សារព័ត៌មានសិង្ហបុរី បានចុះផ្សាយថា យ៉ាងហោចណាស់មនុស្ស ១៨នាក់ បានស្លាប់ ហើយ ១៧៥នាក់ទៀតបានរងរបួស បន្ទាប់ពីរថភ្លើងល្បឿនលឿនមួយខ្សែនៅកោះតៃវ៉ាន់ បានរត់ធ្លាក់ផ្លូវដែកកាលពីថ្ងៃម្សិលមិញនេះ។
សារព័ត៌មាន Channel News Asia បានដកស្រង់សម្ដីអាជ្ញាធរកោះតៃវ៉ាន់ ដែលបាននិយាយថា ហេតុការណ៍នេះគឺជាគ្រោះមហន្តរាយផ្លូវដែកដ៏អាក្រក់បំផុតនៅក្នុងប្រវត្តិសាស្ត្រ ២៥ឆ្នាំចុងក្រោយរបស់ដែនដីកោះមួយនេះ។
រូបថតពីកន្លែងកើតហេតុ បានបង្ហាញរថភ្លើងល្បឿនលឿន Puyuma Express រត់ធ្លាក់ផ្លូវដែកនៅតំបន់ឆ្នេរទេសចរណ៍ដ៏មានប្រជាប្រិយមួយកន្លែងនៅលើកោះតៃវ៉ាន់។
ក្នុងចំណោមទូររថភ្លើងទាំងអស់ ទូររភ្លើងចំនួន ៨បានរត់ធ្លាក់ផ្លូវ ហើយទូររថភ្លើង ៥គ្រឿងទៀត បានខ្ទាត់ចេញពីផ្លូវតែបន្តិចបន្តួចប៉ុណ្ណោះ។
រដ្ឋបាលផ្លូវដែកកោះតៃវ៉ាន់ បានប្រកាសថា មនុស្ស ៣៦៦នាក់ ស្ថិតនៅលើទូររថភ្លើងទាំងនោះ ដែលធ្វើដំណើរទៅកាន់ទីក្រុងតៃតុង ស្ថិតនៅភាគខាងត្បូង។
រដ្ឋបាលផ្លូវដែកតៃវ៉ាន់ បានប្រកាសថា មនុស្ស ១៧៥នាក់ បានរងរបួសនៅក្នុងហេតុការណ៍នោះ និងត្រូវបានគេរំដោះចេញពីខ្សែរថភ្លើងនោះ៕
