មតិផ្ទុយគ្នា របស់អ្នកនយោបាយខ្មែរ ជុំវិញការអនុវត្តកិច្ចព្រមព្រៀងសន្តិភាពទីក្រុងប៉ារីស នៅតែកើតមានឡើង ដោយមិនទាន់រកចំណុចរួមឃើញនៅឡើយ។
អ្នកនាំពាក្យគណបក្សប្រជាជនកម្ពុជា លោក ឈឹម ផលវរុណ មានប្រសាសន៍នៅថ្ងៃនេះថា កម្ពុជា ពុំមានភាពចាំបាច់ក្នុងការអនុវត្តកិច្ចព្រមព្រៀងសន្តិភាពទីក្រុងប៉ារីសទៀតនោះទេ ដោយលោកថាកិច្ចព្រមព្រៀងនេះ បានអនុវត្តនៅពេលប្រទេសកម្ពុជាមិនទាន់មានរដ្ឋធម្មនុញ្ញដែលជាច្បាប់កំពូល។ លោកបន្តថា គោលការណ៍នៃកិច្ចព្រមព្រៀងសន្តិភាពក្រុងប៉ារីស ក៏បានបញ្ចូលទៅក្នុងរដ្ឋធម្មនុញ្ញដែលជាច្បាប់កំពូលទៀតផង ហើយកិច្ចព្រមព្រៀងមួយនេះបានក្លាយជាលិខិតូបករណ៍ជាប្រវត្តិសាស្ត្រដែលរដ្ឋាភិបាលបានចាក់សោទុកក្នុងទូររួចទៅហើយដែរ។
លោក មានប្រសាសន៍បន្ថែមថា៖ «អីចឹងកម្ពុជាអត់មានអី្វត្រូវអនុវត្តន៍កិច្ចព្រមព្រៀងទេ គឺអនុវត្តន៍ច្បាប់កំពូលរបស់ជាតិគឺ រដ្ឋធម្មនុញ្ញ។ ឯអ្វីៗទាំងអស់ ដែលមានចែងក្នុងកិច្ចព្រមព្រៀងសន្តិភាពទីក្រុងប៉ារីស គឺមានក្នុងរដ្ឋធម្មនុញ្ញហើយ។ អីចឹងកម្ពុជានិយាយពីការអនុវត្តរដ្ឋធម្មនុញ្ញបាទ»។
អតីតអ្នកតំណាងរាស្ត្រគណបក្សសង្រ្គោះជាតិ លោក អ៊ូ ច័ន្ទរ័ត្ន វិញយល់ថា កិច្ចព្រមព្រៀងសន្តិភាពក្រុងប៉ារីសនៅតែមានជីវិត និងមានសុពលភាព បើទោះបីជាចំណុចមួយចំនួនបានបញ្ចូលក្នុងរដ្ឋធម្មនុញ្ញក៏ដោយ។ លោកបន្តថា បច្ចុប្បន្នការអនុវត្តកិច្ចព្រមព្រៀងមួយនេះ នៅតែមានភាពខ្វះខាតច្រើន ដោយលោកថាមិនបានគោរពតាមអ្វីដែលចែងក្នុងកិច្ចព្រមព្រៀងនេះឡើយ ពិសេសការគោរពសិទ្ធិមនុស្ស ប្រជាធិបតេយ្យ និង ឯកភាពជាតិពិតប្រាដក។
លោក អ៊ូ ច័ន្ទរ័ត្ន មានប្រសាសន៍បន្ត៖ «ព្រោះកិច្ចព្រមព្រៀងទីក្រុងប៉ារីសជាសំខាន់ គឺដើម្បីបង្រួបបង្រួមកម្ពុជា បង្រួបបង្រួមអ្នកនយោបាយ ផ្សះផ្សាជាតិ ដើម្បីរកឯកភាពជាតិ។ តែមកដល់ថ្ងៃនេះ យើងមិនមានទេ យើងបែកបាក់ឯកភាពជាតិ»។
អ្នកនាំពាក្យគណបក្សប្រជាធិបតេយ្យមូលដ្ឋាន លោក ឡឹក សុធា បង្ហាញការគាំទ្រចំពោះកិច្ចព្រមព្រៀងសន្តិភាពទីក្រុងប៉ារីស ព្រោះវាជាច្រកមួយបើកផ្លូវសន្តិភាពដល់ប្រទេសកម្ពុជា នាំទៅរករបបប្រជាធិបតេយ្យសេរីពហុបក្ស។ លោកយល់ថាកិច្ចព្រមព្រៀងនេះ នៅតែមានសុពលភាពនិងឥទ្ធិពល ហើយក៏ជាមូលដ្ឋានគ្រឹះសម្រាប់ការដឹកនាំប្រទេសទៀតផង។
លោកចង់ឱ្យមានការអនុវត្តកិច្ចព្រមព្រៀងនេះ ឱ្យបានពេញលេញ ដូចជាចំណុចសេរីភាពនៃការបញ្ចេញមតិ ការលើកកម្ពស់សេរីផ្នែកនយោបាយ ការគោរពសិទ្ធិមនុស្ស ជាដើម។
លោក មានប្រសាសន៍ថា៖ «បើនិយាយពីការអនុវត្តកិច្ចព្រមព្រៀងទីក្រុងប៉ារីសហ្នឹង គឺម្នាក់ៗឈរលើជំហរផ្សេងគ្នា រដ្ឋាភិបាលឈលើជំហរមួយ គណបក្សនៅក្រៅសភាឈលើជំហរមួយ ។ ប៉ុន្តែយ៉ាងណាក៏ដោយ យើងឃើញថាភាគីពាក់ព័ន្ធទាំងអស់ ព្យាយាមគោរព និងអនុវត្ត» ។
ប្រធានក្រុមអ្នកវិភាគវ័យក្មេង កញ្ញា លី ស្រីស្រស់ មើលឃើញថា ត្បិតខ្លឹមសារមួយចំនួននៃកិច្ចព្រមព្រៀងសន្តិភាពក្រុងប៉ារីស បានបញ្ចូលក្នុងរដ្ឋធម្មនុញ្ញ ហើយកម្ពុជាបានដើរនៅលើកន្លងប្រជាធិបតេយ្យក៏ពិតមែន ប៉ុន្តែគុណភាពនៃការអនុវត្តប្រជាធិបតេយ្យនៅមិនទាន់ល្អប្រសើរនៅឡើយទេ។
ថ្ងៃទី២៣ តុលា ឆ្នាំ២០១៨នេះ ជាខួបលើកទី ២៧ឆ្នាំ នៃកិច្ចព្រមព្រៀងសន្តិភាពទីក្រុងប៉ារីស ២៣ តុលា ឆ្នាំ១៩៩១។ កិច្ចព្រមព្រៀងនេះ ធ្វើឡើងដើម្បីបញ្ចប់ជម្លោះនយោបាយខ្មែរទាំងបួនភាគី រួមមានភាគីខ្មែរក្រហម ភាគីហ្វុនស៊ិនប៉ិច ភាគីលោកតា សឺន សាន និងភាគីរដ្ឋកម្ពុជា។
កិច្ចព្រមព្រៀងនេះ មានប្រទេសបារាំង និង ប្រទេសឥណ្ឌូនេស៊ី ជាសហប្រធាន និងមានប្រទេសជាហត្ថលេខី ចំនួន ជាង ១០ ប្រទេសផ្សេងទៀត។ កិច្ចព្រមព្រៀងសន្តិភាពក្រុងប៉ារីស ធានាអំពី “អធិបតេយ្យភាព ឯករាជ្យភាព បូរណភាព និងភាពមិនអាចរំលោភបាននៃដែនដីអព្យាក្រឹតភាព ឯកភាពជាតិកម្ពុជា” និង “ការធានាការបោះឆ្នោតដោយសេរី ត្រឹមត្រូវ និងយុត្តិធម៌”៕