តំណាងថៅកែរោងចក្រ និងតំណាងរដ្ឋាភិបាល បានកំណត់តួលេខ២ប្រភេទផ្សេងគ្នា កាលពីម្សិលមិញ ។
តួលេខសម្រាប់ពិភាក្សានៅថ្ងៃនេះ គឺ១៨២ដុល្លារ ស្នើដោយក្រុមសហជីព និង១៧៧ដុល្លារ បានស្នើដោយរដ្ឋាភិបាលកម្ពុជា និងភាគីនិយោជក។
ក្នុងសេចក្តីប្រកាសចុះថ្ងៃទី៥ ខែតុលា ក្រសួងការងារបានសម្រេចបន្ថែមទឹកប្រាក់ចំនួន៥ដុល្លារ លើទឹកប្រាក់ចំនួន១៧៧ដុល្លារ ដែលបានជ្រើសរើសជាប្រាក់ឈ្នួលអប្បបរមាសម្រាប់កម្មករនិយោជិតក្នុងមួយខែសម្រាប់ឆ្នាំ២០១៩ខាងមុខ។
ប្រាក់ឈ្នួលអប្បបរមា កម្មករ និយោជិតផ្នែកវាយនភ័ណកាត់ដេរ សម្លៀកបំពាក់ និងផលិតស្បែកជើង បានកើនឡើងពី១២៧ដុល្លារ ដល់១៤០ដុល្លារនៅឆ្នាំ២០១៦ ហើយបានកើនដល់១៧០ដុល្លារ ក្នុងឆ្នាំ២០១៨នេះ បន្ទាប់ពីមានបាតុកម្មកាលពីឆ្នាំ២០១៤៕
លោក អ៊ិត សំហេង ផ្ដល់បទសម្ភាសន៍ដល់អ្នកសារព័ត៌មានក្រោយពីការសម្រេចលើប្រាក់ឈ្នួលកម្មករ នៅថ្ងៃទី០៥ ខែតុលា ឆ្នាំ២០១៨ នេះ (រូបភាព៖ CLC)