សាលារាជធានីភ្នំពេញប្រកាសឲ្យអ្នកមានជំនាញចូលរួមក្នុងការប្រកួតប្រជែងរចនាម៉ូតខ្លោងរបារសម្រាប់ពិធី បុណ្យអុំទូក បណ្តែតប្រទីប អកអំបុក និងសំពះព្រះខែ នៅឆ្នាំ២០១៨នេះ។
តាមសេចក្តីប្រកាសនៅលើហ្វេសប៊ុករបស់សាលារាជធានីបានឲ្យដឹងថា ចំពោះការរចនាដែលទទួលបានការចុចLikeច្រើនជាងគេ នឹងដាក់ដំឡើងតាមទីតាំងដែលកំណត់ ហើយទទួលរង្វាន់លើកទឹកចិត្ត។
សេចក្តីប្រកាស៖« ផ្តល់ឱកាសដល់បងប្អូនអ្នកជំនាញខាងរចនាទាំងអស់ ជាពិសេសប្អូនៗនិស្សិតនៃសកលវិទ្យាល័យភូមិន្ទវិចិត្រសិល្បៈ បានចូលរួមចំណែកបង្ហាញស្នាដៃរបស់ខ្លួន នូវម៉ូតខ្លោងដែលមានសោភ័ណភាពស្រស់ស្អាត និងបង្កប់ទៅដោយរចនាបថខ្មែរពិតៗ។ ខ្លោងដែលទទួលបានការគាំទ្រច្រើនជាងគេតាមរយៈការចុច Like នឹងទទួលបានរង្វាន់លើកទឹកចិត្ត និងដាក់ដំឡើងនៅតាមទីតាំងដែលបានត្រៀមទុកជាស្រេច។»
ខ្លឹមសារអក្សរដែលសាលារាជធានីកំណត់«អបអរសាទរព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក, ថ្ងៃពុធ ១៤កើត ព្រហស្បតិ៍ ១៥កើត និងសុក្រ ១រោច ខែកត្តិក ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី២១ ២២ និង២៣ ខែវិច្ឆិកា ឆ្នាំ២០១៨។»
ចំណែកទីតាំងដែលត្រូវដាក់ចំនួន៤រួមមាន របារកាត់ទទឹងមហាវិថីព្រះនរោត្តមមុខវិមានឯករាជ្យ, របារកាត់ទទឹងមុខនាឡិការមណីយដ្ឋានវត្តភ្នំ, របារកាត់ទទឹងវិថីព្រះសីហនុចំណុចខាងលិចរង្វង់មូលសម្ដេចជួនណាត និងរបារកាត់ទទឹងវិថីព្រះស៉ីសុវត្ថិចំណុចសួនព្រះគន្លុង។