រដ្ឋាភិបាលកម្ពុជាស្នើដល់ប្រទេសវៀតណាមឲ្យរក្សាតម្លៃ និងបន្តទិញផលិតផលកសិកម្មកម្ពុជាបន្តទៀត ជាពិសេសបង្កើនតម្លៃកៅស៊ូដែលបានទិញពីកម្ពុជាផងដែរ។
នៅលើទំព័រហ្វេសប៊ុករបស់រដ្ឋមន្ត្រីក្រសួងកសិកម្មលោក វេង សាខុន បានឲ្យដឹងថា នៅថ្ងៃនេះប្រតិភូកសិកម្មកម្ពុជា បានជួបជាមួយមួយប្រតិភូកសិកម្មវៀតណាមដែលដឹកនាំដោយរដ្ឋមន្ត្រីក្រសួងកសិកម្មវៀតណាមលោក ង្វៀន សួនគឿង។
![](https://www.vodkhmer.news/wp-content/uploads/10-17.jpg)
ក្នុងជំនួបនោះរដ្ឋមន្ត្រីកសិកម្មកម្ពុជាបានលើកឡើងថា ថ្មីៗនេះកសិករកម្ពុជាមានភាពសប្បាយរីករាយចំពោះតម្លៃស្វាយចន្ទី និងដំឡូងមី ដែលវៀតណាមបានទទួលទិញ ដោយលោកសង្ឃឹមថាវៀតណាមនឹងបន្តរក្សាបាននូវតុល្យភាពតម្លៃ និងបរិមាណនៃការប្រមូលទិញកសិផលពីកម្ពុជានៅដដែល ខណៈលោកស្នើឲ្យភាគីវៀតណាមជួយពិនិត្យលទ្ធភាពក្នុងការបង្កើនតម្លៃកៅស៊ូ ដែលប្រមូលទិញពីកម្ពុជា ដើម្បីសម្រួលដល់ជីវភាពកសិករកម្ពុជាផងដែរ។
បើតាមលោក វេង សាខុន ភាគីវៀតណាមបានយល់ព្រមតាមសំណើទាំងនេះនឹងសន្យាសហការជាមួយវិស័យឯកជនវៀតណាមក្នុងការពិនិត្យមើលពីលទ្ធភាពសម្របសម្រួលតម្លៃកសិកម្មទាំងនេះដែរ។
ទិន្នន័យរបស់អគ្គនាយកដ្ឋានកៅស៊ូក្រសួងកសិកម្មបានឲ្យដឹងថាតម្លៃកៅស៊ូជ័រកក បច្ចុប្បន្នមានតម្លៃចន្លោះពី ១ ៨០០ ដល់ ២ ១០០រៀលក្នុងមួយគីឡូ។
អ្នកដាំកៅស៊ូម្នាក់នៅឃុំជាំក្រវៀន ស្រុកមេមត់ ខេត្តត្បូងឃ្មុំ លោក កាន ឈាន មានប្រសាសន៍ថាតម្លៃនេះមានការធ្លាក់ចុះច្រើនបើធៀបនឹងឆ្នាំ២០១៥ ដែលកាលណោះលោកអាចលក់បានពី៣ពាន់រៀល ដល់៤ពាន់រៀលក្នុងមួយគីឡូ។ លោកបន្តថាការធ្លាក់ចុះតម្លៃកៅស៊ូនេះបានធ្វើឲ្យគ្រួសារលោកបាត់បង់ចំណូលជាងពាក់កណ្ដាល ដែលលោកត្រូវធ្វើការបន្ថែមទៀតដើម្បីទ្រទ្រង់ជីវភាពគ្រួសារ ក៏ដូចជាសងបំណុលធនាគារ។
លោកគាំទ្រចំពោះការលើកឡើងរបស់រដ្ឋាភិបាលកម្ពុជា តែលោកសំណូមពររដ្ឋាភិបាលគួរជួយរកទីផ្សារបន្ថែមដល់កសិករផង ជាជាងមានតែទីផ្សារវៀតណាមតែមួយនោះ។
លោកថា៖ « ថ្ងៃណាដែលគាត់ទិញបានច្រើនគឺគាត់ទម្លាក់ថ្លៃបន្តិចទៅ! ថ្ងៃណាដែលគាត់ទិញមិនបានហ្នឹងគឺគាត់ឲ្យយើងឡើងមួយកាក់ពីរកាក់ទៅតាមអ្វីដែលគាត់ត្រូវការឲ្យគ្រប់ចំនួនរបស់គាត់។ អាហ្នឹងជាបញ្ហាដែលខ្ញុំមើលឃើញថាទីផ្សារវាមានតែមួយស្រេចតែហ្នឹងគេថានោះណា។ ប្រសិនជាប្រមុខរាជរដ្ឋាភិបាលលោកជួយខ្នះខ្នែងឲ្យមានរោងចក្រនៅក្នុងស្រុក មានរោងចក្រកែច្នៃមានរោងចក្រនាំចេញអី នេះវាជាការមួយដែលប្រសើរបំផុតសម្រាប់ប្រជាពលរដ្ឋ។ នេះជាការសំណូមពររបស់ខ្ញុំ គឺខ្ញុំចង់ឲ្យមានទីផ្សារឲ្យច្រើនបន្តិចកុំចាំតែទីផ្សារវៀតណាមតែមួយ » ។
អគ្គលេខាធិការរងសម្ព័ន្ធសហគមន៍កសិករកម្ពុជា លោក ម៉ឺន រតនា យល់ការការស្នើឡើងតែម្យ៉ាងរបស់រដ្ឋាភិបាលមិនអាចធ្វើឲ្យវៀតណាមយល់ស្របតាមនោះទេ ដរាបណាផលិតទាំងនោះនៅតែពឹងផ្អែកលើការទិញយ៉ាងច្រើនពីវៀតណាមតែមួយនោះ។ លោកបន្ថែមថាមានតែខិតខំបង្កើតរោងចក្រ និងទីផ្សារឲ្យបានច្រើនប៉ុណ្ណោះទើបអាចធ្វើឲ្យជីវភាពពលរដ្ឋល្អប្រសើរបាន។
លោកថា៖ « នៅពេលដែលកសិករប្រមូលផលបាន ទោះបីជាមានកិច្ចសន្យារវាងរដ្ឋាភិបាលកម្ពុជាជាមួយរដ្ឋាភិបាលវៀតណាម តែជាក់ស្ដែងវាអត់បានអ្វីដូចជាកិច្ចសន្យានោះទេ។ យកល្អយើងគួរតែរកប្រទេសណាផ្សេងទៀតដែលទាក់ទងនឹងផលិតផលដំឡូង ឬក៏កៅស៊ូ វាជាជាងទៅពឹងផ្អែកលើប្រទេសវៀតណាមតែមួយ » ។
ក្នុងរបាយការណ៍ការងារកសិកម្មប្រចាំឆ្នាំ២០១៧ កម្ពុជានាំចេញដំឡូងមីជិត៤លានតោន ស្វាយចន្ទីជាង ៧ម៉ឺនតោន និងកៅស៊ូជាង ១៨ម៉ឺនតោន ទៅក្រៅប្រទេស។ ប្រទេសដែលទទួលទិញផលិតទាំងនេះច្រើនជាងគេពីកម្ពុជាមានវៀតណាម ចិន ថៃ ម៉ាឡេស៊ី និងសិង្ហបុរី៕