លោកនាយករដ្ឋមន្ត្រីហ៊ុន សែន ត្អួញត្អែរថា ការទៅចូលរួមប្រជុំលើទឹកដីសហភាពអឺរ៉ុបលើកនេះ រវល់ការងារច្រើនស្ទើររកពេលបរិភោគបាយទឹកមិនបាន។
មុនចេញដំណើរទៅសហភាពអឺរ៉ុបកាលពីម្សិលមិញលោកនាយករដ្ឋមន្ត្រីបានសរសេរនៅលើហ្វេសប៊ុក ពីកម្មវិធីដែលលោកត្រូវចូលរួម ហើយថា មានភាពមមាញឹកខ្លាំង។
លោកសរសេរថា៖«ក្រឡេកមើលកម្មវិធីការងារនៅក្រៅប្រទេសលើកនេះពិតជាមមារញឹកស្ទើរតែរកពេលបាយមិនឃើញ ប្រជុំផង ជំនួបទ្វេភាគីផង តែខ្ញុំពេញចិត្តនឹងធ្វើកិច្ចការនេះ ព្រោះជាប្រយោជន៍ជាតិយើង។»
លោកនាយករដ្ឋមន្ត្រីហ៊ុន សែន ចាកចេញពីកម្ពុជា នៅយប់ថ្ងៃទី១៦តុលា នាម៉ោង ១២ និង ២០នាទី ឈានចូលថ្ងៃទី ១៧ តុលា ២០១៨ ឆ្ពោះទៅកាន់ប្រទេសបែលហ្សិក ដែលជាទីកន្លែងត្រូវប្រជុំអាស៊ីអឺរ៉ុបលើកទី១២។ តាមគម្រោងលោកនឹងវិលត្រឡប់មកកម្ពុជាវិញនៅយប់ថ្ងៃទី២៤ខែតុលា ហើយនៅថ្ងៃទី២៥ខែតុលាលោកត្រូវដឹកនាំការប្រជុំលើសេចក្តីព្រាងច្បាប់ថវិកាជាតិសម្រាប់ឆ្នាំ២០១៩។
