សាលាដំបូងខេត្តឧត្តរមានជ័យបានចោទប្រកាន់អភិបាលស្រុកអន្លង់វែងពីបទប៉ះពាល់ដល់កម្មសិទ្ធិឯកជនដែលប្រព្រឹត្តនៅក្នុងដែនដីដែលអភិបាលស្រុករូបនេះគ្រប់គ្រង។
ក្នុងលិខិតជូនដំណឹងចុះថ្ងៃ១៧ ខែតុលា ដែល VOD ទើបទទួលបានតំណាងអយ្យការសាលាដំបូងខេត្តឧត្តរមានជ័យលោក គង់ រតនា តាមរយៈរដ្ឋមន្ត្រីក្រសួងយុត្តិធម៌បានជូនដំណឹងទៅកាន់រដ្ឋមន្ត្រីក្រសួងមហាផ្ទៃលោក ស ខេង ពីការសម្រេចរបស់អយ្យការខេត្តក្នុងការចោទប្រកាន់អភិបាលស្រុកអន្លង់វែង លោក ហោ ជិនវិរៈយុទ្ធ ពីបទ ប៉ះពាល់ដល់កម្មសិទ្ធិឯកជន តាមមាត្រា ២៤៨ និងមាត្រា២៥៣ នៃច្បាប់ភូមិបាល ដែលជននេះបានប្រព្រឹត្តិនៅអូរជញ្ជៀន ឃុំអន្លង់វែង ស្រុកអន្លង់វែង ខេត្តឧត្តរមានជ័យ កាលពីថ្ងៃទី១ ខែមិថុនា ឆ្នាំ២០១៨ ។
តាមមាត្រា២៥៣ នៃច្បាប់ភូមិបាល លោក ហោ ជិនវិរៈយុទ្ធអាចប្រឈមនឹងការបង់ប្រាក់ពិន័យពី ១លាន៥សែនរៀល ដល់ ២៥លានរៀល ឬ/និងអាចដាក់ពន្ធនាគារពី៦ខែ ទៅ២ឆ្នាំ ហើយត្រូវទទួលខុសត្រូវចំពោះសំណងរដ្ឋប្បវេណីដល់ជនរងគ្រោះផងដែរ។
កាលពីថ្ងៃទី៦ កញ្ញា ឆ្នាំ២០១៨ អតីតប្រធានផ្សារអន្លង់វែងថ្មីលោក សេង ស៊ន់ បានប្ដឹងអភិបាលស្រុកអន្លង់វែងលោក ហោ ជិនវិរៈយុទ្ធ និងប្រធានមន្ទីររៀបចំដែនដីខេត្តលោក គឹម គាវិន និងមន្ត្រីមួយចំនួនទៀតទៅកាន់សាលាដំបូងខេត្តឧត្តរមានជ័យ ដោយចោទប្រកាន់អ្នកទាំងអស់នោះថាបានឃុបឃិតគ្នាវាស់វែងដីផ្សារដែលជាកម្មសិទ្ធិរបស់លោកដែលស្ថិតក្នុងភូមិអូរជញ្ជៀន ឃុំអន្លង់វែង ស្រុកអន្លង់វែង ទៅធ្វើជាកម្មសិទ្ធិរបស់ពួកគេដោយទាមទារសំណងជំងឺចិត្តចំនួន៥០ម៉ឺនដុល្លារ៕