មេដឹកនាំម៉ាឡេស៊ីបានថ្លែងថា បញ្ហាអំពើពុករលួយបានក្លាយជារឿងអតីតកាលទៅហើយ ក្រោយពីការផ្លាស់ប្ដូរនៅក្នុងរដ្ឋាភិបាល។ នេះបើតាមការចុះផ្សាយរបស់សារព័ត៌មានសិង្ហបុរីនៅថ្ងៃនេះ។
សារព័ត៌មាន Channel News Asia បានដកស្រង់សម្ដីនាយករដ្ឋមន្ត្រីម៉ាឡេស៊ី លោក មហាធៀ មហាម៉េដ ដែលបានផ្ដល់សម្ភាសដល់ទូរទស្សន៍ Astro កាលពីថ្ងៃម្សិលមិញនេះ។
ក្នុងកិច្ចសម្ភាសនោះ លោក មហាធៀ បានថ្លែងថា ប្រជាជនលែងនិយាយអំពីការបង់ប្រាក់សំណូកទៀតហើយ នៅពេលប្រឈមមុខជាមួយមន្ត្រីរដ្ឋាភិបាល។
លោក មហាធៀ ត្រូវបានដកស្រង់សម្ដីដែលថ្លែងថា៖ «យើងមិនឮបញ្ហាអំពើពុករលួយទៀតទេ។ ប្រជាជនអាចទាក់ទងរដ្ឋាភិបាលដោយមិនចាំបាច់បង់សំណូកឡើយ»។
លោក មហាធៀ បានឡើងកាន់តំណែងជានាយករដ្ឋមន្ត្រីម៉ាឡេស៊ីជាថ្មីម្ដងទៀត ជាមួយការសន្យាប្រយុទ្ធនឹងអំពើពុករលួយ និងកែទម្រង់ស្ថាប័នរដ្ឋ។
មេដឹកនាំវ័យ ៩៣ឆ្នាំរូបនេះ បានបន្ទោសទៅលើរដ្ឋបាលចាស់របស់អតីតនាយករដ្ឋមន្ត្រី លោក ណាជីប រ៉ាហ្សាក់ ដែលធ្វើឲ្យប្រទេសជាប់បំណុលយ៉ាងធ្ងន់ធ្ងរ ក្នុងនោះមានទាំងអំពើពុករលួយនៅក្រុមហ៊ុនវិនិយោគរដ្ឋ 1MDB ផងដែរ៕