កម្ពុជាបានផ្តល់សញ្ជាតិខ្មែរឲ្យជនបរទេសជាង១០០នាក់ ក្នុងចន្លោះពេល៩ខែឆ្នាំ២០១៨នេះ ក្នុងនោះមានជនជាតិចិនជិត៧០នាក់។
យោងតាមសៀវភៅរាជកិច្ចឆ្នាំទី១៨ រាប់ពីលេខ១នៃត្រីមាសទី១ ដល់ លេខ៦៦នៃត្រីមាសទី៣ ឆ្នាំ២០១៨គឺ កម្ពុជាបានផ្តល់សញ្ជាតិខ្មែរឲ្យជនជាតិចិនច្រើនជាងគេ គឺមានចំនួន៦៥នាក់។
សៀវភៅរាជកិច្ចដែលចេញផ្សាយក្នុងអំឡុងពេលដដែលឲ្យដឹងទៀតថាក្នុងចំណោមជនបរទេសដែលទទួលបានសញ្ជាតិខ្មែរច្រើនបន្ទាប់ពីជនជាតិចិន មានជនជាតិវៀតណាម១២នាក់ ថៃ៦នាក់ និងភូមា៥នាក់។
សូមបញ្ជាក់ថាក្នុងចំណោមសៀវភៅរាជកិច្ច៦៦លេខ(៦៦ក្បាល)ដែលVODស្រង់ចំនួនបរទេសទទួលញ្ជាតិខ្មែរនេះ មិនទាន់បានរាប់បញ្ចូលសៀវភៅរាជកិច្ចលេខ៥០និង៦១ទេ។
VODមិនអាចសុំការបញ្ជាក់តួលេខចុងក្រោយនៃចំនួនជនបរទេសទទួលសញ្ជាតិខ្មែរនៅឡើយទេ ដោយសារប្រធាននាយកដ្ឋានសញ្ជាតិនៃអគ្គនាយកដ្ឋានអត្តសញ្ញាណកម្មក្រសួងមហាផ្ទៃ លោក ហ៊ូ ណាវុធ ទទួលទូរសព្ទហើយប្រាប់ថា ជាប់រវល់។