រដ្ឋាភិបាលកម្ពុជាបានអបអរសាទរចំពោះការវាយតម្លៃរបស់សភាពាណិជ្ជកម្មអឺរ៉ុបប្រចាំកម្ពុជា ហើយប្រកាសពីជំហរក្នុងការសហការជាមួយអឺរ៉ុប និងលើកតម្កើងផលប្រយោជន៍ដល់គ្នាទៅវិញទៅមក។
កាលពីថ្ងៃចន្ទ សភាពាណិជ្ជកម្មអឺរ៉ុបប្រចាំកម្ពុជា ហៅកាត់ថា EURO CHAM បានទទូចទៅកាន់អឺរ៉ុបពិចារណាឡើងវិញចំពោះវិធានការរបស់ខ្លួន ដែលអាចឈានទៅកាត់ផ្ដាច់ប្រព័ន្ធអនុគ្រោះពន្ធពីកម្ពុជា ដោយថាទណ្ឌកម្មនេះនឹងបង្កផលប៉ះពាល់ដល់ពាណិជ្ជកម្មរបស់សហភាពអឺរ៉ុប និងគោលជំហររបស់អឺរ៉ុបក្នុងការជំរុញគោលការណ៍លទ្ធិប្រជាធិបតេយ្យ ខណៈចិនកំពុងពង្រីកវត្តមានរបស់ខ្លួនក្នុងប្រទេសកម្ពុជា និងនៅក្នុងតំបន់ផងនោះ។
ក្នុងសេចក្តីប្រកាសព័ត៌មានចុះថ្ងៃទី១៧ តុលានេះការិយាល័យអ្នកនាំពាក្យរដ្ឋាភិបាលបានគាំទ្រចំពោះការលើកឡើងនេះ ខណៈថា ការដកហូតប្រព័ន្ធអនុគ្រោះពន្ធអ្វីៗគ្រប់យ៉ាងលើកលែងតែអាវុធរបស់អឺរ៉ុប គឺជាការប្រថុយប្រថាន និងគំរាមដោយផ្ទាល់ ដល់សមត្ថភាពប្រកួតប្រជែងផ្នែកធុរៈកិច្ច របស់អឺរ៉ុបនៅក្នុងប្រទេសកម្ពុជា និងប៉ះពាល់ដល់ជំហររបស់ សហភាពអឺរ៉ុបនៅក្នុងការលើកកម្ពស់របៀបវារៈ ពាណិជ្ជកម្ម និងធ្វើឱ្យប្រៀបនៃការប្រកួតប្រជែងរបស់ខ្លួនធ្លាក់ចុះផងដែរ។
រដ្ឋាភិបាលបានលើកឡើងបន្ថែមថា ខ្លួននៅតែប្រកាន់ជំហរជានិច្ចក្នុងការសហការជាមួយអឺរ៉ុប និងលើកតម្កើងផលប្រយោជន៍រួមគ្នាទៅវិញទៅមកផងដែរ។
កាលពីថ្ងៃទី៥ខែតុលាកន្លងទៅ គណៈកម្មការអឺរ៉ុបបានជូនដំណឹងដល់កម្ពុជាអំពីការចាប់ផ្ដើមដំណើរការដកប្រព័ន្ធអនុគ្រោះ EBA ដោយចោទថា រដ្ឋាភិបាលកម្ពុជាបានប្រព្រឹត្តអំពើរំលោភសិទ្ធិមនុស្ស និងសិទ្ធិការងារធ្ងន់ធ្ងរ។ សហភាពអឺរ៉ុបលើកឡើងថា កម្ពុជាមិនបានធ្វើឲ្យប្រសើរឡើងនូវបញ្ហាសិទ្ធិមនុស្សរបស់ខ្លួនឡើយ បើទោះបីជាគណៈកម្មការស្វែងរកការពិតរបស់អឺរ៉ុបបានស្រាវជ្រាវ និងផ្តល់អនុសាសន៍ឲ្យមានការកែប្រែក៏ដោយ៕
