រដ្ឋាភិបាលជប៉ុន តាមរយៈទីភ្នាក់ងារជប៉ុនសម្រាប់កិច្ចសហប្រតិបត្តិការអន្តរជាតិហៅកាត់ថា JICA បានផ្ដល់ជំនួយឥតសំណងជាង៣០លានដុល្លារដល់រដ្ឋាភិបាលកម្ពុជា ដើម្បីស្ដារប្រព័ន្ធលូរនៅតាមខណ្ឌមួយចំនួននៅរាជធានីភ្នំពេញ។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី បានឲ្យ VOD ដឹងថា នេះជាគម្រោងទី៤របស់រាជរដ្ឋាភិបាលកម្ពុជាជាមួយរដ្ឋាភិបាលជប៉ុន ដែលនឹងចាប់ផ្ដើមអនុវត្តនៅចុងខែវិច្ឆិកាខាងមុខ ដែលរួមមានការដាក់បណ្ដាញលូមេនៅក្នុងខណ្ឌទួលគោក និងខណ្ឌដូនពេញ សាងសង់អាងស្តុកទឹកក្រោមដី និងស្ថានីយបូមទឹកនៅសួនច្បារមុខក្រុមប្រឹក្សាអភិវឌ្ឍន៍កម្ពុជា ដំឡើងរបាមេកានិចស្វ័យប្រវត្តិប្រមូលសំរាមនៅមុខផ្លូវបង្ហូរទឹកនៅស្ថានីយបូមទឹកចតុមុខ ព្រះគន្លង់១ ព្រះគន្លង់២ និងផ្សារចាស់ និងផ្ដល់រថយន្តបូមទឹកចល័តចំនួន ២គ្រឿងផងដែរ។
ទោះជាយ៉ាងណា លោកមិនទាន់អាចបញ្ជាក់លម្អិតបាននៅឡើយទេ ដោយថា ក្រុមការងាររដ្ឋបាលរាជធានីដែលទៅដេញថ្លៃគម្រោងនេះនៅមិនទាន់ត្រឡប់ពីប្រទេសជប៉ុនវិញនៅឡើយទេ។
លោកថា៖ «ក្រុមការងាររបស់រដ្ឋបាលរាជធានីភ្នំពេញ កំពុងតែនៅប្រទេសជប៉ុនដេញថ្លៃ ដែលនេះគឺគ្រាន់តែជាព័ត៌មានបឋម។ អញ្ចឹងទាល់តែមួយថ្ងៃពីរថ្ងៃទៀតអីទើបគាត់ត្រឡប់មកវិញ ហើយយើងនឹងមានលទ្ធផលបន្ថែមទៀត ទើបអាចជម្រាបជូនទៅបាន។ នេះគ្រាន់តែព័ត៌មានបឋមដូចដែលបានផ្សព្វផ្សាយប៉ុនហ្នឹងសិន»។
មន្រ្តីកម្មវិធីរបស់អង្គការ JICA លោក សួន វាសនា បានប្រាប់VOD តាមសារអេឡិចត្រូនិកថា គម្រោងនេះត្រូវការរយៈពេល៣ឆ្នាំដើម្បីបញ្ចប់ ហើយនឹងមានគម្រោងផ្សេងទៀត ដើម្បីកាត់បន្ថយជំនន់ទឹកភ្លៀង ក៏ដូចជាគម្រោងសម្អាតទឹកកខ្វក់ក្នុងក្រុងផងដែរ។
លោកសរសេរថា៖ «តាមរយៈគម្រោងកែលម្អប្រព័ន្ធលូក្នុងរាជធានីភ្នំពេញចំនួន ៣លើករួចមក ស្ថានភាពទឹកជំនន់នៅក្នុងតំបន់គម្រោងត្រូវបានកែលម្អច្រើន តាមរយៈការថយចុះកម្រិត និងរយៈពេលនៃជំនន់ទឹកភ្លៀង។ ក្រៅពីផលប៉ះពាល់ដោយផ្ទាល់ទាំងនេះ គម្រោងទាំងនេះក៏រួមចំណែកសំខាន់ដល់សេដ្ឋកិច្ច ដោយអាចបញ្ចៀសការខូចខាតផ្នែកសេដ្ឋកិច្ចដែលបណ្ដាលមកពីការជន់លិច ការធ្វើឲ្យប្រសើរឡើងនូវស្ថានភាពអនាម័យ ដោយទប់ស្កាត់ជំងឺរាតត្បាតដែលបណ្ដាលមកពីរយៈពេលយូរនៃការជន់លិច និងការកកស្ទះចរាចរណ៍ដោយសារទឹកជំនន់»។
នាយកប្រតិបត្តិសម្ព័ន្ធគណនេយ្យភាពសង្គមលោក សន ជ័យ យល់ថា គម្រោងនេះល្អសម្រាប់រាជធានីភ្នំពេញដែលបច្ចុប្បន្នជំនន់ទឹកភ្លៀងកំពុងតែចោទជាបញ្ហានោះ តែលោកឲ្យជាយោបល់ថា រដ្ឋាភិបាលគួរតែអនុវត្តន៍គម្រោងនេះឲ្យបានត្រឹមត្រូវ ជៀសវាងប្រើប្រាស់លុយអស់ហើយបែរជាគ្មានប្រសិទ្ធភាព។
លោកថា៖ « ប្រសិទ្ធភាពយើងវាស់វែងជាមួយសូចនាករមួយដែលទាក់ទងនឹងការរំដោះទឹកចេញពីក្រុង។ អញ្ចឹង ប្រសិនជាការវិវត្តនេះ វាមានលទ្ធផលមួយ គឺមានផ្លូវរំដោះទឹកចេញពីទីក្រុង ពេលភ្លៀងជន់ហ្នឹង។ ខ្ញុំគិតថា នេះជាសូចនាករមួយដែលអាចបង្ហាញពីវឌ្ឍនភាព ក៏ប៉ុន្តែប្រសិនជាគម្រោងនេះអនុវត្តហើយ ចាយលុយអស់ហើយ ការជន់លិចភ្នំពេញនៅតែបន្ត អញ្ចឹង វាជារូបភាពមួយដែលយើងសង្ស័យអំពីការបរាជ័យដែល តែយើងចាំមើលទាំងអស់គ្នា»។
កាលពីខែ វិច្ឆិកា ឆ្នាំ២០១៥ ជប៉ុន-កម្ពុជា បានប្រកាសដាក់សម្ពោធគម្រោងការពារទឹកជំនន់ និងកែលម្អប្រព័ន្ធប្រឡាយ-លូ ជំហានទី៣ ដែលគម្រោងនេះមានការសាងសង់បណ្ដាញលូមេជាង ២០ម៉ែត្រ ផ្តល់រថយន្តបាញ់ទឹកសម្អាតលូ៤គ្រឿង និងជំនួយបច្ចេកទេសដល់អង្គភាពលូទឹកផងដែរ។
បើតាមJICA រហូតមកដល់ពេលនេះ ជប៉ុនបានផ្តល់លុយដល់កម្ពុជាប្រមាណជាង ១១០លានដុល្លារហើយដើម្បីអនុវត្តគម្រោងទាំង ៤នេះ៕