នាយករដ្ឋមន្ត្រីកម្ពុជា ស្នើទៅកាន់មេដឹកនាំប្រទេសតួកគីឲ្យជួយទិញអង្ករនិងផ្លែស្វាយពីប្រទេសកម្ពុជា។
លោកនាយករដ្ឋមន្រ្តី ហ៊ុន សែន បានសរសេរក្នុងទំព័រហ្វ៊េសបុករបស់លោកនៅថ្ងៃនេះថា លោកបានស្នើដល់ប្រធានាធិបតីនៃសាធារណរដ្ឋតួកគីលោក រ៉េជីប ថាយ៉ីបអ៊ែឌូហ្គាន់ ឲ្យពិចារណាក្នុងការជួយទិញអង្ករ និងផ្លែស្វាយ ពីកម្ពុជាដោយថាដើម្បីជួយដល់កសិករកម្ពុជា។ តាមប្រភពដដែលប្រទេសតួកគី និងកម្ពុជាក៏បានប្ដេជ្ញាបង្កើនទំហំពាណិជ្ជកម្មរបស់ខ្លួនឲ្យកើនដល់១ពាន់លានដុល្លារនាពេលខាងមុខ។
ក្រៅពីជំរុញបង្កើនទំហំពាណិជ្ជកម្មនេះ កម្ពុជា និងតួកគីក៏បានចុះហត្ថលេខាលើកិច្ចព្រមព្រៀងចំនួន៨ដែលរួមមាន អនុសារណៈស្ដីពីកិច្ចសហប្រតិបត្តិការក្នុងវិស័យកសិកម្ម និងកិច្ចសហប្រតិបត្តិការក្នុងវិស័យទឹក និងកិច្ចព្រមព្រៀងស្ដីពីការជំរុញនិងការការពារទៅវិញទៅមកនៃការវិនិយោគផងដែរ។
រដ្ឋលេខាធិការក្រសួងកសិកម្មលោក ហ៊ាន វណ្ណហន មានប្រសាសន៍ថាកម្ពុជា និងតួកគី រហូតមកដល់ពេលនេះនៅមិនទាន់មានទំនាក់ទំនងនាំចេញនាំចូលផលិតផលកសិកម្មជាមួយគ្នានៅឡើយទេ ដោយលោកសង្ឃឹមថាបន្ទាប់ពីមានការរឹតចំណងទូតនេះនឹងអាចបើកផ្លូវឲ្យមានជំនួបផ្នែកបច្ចេកទេសដើម្បីសម្រួលដល់ការបង្កើនពាណិជ្ជកម្មកសិកម្មនេះ។
លោកថា៖ « ជារឿងមួយល្អដែលសម្តេចតេជោ លោកធ្វើការទូតបានជោគជ័យ។ វាជាការបើកច្រក ហើយកម្រិតបច្ចេកទេសនឹងបន្តជំហានបន្ទាប់ពីបានចុះហត្ថលេខាហើយ » ។
អគ្គលេខាធិការសម្ព័ន្ធសហគមន៍កសិករកម្ពុជាលោក ថេង សាវឿន យល់ថា ការបង្កើនទីផ្សារគឺជាវិធានការល្អតែទីផ្សាររបស់ប្រទេសតួកគីគឺតូចនៅឡើយបើប្រៀបធៀបទៅនឹងទីផ្សាររបស់សហគមន៍អឺរ៉ុបដែលកម្ពុជាកំពុងមានស្រាប់ ដោយលោកជម្រុញឲ្យរដ្ឋាភិបាលគួរពិចារណារក្សាទីផ្សារធំនេះវិញ។
លោកថា៖ « អ្វីដែលយើងមានស្រាប់ដូចជាសហភាពអឺរ៉ុបដែលជាទីផ្សារធំមាន២៨ប្រទេសហ្នឹង រដ្ឋាភិបាលគួរតែរកវិធីសាស្ត្រដោះស្រាយដែលយើងមានស្រាប់ ដែលយើងទទួលបានការអនុញ្ញាតឲ្យនាំចេញទៅលក់ និងមានស្រាប់ហ្នឹងគ្រាន់តែយើងដោះស្រាយបញ្ហាដែលមានថ្នាំថ្នាក់នឹងគ្នានឹងដោះស្រាយបញ្ហាមួយចំនួនទៅ។ ហើយស្នើឲ្យEU បង្កើនការទិញផលិតផលកសិកម្មពីកម្ពុជាវិញវាជារឿងមួយដែលល្អប្រសើរ។ ប្រសិនបើយើងចំណាយពេលវេលាបោះបង់ទីផ្សារធំហើយទៅចាប់ទីផ្សារតូចយើងនឹងចំណាយធនធាន និងពេលវេលាច្រើនណាស់សម្រាប់រកទីផ្សារ។»
ទំហំពាណិជ្ជកម្មរវាងកម្ពុជា និងតួកគី ក្នុងឆ្នាំ២០១៧ មានទំហំប្រមាណ៧៥លានដុល្លារអាមេរិក ដែលកើនឡើងជាង៦០ភាគរយបើធៀបនឹងឆ្នាំ២០១៦ ដែលមានចំនួន ៣០លានដុល្លារ៕