ក្នុងលិខិតចុះថ្ងៃទី២០ តុលា ឆ្នាំ២០១៨ ដែលបានផ្ញើទៅកាន់ស្នងការពាណិជ្ជកម្មគណៈកម្មការអឺរ៉ុប លោកស្រី Cecilia Malmström ប្រធានសមាគមរោងចក្រកាត់ដេរហៅកាត់ថា GMAC លោក ខេន លូ បានលើកឡើងថា ការព្យួរបណ្ដោះអាសន្ននៃគម្រោង EBA ឬទណ្ឌកម្មឯកតោភាគីរយៈពេលខ្លីណាមួយអាចមានផលប៉ះពាល់អវិជ្ជមានរយៈពេលវែងដល់ជីវិតរបស់កម្មករ និងគ្រួសាររបស់ពួកគេ ហើយភាពរីកចម្រើនទាំងអស់ដែលកម្ពុជាសម្រេចបានក្នុងរយៈកាល២ទសវត្សរ៍កន្លងមកនេះអាចនឹងត្រូវបានបំផ្លាញយ៉ាងលឿន។
បើតាម GMAC វិស័យកាត់ដេរកម្ពុជាបានផ្ដល់ការងារដោយផ្ទាល់ដល់ប្រជាពលរដ្ឋប្រមាណ៧០ម៉ឺននាក់ ដែលជាង៨៥%ជាស្ត្រីមកពីបណ្ដាខេត្ត និងជនបទ ហើយប្រជាពលរដ្ឋ២លាននាក់ដទៃទៀតទទួលផលដោយប្រយោល។ តាមប្រភពដដែលជារៀងរាល់ខែ ប្រាក់ខែជាង១៥០លានដុល្លារអាមេរិកត្រូវបានចំណាយទៅលើកម្មករទាំងនេះ។
GMAC បន្ថែមថាការប្រកាសនាពេលថ្មីៗនេះដោយសហភាពអឺរ៉ុប អំពីលទ្ធភាពក្នុងការព្យួរបណ្ដោះអាសន្ននៃប្រព័ន្ធEBA សម្រាប់កម្ពុជា គឺជាការភ្ញាក់ផ្អើលសម្រាប់វិស័យឯកជនរួមទាំងវិនិយោគិន កម្មករ ព្រមទាំងអ្នកបញ្ជាទិញដែលទិញពីកម្ពុជា។
អគ្គលេខាធិការរងនៃសមាគមរោងចក្រកាត់ដេរលោក កាំង ម៉ូលីកា បានលើកឡើងប្រាប់VOD ថាប្រសិនEBA ត្រូវបានដកមែននោះរោងចក្រដែលប្រតិបត្តិនៅកម្ពុជាអាចនឹងរងផលប៉ះពាល់ច្រើន តែលោកបានបង្ហាញក្តីសង្ឃឹមខ្លះដែរចំពោះវិស័យកាត់ដេរ និងស្បែកជើងថាអាចត្រូវរួចផុតពីទណ្ឌកម្មនេះដោយសារតែកម្ពុជាបានគាំទ្រដល់សិទ្ធិកម្មករក្នុងវិស័យទាំងនេះច្រើន។
លោកថា៖ « វាជាតួនាទីរបស់យើងក្នុងការពន្យល់ទៅកាន់សហគមន៍អឺរ៉ុប នូវអ្វីដែលជាការពិត ដែលកើតឡើងក្នុងប្រទេសកម្ពុជា ជាពិសេសក្នុងវិស័យរបស់យើង។ ការបារម្ភរបស់យើងគឺខ្លាចថាEU គាត់យល់ច្រឡំ ហើយធ្វើការវាយតម្លៃមិនបានត្រឹមត្រូវ ហើយដូចខ្ញុំបានជម្រាបអញ្ចឹងបើសិនជាធ្វើការវាយតម្លៃបានត្រឹមត្រូវឈរលើគោលការណ៍លក្ខណៈបច្ចេកទេស មែនទែននោះគឺយើងមិនមានការបារម្ភអ្វីទាំងអស់ » ។
កាលពីថ្ងៃទី១៩ តុលា អ្នកតំណាងជាន់ខ្ពស់សហភាពអឺរ៉ុបលោកស្រី Federica Mogherini បានជួបដោយផ្ទាល់ជាមួយ លោកនាយករដ្ឋមន្ត្រីហ៊ុន សែន នឹងបានប្រាប់ពីដំណើរការបណ្ដោះអាសន្ននៃការដកប្រព័ន្ធអនុគ្រោះពន្ធ (EBA)ពីកម្ពុជា ហើយអ្វីដែលកម្ពុជាអាចចៀសផុត ពីការដកប្រព័ន្ធអនុគ្រោះពន្ធនេះគឺត្រូវធ្វើយ៉ាងណាឲ្យមានភាពប្រសើរឡើងវិញលើដំណើរការនយោបាយតាមបែបប្រជាធិបតេយ្យ។
VOD មិនអាចសុំការបំភ្លឺពីអ្នកនាំពាក្យក្រសួងការងារលោក ហេង សួរ តាមរយៈសារអេឡិចត្រូនិកWhatappបាននៅឡើយទេ តែកាលពីថ្ងៃទី១១ តុលាកន្លងទៅលោកបានបញ្ជាក់ប្រាប់VOD ថាកម្ពុជា និងមិនស្លាប់នោះទេបើគ្មាន EBA នោះ។
លោកបន្ថែមថា តាមរយៈស្ថានភាពអភិវឌ្ឍរបស់កម្ពុជា នាពេលបច្ចុប្បន្ននេះគឺ កម្ពុជានឹងបាត់បង់ EBA ដោយស្វ័យប្រវត្តិនៅឆ្នាំ២០២១ ឬ ឆ្នាំ២០២៣យ៉ាងយូរ ហើយអ្វីដែលEU ប្រកាសនោះគឺនៅឆ្លងដំណាក់កាលច្រើនទៀត ដែលលោកជឿថានឹងមានឱកាសពិភាក្សារវាងអ្នកបច្ចេកទេសអឺរ៉ុប និងកម្ពុជាបន្ថែមទៀត។
ក្រុមហ៊ុន Moody Investors services ដែលស្រាវជ្រាវបញ្ហាសេដ្ឋកិច្ច និងហិរញ្ញវត្ថុអន្តរជាតិ បានលើកឡើងក្នុងរបាយការណ៍របស់ខ្លួនកាលពីថ្ងៃទី ២០ តុលានេះថា ការដកប្រព័ន្ធអនុគ្រោះពន្ធEBAនេះនឹងផ្ដល់ផលប៉ះពាល់ជាអវិជ្ជមានដល់កម្ពុជា ហើយការដំឡើងពន្ធគយរបស់អឺរ៉ុបចំពោះទំនិញកម្ពុជានោះនឹងធ្វើឲ្យផលិតនៅកម្ពុជាមានតម្លៃកើនឡើងនៅអឺរ៉ុប ដែលវាក៏បណ្ដាលឲ្យប៉ះពាល់ដល់ភាពប្រកួតប្រជែងនៃផលិតផលសំលៀកបំពាក់របស់កម្ពុជាជាមួយប្រទេសដទៃផងដែរ។
ក្រុមហ៊ុនដែលមានមូលដ្ឋាននៅសហរដ្ឋអាមេរិកនេះ ក៏បានលើកឡើងដែរថាប្រទេសអូស្ត្រាលី និងកាណាដា អាចនឹងធ្វើតាមសហភាពអឺរ៉ុបដោយពិនិត្យមើលឡើងវិញនៃកិច្ចព្រមព្រៀងពាណិជ្ជកម្មនានាជាមួយកម្ពុជា។
ទោះយ៉ាងណាក៏ដោយក្រុមហ៊ុននេះ បង្ហាញនូវសុទិដ្ឋិនិយមដែរថាការដកEBAនេះអាចនឹងធ្វើឲ្យកម្ពុជាងាកមកខំប្រឹងប្រែងខ្លាំងជាងមុនក្នុងការផលិតផលិតផលឧស្សាហកម្មផ្សេងទៀតដូចជា កង់ កាតាប និងគ្រឿងអេឡិចត្រូនិកវិញ។
កាលពីថ្ងៃទី៥ ខែតុលាកន្លងទៅ គណៈកម្មការអឺរ៉ុបបានជូនដំណឹងដល់កម្ពុជាអំពីការចាប់ផ្ដើមដំណើរការដកប្រព័ន្ធអនុគ្រោះពន្ធ EBA ដោយចោទថា រដ្ឋាភិបាលកម្ពុជាបានប្រព្រឹត្តអំពើរំលោភសិទ្ធិមនុស្ស និងសិទ្ធិការងារធ្ងន់ធ្ងរ។ សហភាពអឺរ៉ុបលើកឡើងថា កម្ពុជាមិនបានធ្វើឲ្យប្រសើរឡើងនូវបញ្ហាសិទ្ធិមនុស្សរបស់ខ្លួនឡើយ បើទោះបីជាគណៈកម្មការស្វែងរកការពិតរបស់អឺរ៉ុបបានស្រាវជ្រាវ និងផ្ដល់អនុសាសន៍ឲ្យមានការកែប្រែក៏ដោយ៕