ប្រធានគណៈកម្មាធិការសុខុមាលភាពនៃសភាពាណិជ្ជកម្មអឺរ៉ុប បានអះអាងថា ក្នុងរយៈពេលត្រឹមតែ ៤ម៉ោង ពលរដ្ឋកម្ពុជាម្នាក់ បានស្លាប់បន្ទាប់ពីប្រើប្រាស់ឱសថក្លែងក្លាយទាំងនេះ ខណៈដែលឱសថក្លែងក្លាយបានសម្លាប់ជីវិតមនុស្សអស់ជាង ១លាននាក់នៅទូទាំងពិភពលោកក្នុងមួយឆ្នាំ។
ក្នុងវេទិកាធុរកិច្ចអឺរ៉ុប និងកម្ពុជា ដែលរៀបចំដោយក្លឹបអ្នកកាសែតកាលពីម្សិលមិញ ប្រធានគណៈកម្មាធិការសុខុមាលភាពនៃសភាពាណិជ្ជកម្មអឺរ៉ុប និងជានាយកក្រុមហ៊ុន Zuelling Pharma ប្រចាំកម្ពុជា លោក Jean Gaetan បានលើកឡើងថា បច្ចុប្បន្ន ក្នុងចំណោមថ្នាំចំនួន ១០ប្រភេទនៅទូទាំងពិភពលោក មានថ្នាំក្លែងក្លាយ ៧ប្រភេទហើយដែលនៅលាយឡំជាមួយថ្នាំទាំងនោះ ដែលធ្វើឲ្យពលរដ្ឋងាយរងគ្រោះ ឆាប់ជឿ និងយកមកប្រើប្រាស់។
លោកបន្ថែមថា តាមការគណនារបស់គណៈកម្មាធិការដោយយកការរកឃើញរបស់ក្រុមប៉ូលិសអន្តរជាតិជាគោលនោះ គណៈកម្មាធិការរបស់លោករកឃើញថា ជារៀងរាល់ ៤ម៉ោង ពលរដ្ឋកម្ពុជាម្នាក់ត្រូវបានបាត់បង់ជីវិត ហើយមានតែ ២០ភាគរយប៉ុណ្ណោះនៃអ្នករងគ្រោះនោះ ដែលដឹងខ្លួនថា បានប្រើថ្នាំក្លែងក្លាយ។
លោក Jean Gaetan នៅក្នុងវេទិកាធុរកិច្ចអឺរ៉ុប និងកម្ពុជា កិច្ចពិភាក្សាសារព័ត៌មាន ស្ដីពីធុរកិច្ច និងការទទួលខុសត្រុវសង្គម ថ្ងៃទី១៨ ខែតុលា ឆ្នាំ២០១៨។ រូបថត៖ ហ៊ី ឆាយ
លោកថា៖ «អ្នកដែលព្យាយាមផលិតថ្នាំក្លែងក្លាយនោះ គឺគាត់ផ្ដោតតែមនុស្សដែលងាយរងគ្រោះប៉ុណ្ណោះ។ ឧទាហរណ៍ អ្នកដែលមានជំងឺដែលប៉ះពាល់ដល់ជីវិតនោះ ពួកគេគឺផ្ដោតទៅលើមនុស្សអស់ហ្នឹង ព្រោះអ្នកជំងឺមិនបានបន្ទោសទៅលើឱសថទេ តែបន្ទោសទៅលើជំងឺរបស់គាត់»។
ដើម្បីបញ្ចៀសពីការប្រើប្រាស់ថ្នាំក្លែងក្លាយ លោក Jean Gaetan បានលើកឡើងថា អ្នកទិញថ្នាំទាំងអស់គួរតែប្រើថ្នាំណាដែលទទួលបានការចុះបញ្ជីជាមួយក្រសួងសុខាភិបាល ជាថ្នាំមិនហួសកាលបរិច្ឆេទ និងមានការណែនាំជាភាសាខ្មែរច្បាស់លាស់។
អ្នកនាំពាក្យគណៈកម្មាធិការជាតិប្រយុទ្ធប្រឆាំងផលិតផលក្លែងក្លាយ លោក មួង ឬទ្ធី ប្រាប់ថា លោកជាប់រវល់មិនអាចឆ្លើយតបបាន។
អ្នកនាំពាក្យក្រសួងសុខាភិបាលលោកវេជ្ជបណ្ឌិត លី សូវ៉ាន់ ទទួលស្គាល់ថាកម្ពុជានៅមានបញ្ហាពាក់ព័ន្ធនឹងសុវត្ថិភាពឱសថនេះ តែលោកបានច្រានចោលនូវការលើកឡើងរបស់សភាពាណិជ្ជកម្មអឺរ៉ុបនេះ ដោយថាពុំមានការស្រាវជ្រាវជាក់លាក់។
លោក លី សូវ៉ាន់ បន្តថា៖ « មិនដឹងថាគាត់សិក្សាហ្នឹងយោងតាមការសិក្សាអ្វីទេ ព្រោះមិនទាន់មានការសិក្សាណាមួយបង្ហាញនៅឡើយទេ។ តែយើងទទួលស្គាល់ថាយើងខិតខំសហការជាមួយក្រសួងពាក់ព័ន្ធ ក្រសួងមហាផ្ទៃ អាជ្ញាធរដែនដី ក្រសួងស្ថាប័នអីបានច្រើនទាក់ទងនឹងបញ្ហាហ្នឹងមិនតែឱសថទេគឺពាក់ព័ន្ធរឿងច្រើន » ។
កាលពីដើមខែសីហាកន្លងទៅ ប្រធានគណៈកម្មាធិការជាតិប្រយុទ្ធប្រឆាំងផលិតផលក្លែងក្លាយ លោក មាជ សុផាន់ណា បានលើកឡើងថាបញ្ហាផលិតផលក្លែងក្លាយច្រើននេះ បណ្ដាលមកពីតម្រូវការក្នុងស្រុកមានការកើនឡើង ជាហេតុធ្វើឲ្យជនទុច្ចរិតឆ្លៀតឱកាសលួចនាំចូល ឬ ផលិតផលិតផលក្លែងក្លាយច្រើនជាងមុន។
គេហទំព័រវិទ្យាសាស្ត្រនៃសាធារណរដ្ឋប៉ូឡូញ បានលើកឡើងថា ឱសថក្លែងក្លាយភាគច្រើនមានតម្លៃថោក និងមានការផលិតច្រើន រួមមានថ្នាំសម្រកទំនង បណ្ដុះសក់ ថ្នាំបំបាត់ការឈឺចាប់ ថ្នាំប្រឆាំងមេរោគរបេង គ្រុនចាញ់ អេដស៍ និងមហារីកជាដើម ដែលភាគច្រើនជាថ្នាំរបស់ប្រទេសចិន និងឥណ្ឌា៕