រដ្ឋាភិបាលឥណ្ឌូនេស៊ីកំពុងពិចារណាទិញអង្ករ និងផលិតផលកសិកម្មមួយចំនួនទៀតពីប្រទេសកម្ពុជា ដើម្បីជំរុញកិច្ចសហការ និងកាត់បន្ថយឱនភាពទំហំពាណិជ្ជកម្មនៃប្រទេសទាំងពីរ។
ក្នុងហ្វេសបុកផ្លូវការរបស់ក្រសួងពាណិជ្ជកម្មកាលពីម្សិលមិញឲ្យដឹងថា រដ្ឋាភិបាលឥណ្ឌូណេស៊ីតាមរយៈឯកអគ្គរដ្ឋទូតរបស់ខ្លួនលោក ស៊ូឌាមេន ហាសេង បានបញ្ជាក់ប្រាប់រដ្ឋមន្ត្រីពាណិជ្ជកម្មកម្ពុជាលោក ប៉ាន សូរស័ក្កិ ថាប្រទេសឥណ្ឌូណេស៊ីមានបំណងពង្រីកកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិស័យអាទិភាពផ្សេងទៀតជាមួយកម្ពុជា ខណៈលោកបានលើកឡើងថារដ្ឋាភិបាលលោកនៅពេលនេះកំពុងពិចារណាទិញអង្ករ និងផលិតផលកសិកម្មមួយចំនួនទៀតពីកម្ពុជាផងដែរ។
ប្រជាជនឥណ្ឌូណេស៊ី មានជាង២៦០លាននាក់ ដែលជាប្រទេសមានប្រជាជនច្រើនជាងគេបំផុតទី៤ក្នុងពិភពលោក ដែលក្នុងមួយឆ្នាំត្រូវការអង្ករដើម្បីផ្គត់ផ្គង់ពលរដ្ឋប្រមាណ៣០លានតោន។ ក្នុងឆ្នាំ២០១៨នេះឥណ្ឌូណេស៊ីបានទិញអង្ករពីបរទេសប្រមាណជាង២លានតោន។
អ្នកនាំពាក្យក្រសួងកសិកម្មលោក ស្រី វុឌ្ឍី ស្វាគមន៍ចំពោះបំណងរបស់ឥណ្ឌូណេស៊ីនេះដោយថាវារឹតតែធ្វើឲ្យចំណងទំនាក់ទំនងរវាងប្រទេសទាំងពីរកាន់តែរឹងមាំ និងផ្ដល់ប្រយោជន៍ឲ្យគ្នាកាន់តែច្រើនថែមទៀត។
លោកថា៖ « បញ្ហាអង្ករនេះគឺយើងធ្លាប់បានជួបជាមួយនឹងគាត់ ហើយយើងក៏ចង់ឲ្យឥណ្ឌូណេស៊ីហ្នឹងទិញអង្ករពីយើងឲ្យបានច្រើននេះគឺជាទិសដៅសហប្រតិបត្តិការសេដ្ឋកិច្ចនៃប្រទេសទាំងពីរ ខ្ញុំគិតថាប្រសិនជាឥណ្ឌូណេស៊ីមានបំណងអញ្ចឹងគឺយើងស្វាគមន៍ យើងនឹងធ្វើកិច្ចការនេះរវាងវិស័យឯកជន និងវិស័យឯកជនដើម្បីធ្វើយ៉ាងមិចឲ្យមានការនាំចេញបាន » ។
អគ្គលេខាធិការសម្ព័ន្ធសហគមន៍កសិករកម្ពុជាលោក ថេង សាវឿន យល់ថាជាការល្អដល់កសិករកម្ពុជាប្រសិនជាប្រទេសឥណ្ឌូណេស៊ីសម្រេចទិញអង្ករពីកម្ពុជាមែននោះ ខណៈលោកជំរុញឲ្យរដ្ឋាភិបាលយកចិត្តទុកដាក់ដោះស្រាយបញ្ហារបស់ប្រជាពលរដ្ឋរួមមានដីធ្លី បច្ចេកទេសកសិកម្ម និងកម្ចីដល់កសិករផងដែរ។
លោកថា៖ « ពិសេសគឺការផ្ដល់កម្ចីដល់កសិករដើម្បីធ្វើស្រែធ្វើចម្ការ ឲ្យបានសមស្របហើយធ្វើយ៉ាងម៉េចដើម្បីឲ្យកសិករហ្នឹងគាត់មានលទ្ធភាពគ្រប់គ្រាន់ក្នុងការផ្គត់ផ្គង់នឹងផលិតក៏ដូចជាវេចខ្ចប់ដើម្បីអាចនាំចេញបាន » ។
បើតាមក្រសួងពាណិជ្ជកម្ម ក្នុងឆ្នាំ២០១៧ទំហំពាណិជ្ជកម្មកម្ពុជា និងឥណ្ឌូណេស៊ីក្នុងឆ្នាំ២០១៧ មានទំហំ៥៣៩លានដុល្លារអាមេរិក កើនឡើងជាង ២០% បើធៀបនឹងឆ្នាំ២០១៦ ក្នុងនោះ ការនាំចេញរបស់កម្ពុជា ទៅឥណ្ឌូណេស៊ីមានទឹកប្រាក់ ២៦លានដុល្លារអាមេរិក និងនាំចូលពីឥណ្ឌូណេស៊ីមានចំនួន ៥១៤លានដុល្លារ៕
