លោកនាយករដ្ឋមន្ត្រី ហ៊ុន សែន បញ្ជាក់ថា កម្ពុជាតែងតែមានបំណងលើកកម្ពស់ទំនាក់ទំនង ទ្វេភាគី និងធ្វើឲ្យកាន់តែស៊ីជម្រៅនូវកិច្ចសហប្រតិបត្តិការលើគ្រប់វិស័យទាំងអស់ជាមួយ សហរដ្ឋអាមេរិក ដោយឈរលើមូលដ្ឋានប្រយោជន៍រួម និងការគោរពគ្នាទៅវិញទៅមក។
យោងតាមលិខិរបស់លោកហ៊ុន សែន កាលពីម្សិលមិញផ្ញើទៅសមាជិកព្រឹទ្ធសភា អាមេរិក ២រូប បញ្ជាក់ពីការរុករកអដ្ឋធាតុឈ្លើយសឹកនិងទាហានអាមេរិក។
លិខិត៖«ខ្ញុំមានសេចក្តីរីករាយដោយបានទទួលលិខិតរួមគ្នារបស់ឯកឧត្តម សម្តែងនូវការ ពេញចិត្តចំពោះវឌ្ឍនភាព សេដ្ឋកិច្ច–សង្គម និងលទ្ធិប្រជាធិបតេយ្យនៅកម្ពុជាសព្វថ្ងៃ និង សេចក្តីប្រាថ្នារបស់ឯកឧត្តម ដែលចង់បន្តឡើងវិញនូវកម្មវិធីរុករកអដ្ឋធាតុឈ្លើយសឹក និង ទាហានអាមេរិកដែលបានបាត់ខ្លួនក្នុងសង្គ្រាមនៅក្នុងប្រទេសកម្ពុជា។»
លោកនាយករដ្ឋមន្ត្រីបានបញ្ជាក់ថា ឆ្លើយតបនឹងសំណើរបស់សមាជិកព្រឹទ្ធសភាទាំងពីរ និង អង្គការពាក់ព័ន្ធដទៃទៀតរបស់អាមេរិក រដ្ឋាភិបាលកម្ពុជាព្រមអនុញ្ញាតឲ្យ មានការរុករកអដ្ឋ ធាតុឡើងវិញ បើទោះបីជាអាមេរិកនៅតែរឹតត្បិតទិដ្ឋការលើមន្ត្រីកម្ពុជាក៏ដោយ។
លិខិតនោះលោកក៏បានបញ្ជាក់ដែរថា លោកតែងតែមានបំណងលើកកម្ពស់ទំនាក់ ទំនង ទ្វេភាគីជាមួយអាមេរិក។
លិខិត៖«ជាការពិតយើងតែងតែចង់លើកកម្ពស់ទំនាក់ទំនងទ្វេភាគីនិងធ្វើឲ្យកាន់តែស៊ីជម្រៅនូវកិច្ចសហប្រតិបត្តិការលើគ្រប់វិស័យទាំងអស់ជាមួយសហរដ្ឋអាមេរិក ដោយឈរ លើមូលដ្ឋានផលប្រយោជន៍រួម និងគោរពគ្នាទៅវិញទៅមក។»
កម្ពុជាបានផ្អាកសកម្មភាពអាមេរិកមិនឲ្យរុករកអដ្ឋធាតុទាហានរបស់ពួកគេក្រោយពេលដែលអាមេរិកប្រកាសហាមអ្នកការទូតកម្ពុជាមួយចំនួនមិនឲ្យចូលទឹកដីអាមេរិក។ មូលហេតុដែលអាមេរិកហាមអ្នកការទូតកម្ពុជា បន្ទាប់ពីកម្ពុជាស្នើឲ្យអាមេរិកពិចារណា ផ្អាក ការបញ្ជូនពលរដ្ឋខ្មែរមកកម្ពុជាវិញចំពោះអ្នកដែលបានប្រព្រឹត្តបទល្មើសនិងដាក់ទោសហើយ ។