អង្ករប្រណិតរបស់កម្ពុជាត្រូវបានសន្នីសីទអង្ករពិភពលោកចាត់ថ្នាក់ជាអង្ករល្អជាងគេបំផុតក្នុងឆ្នាំ២០១៨នេះ។
អគ្គលេខាធិការសហព័ន្ធស្រូវអង្ករកម្ពុជាលោក មូល សារិទ្ធី បានឲ្យVOD ដឹងថាអង្ករក្រអូបប្រណិតកម្ពុជាត្រូវបានសន្នីសិទ អង្ករពិភពលោក The Rice Trader ជ្រើសរើសជាអង្ករល្អផ្ដាច់គេជាចំណាត់ថ្នាក់លេខ១ក្នុងចំណោមអង្ករ៣៦ប្រភេទទៀតដែលប្រទេសផ្សេងៗយកមកប្រកួតប្រជែងលើកទី១០នៅប្រទេសវៀតណាម។
លោកថា៖ « មានច្រើនប្រទេសតែគណៈកម្មការអត់បានប្រាប់ទេ តែក្នុងនោះយើងឃើញស្រាប់ហើយមាន ប្រទេសថៃ ប៉ាគីស្ថាន វៀតណាម និងប្រទេសជាច្រើនទៀតដែលបានចូលរួមហ្នឹងគឺមានជាង១០ប្រទេស និង៣៦សំណាក » ។
លោកមានជំនឿថាចំណាត់ថ្នាក់នេះនឹងធ្វើឲ្យអង្ករកម្ពុជាកាន់តែធ្វើឲ្យពិភពលោកទទួលស្គាល់បន្ថែមទៀត ដែលនឹងជម្រុញឲ្យមានការនាំចេញអង្ករទៅកាន់ពិភពលោកកាន់តែកើនឡើង។
បើតាម The Rice Trader អង្ករកម្ពុជាធ្លាប់ទទួលបានចំណាត់ថ្នាក់លេខ១ចំនួន៣ឆ្នាំជាប់គ្នាគឺនៅឆ្នាំ២០១២ ២០១៣ និង២០១៤ ខណៈឆ្នាំ២០១៧ចំណាត់អង្ករល្អបំផុតនៅលើពិភពលោកបានទៅលើប្រទេសថៃ៕