គ្រោះអគ្គីភ័យ បានកើតឡើងចំនួន១៨លើកក្នុងអំឡុងពេលកាន់បិណ្ឌនិងភ្ជុំបិណ្ឌរយៈពេល១៥ថ្ងៃកន្លងទៅនេះដែលបានបណ្តាលឲ្យមនុស្សម្នាក់ស្លាប់ និង៦នាក់ទៀតរងរបួស។ នេះបើតាមរបាយការណ៍របស់នាយកដ្ឋាននគរបាលបង្ការ ពន្លត់អគ្គីភ័យ និងសង្គ្រោះ នៃអគ្គស្នងការនគរបាលជាតិដែលចេញផ្សាយកាលពីម្សិលមិញ។
ប្រភពដដែលក៏បានឲ្យដឹងដែរថា អគ្គិភ័យទាំង១៨ករណីនេះ ក៏បានធ្វើឲ្យខូចខាតផ្ទះចំនួន១២ខ្នង រថយន្តចំនួន២គ្រឿង ឡចំហុយរបស់រោងចក្រ១ និងកុដិព្រះសង្ឃចំនួន៣ខ្នងផងដែរ។
តាមរបាយការណ៍របស់នាយកដ្ឋាននគរបាលបង្ការ ពន្លត់អគ្គីភ័យ និងសង្គ្រោះ អគ្គីភ័យទាំង១៨ករណីនេះបណ្តាលមកពីមូលហេតុផ្សេងៗដូចជាឆ្លងចរន្តអគ្គិសនី១០លើក ភ្លើងទៀនធូប៥លើក មនុស្សដុត១លើក ចង្រ្កានហ្គាស១លើក និងពុំដឹងមូលហេតុ១ករណី៕
