ក្នុងពិធីក្រុងពាលីរឿង «វិញ្ញាណស្នេហ៍» របស់ផលិតកម្ម B&S Good Day កាលពីថ្ងៃទី២៤ ខែតុលា ផលិតកររបស់ភាពយន្តមួយនេះ បានថ្លែងបញ្ជាក់ថា ការផលិតភាពយន្តរបស់ខ្លួន មិនសូវទទួលបានផលចំណេញកាក់កបនោះទេ ដោយសារតែការផលិតកើនឡើង តម្លៃតួកើនឡើង ហើយការចំណាយលើគុណភាពរឿងក៏ខ្ពស់ជាងមុន ប៉ុន្តែក្រឡេកមកមើលចំណូល គឺនៅមានកម្រិត។ លោកថា ផលិតករភាពយន្ត បើផលិតដើម្បីបានចំណាយគឺកុំផលិតតែម្ដង ដោយសារតែភាពជាក់ស្ដែង គឺបណ្ដាទូរទស្សន៍ ដែលហ៊ានទិញភាពយន្តពីក្រុមផលិតករខ្មែរ នៅមិនទាន់ហ៊ានថ្លៃ អោយដល់នឹងការចង់បានរបស់ផលិតករខ្មែរនៅឡើយទេ។
លោក ប៊ុន ស៊ា ម្ចាស់ផលិតកម្ម B&S Good Day និយាយថា សម្រាប់ការផលិតភាពយន្ត លោកនៅតែមើលឃើញថា មិនមានការផលិតណាមួយដែលអាចជួយអោយបណ្ដាក្រុមផលិតកររកលុយមានបានធ្វើជាផលចំណេញអោយដូចបណ្ដាក្រុមផលិតករក្រៅប្រទេសនោះទេ ដោយសារតែស្ដង់ដានៅគ្រប់ទូរទស្សន៍នៅក្នុងប្រទេសកម្ពុជា មិនមានលទ្ធភាពអោយក្រុមផលិតករតាមការទាមទា។
លោកបានទាំងសរសើរថា ប៉ុស្ដិ៍លេខ៥ ហ៊ានផ្ដល់តម្លៃក្នុងមួយភាគបានខ្ពស់ជាងបណ្ដាប៉ុស្ដិ៍ខ្លះនោះផង ដោយគ្រាន់តែតម្លៃដែលលោកទទួលបាន ហើយថា បើអោយមានបាននឹងការផលិតរឿងវិញ គឺមិនអាចនោះទេ។ លោកថា ការសម្រេចចិត្តបោះទុនផលិតរឿងនាពេលកន្លងមក លោកមិនដែលខ្វល់ពីការខាត ឬបានចំណេញតិចច្រើននោះទេ ទើបលោកនៅតែបង្ហាញការតស៊ូ ហើយបានសម្រេចបោះទុនភាពយន្តភាគថ្មីរឿង «វិញ្ញាណស្នេហ៍» ដែលមានជាង៣០ភាគ ទោះជាដឹងទុកមុនថាភាពយន្តនេះ នឹងចំណាយអស់ច្រើន ដែលមិនអាចអោយលោកបានសល់ផលចំណេញខ្ពស់ពីការទទួលបានកម្រៃពីប៉ុស្ដិ៍លេខ៥។
លោក អះអាងថា ការផលិតរឿងរាល់ថ្ងៃ បើស្រម៉ៃថា ចង់បានចំណេញប៉ុណ្ណេះ ឬ ចំណេញប៉ុណ្ណោះ គឺដឹងតែរឿងនឹងមើលមិនកើតតែម្ដង អ៊ីចឹងហើយទើបផលិតករមួយចំនួន បានងាកពីការបោះទុនផលិតរឿងទៅធ្វើជំនួញអ្វីផ្សេង ដើម្បីអោយចំណេញបានច្រើន។ មកទល់ពេលនេះ លោកសារភាពបានយកជំនួញខាងក្រៅមកទប់នាងការចំណាយក្នុងការផលិតភាពយន្តជាប្រចាំ ដោយលោកបញ្ជាក់យ៉ាងខ្លីថា ជ្រុលបើកផលិតកម្ម និងមានសកម្មភាពផលិតភាពយន្តទៅហើយ គឺត្រូវតែបន្ត ដោយមិនអាចទុកអោយផលិតកម្មស្ងប់ស្ងាត់បានទេ។
លោក ប្រកាសជំហរតែមួយគត់ គឺផលិតភាពយន្តអោយមានគុណភាព ហើយមានសាច់រឿងល្អ អាចប្រកួតប្រជែងបាន នៅក្នុងកាលៈទេសៈ ដែលមនុស្សកាន់តែច្រើនចេះមើលកុនជាងមុន និងក្នុងពេលដែលភាពយន្តខាងក្រៅកាន់តែសម្រុកចូល។ តាមរបាយការណ៍ត្រួសៗ លោកថា ភាពយន្តរឿង «វិញ្ញាណស្នេហ៍» នឹងចំណាយអស់ជាង១០ម៉ឺនដុល្លារ ដែលដើមទុននេះ ប្រសិនបើយកទៅវិនិយោគ លើមុខជំនួញផ្សេង គឺបានចំណេញ និងមិនហត់ជាងកុនឆ្ងាយណាស់។ យ៉ាងណាមិញ លោកនៅតែតស៊ូផលិតដោយកម្រោងនឹងផលិតអោយបានយ៉ាងតិច២រឿងក្នុងមួយឆ្នាំ ដើម្បីអោយស្នាដៃរបស់ផលិតកម្មលោកនៅតែមានវត្តមាន នៅលើកញ្ចក់ទូរទស្សន៍នោះផង។
លោក ប៊ុន ស៊ា បន្តថា ភាពយន្តរឿង «វិញ្ញសាស្នេហ៍» រហូតដល់ដើមឆ្នាំ២០១៩ ទើបដំណើរការដាក់បញ្ចាំង ដោយការចំណាយថតទាំងស្រុងនឹងប្រើពេលយ៉ាងតិច៤ខែ។ លោកទទូចអោយគាំទ្រស្នាដៃខ្មែរ ដើម្បីអោយក្រុមផលិតករខ្មែរ នៅតែមានកម្លាំងចិត្តបន្តអាជីពផលិតរឿង ក៏ដូចជាដើម្បីលើកស្ទួយវិស័យភាពយន្តខ្មែរ ដែលលោកបង្ហើបថាបើមិនគាំទ្រទេ គឺមិនខុសពីធ្វើអោយភាពយន្តទាំងមូលបណ្ដាក់គ្នាដួលរំលំនោះឡើយ៕