រដ្ឋាភិបាលកម្ពុជា ប្ដេជ្ញាថានឹងកាត់បន្ថយភាពអត់ឃ្លានរបស់ប្រជាពលរដ្ឋឲ្យអស់នៅឆ្នាំ២០៣០។
កាលពីឆ្នាំ២០១៥កន្លងទៅរដ្ឋាភិបាលកម្ពុជា និងអង្គការសហប្រជាជាតិបានបញ្ជាក់ថា នៅឆ្នាំ២០២៥ខាងមុខកម្ពុជានឹងធ្វើឲ្យសម្រេចបាននូវការកាត់បន្ថយភាពអត់ឃ្លានឲ្យដល់កម្រិតសូន្យ តែការប្តេជ្ញានេះត្រូវបានពន្យារដល់ឆ្នាំ២០៣០។
រដ្ឋមន្ត្រីក្រសួងកសិកម្មលោក វេង សាខុន បានលើកឡើងក្នុងហ្វេសបុករបស់លោកនៅថ្ងៃនេះថា ដើម្បីចូលរួមកាត់បន្ថយភាពអត់ឃ្លានឲ្យដល់កម្រិតសូន្យនៅឆ្នាំ២០៣០ខាងមុខ រដ្ឋាភិបាលស្នើឲ្យមានការចូលរួមពីវិស័យឯកជន និងដៃគូរអភិវឌ្ឍន៍ទាំងអស់ ដើម្បីបង្កើនការវិនិយោគលើការស្រាវជ្រាវ និងអភិវឌ្ឍពូជដំណាំ ពូជសត្វ និងការចិញ្ចឹមត្រី។ រដ្ឋមន្ត្រីក្រសួងកសិកម្មរូបនេះ ក៏ជំរុញការប្រើប្រាស់បច្ចេកទេសទំនើប និងឌីជីថល ជំរុញការវិនិយោគលើកសិផល និងកសិ-ឧស្សាហកម្ម និងជំរុញឲ្យមានកំណើនអាជីវកម្មធុនតូច និងមធ្យមក្នុងស្រុក ជាពិសេសគឺការធ្វើកសិកម្មចម្រុះមិនមែនតែស្រែមួយមុខនោះទេ។
យោងតាមរបាយការណ៍សន្ទស្សន៍ភាពស្រេកឃ្លានសកល ចេញដោយវិទ្យាស្ថានស្រាវជ្រាវគោលនយោបាយស្បៀងអាហារអន្តរជាតិ ហៅកាត់ថា IFPRI របស់សហរដ្ឋអាមេរិក កាលពីខែតុលា ឆ្នាំ២០១៧ បានបង្ហាញថាសន្ទស្សន៍ភាពស្រេកឃ្លានកម្ពុជា បានធ្លាក់ចុះពី ២៧,១ពិន្ទុ នៅឆ្នាំ២០០៨ មកនៅ ២២,២ពិន្ទុ នៅឆ្នាំ២០១៧ ដោយស្ថិតនៅចំណាត់ថ្នាក់ ៧៥ នៅក្នុងចំណោមប្រទេស ១១៩ ដែលបង្ហាញថាកម្ពុជានៅមានកម្រិតភាពស្រេកឃ្លាន «ធ្ងន់ធ្ងរ» នៅឡើយ៕