មន្ត្រីកងរាជអាវុធហត្ថម្នាក់បានបាញ់រះជាង១០គ្រាប់នៅក្នុងខណ្ឌឫស្សីកែវ រាជធានីភ្នំពេញកាលពីយប់រំលងអធ្រាត្រឈានចូលថ្ងៃសុក្រនេះ បណ្តាលឲ្យប្រជាការពារ ឬ ហៅថា សន្តិសុខភូមិម្នាក់រងរបួស។
តាមការចុះផ្សាយរបស់អគ្គស្នងការដ្ឋាននគរបាលជាតិបានឲ្យដឹងថា នៅម៉ោង០០ និង ៣០នាទី ក្រុមប្រជាការពារ និងនគរបាលខណ្ឌឫស្សីកែវ បានធ្វើសកម្មភាពបង្ក្រាបក្រុមក្មេងទំនើង ពេលនោះមានបុរសម្នាក់ស្លៀកពាក់ស៊ីវិល ស្នាក់នៅក្បែរកន្លែងកើតហេតុ បានប្រើប្រាស់កាំភ្លើងខ្លីបាញ់រះ១០គ្រាប់ បណ្តាលឲ្យសន្តិសុខភូមិម្នាក់រងរបួសជើង។
ក្រោយកើតហេតុនគរបាលខណ្ឌឫស្សីកែវ បានឃាត់ខ្លួនបុរសនោះយកទៅសួរនាំទើបដឹងថា បុរសនោះឈ្មោះ ឡាយ អ៊ីងឃីង អាយុ២៧ឆ្នាំ ជាមន្ត្រីកងរាជអាវុធហត្ថលើផ្ទៃប្រទេស។ អគ្គស្នងការដ្ឋាននគរបាលជាតិមិនបានបញ្ជាក់មូលហេតុនៃការបាញ់រះនេះទេ។