សាធារណរដ្ឋតួកគីសន្យាថានាពេលខាងមុខជើងហោះហើរធំមួយរបស់ខ្លួននឹងភ្ជាប់មកកាន់កម្ពុជា ដើម្បីបញ្ជាក់ពីបំណងក្នុងការរឹតចំណងទូតរបស់ខ្លួន។
ក្នុងសេចក្ដីប្រកាសព័ត៌មានចុះថ្ងៃទី ២៣ តុលា ក្រសួងការបរទេសកម្ពុជាបានឲ្យដឹងថាក្នុងដំណើរទស្សនកិច្ចទៅកាន់សាធារណរដ្ឋតួកគីលោកនាយករដ្ឋមន្ត្រី ហ៊ុន សែន បានស្នើទៅកាន់ប្រទេសនេះឲ្យបើកការហោះហើរត្រង់មកកាន់កម្ពុជាដើម្បីរឹតចំណងទំនាក់ទំនងរវាងប្រទេសទាំងពីរឲ្យកាន់តែខ្លាំងថែមទៀត ជាការឆ្លើយតបប្រធានាធិបតីនៃសាធារណរដ្ឋតួកគីលោក រ៉េជីប ថាយ៉ីបអ៊ែឌូហ្គាន់ បានបញ្ជាទៅកាន់អាជ្ញាធរពាក់ព័ន្ធឲ្យធ្វើការសិក្សាលំអិតពីករណីនេះ ខណៈនាពេលខាងមុខជើងហោះហើររបស់តួកគី Turkish Airline អាចនឹងហោះហើរត្រង់មកកាន់កម្ពុជាផងដែរ។
ក្រៅពីជំរុញបង្កើតជើងហោះហើរត្រង់ពីតួកគីមកកាន់កម្ពុជា ប្រទេសទាំងពីរក៏បានចុះហត្ថលេខាលើកិច្ចសហប្រតិបត្តិការណ៍ចំនួន៨ ដែលក្នុងនោះក៏មានកិច្ចព្រមព្រៀងស្តីពីកិច្ចសហប្រតិបត្តិការណ៍លើវិស័យទេសចរណ៍ផងដែរ។
តាមរបាយការណ៍របស់ក្រសួងទេសចរណ៍ ក្នុងឆ្នាំ២០១៧ ភ្ញៀវទេសចរណ៍ជនជាតិតួកគីជាង៨ពាន់នាក់បានធ្វើដំណើរមកកាន់កម្ពុជា ខណៈរយៈពេល៨ខែនៃឆ្នាំ២០១៨នេះមានជនជាតិតួកគីជាង៥ពាន់នាក់ហើយដែលបានធ្វើដំណើរមកកាន់កម្ពុជា៕
