មេដឹកនាំថ្មីនៃប្រទេសស៊ីរ៉ា ឡេអូន ជាប្រទេសក្រីក្រនៅទ្វីបអាហ្រ្វិកបានសម្រេចលុបចោលកម្ចី ៤០០លានដុល្លារពីចិន ដែលទឹកប្រាក់នេះជាការស្នើខ្ចីពីមេដឹកនាំមុន។
ប្រធានាធិបតីថ្មីរបស់ប្រទេស ស៊ីរ៉ា ឡេអូន លោក Julius Maada Bio ដែលទើបឈ្នះការបោះ ឆ្នោតហើយឡើងកាន់តំណែងកាលពីខែមេសាឆ្នាំ២០១៨នេះ បានប្រកាសលុបចោលកម្ចី របស់ចិន។
កម្ចី៤០០លានដុល្លារនេះ គឺខ្ចីដោយប្រធានាធិបតីមុនឈ្មោះ លោកErnest Bai Koroma ក្នុង គោលបំណងយកទៅសាងសង់ ព្រលានយន្តហោះអន្តរជាតិមួយទៀតនៅក្រៅរដ្ឋធានី។
ក្រោយពេលដែលដាក់ពាក្យខ្ចីនេះ ធនាគារពិភពលោក និង មូលនិធិរូបិយប័ណ្ណអន្តរជាតិបាន ព្រមានថា ប្រទេសនេះអាចនឹងជួបវិបត្តិបំណុលធ្ងន់ធ្ងរ។
ប្រធានាធិបតីថ្មីដែលប្រកាសលុបចោលកម្ចីនេះ បញ្ជាក់ថា ប្រទេសរបស់លោកមិនទាន់ ត្រូវការចាំបាច់ព្រលានយន្តហោះថ្មីបន្ថែមទៀតនោះទេ គឺមានតែព្រលានយន្តហោះ អន្តរជាតិ មួយនៅក្នុងរដ្ឋធានីគ្រប់គ្រាន់ហើយ។
របាយការណ៍ដែល BBC ចុះផ្សាយបង្ហាញថា ចិនជាម្ចាស់បំណុលធំជាងគេនៅបណ្តាប្រទេស អាហ្រ្វិក ហើយថា ចិនកំពុងប្រើប្រាស់បំណុលដើម្បីគ្រប់គ្រងប្រទេសទាំងនោះ។
ទោះយ៉ាងណាបេសកជនចិនប្រចាំនៅអាហ្រ្វិកលោកស្រី Xu Jinghuច្រានចោល ការចោទ ប្រកាន់ទាំងនោះ ហើយថា បញ្ហានៅអាហ្វ្រិកដោយសារតែអំពើពុករលួយ។លោកស្រីថា បច្ចុប្បន្ន ប្រទេសទាំងនោះកំពុងតែស្វាគមន៍កម្ចីរបស់ចិនដើម្បីយកទៅកសាង ផ្លូវជាតិ កំពង់ផែ ផ្លូវដែក និងប្រើប្រាស់ក្នុងគម្រោងផ្សេងៗទៀត។