មកទល់ពេលនេះ ដំណើរចុះមកដល់ប្រទេសកម្ពុជារបស់ កុមារា ឃុន អែនឌី កាន់តែត្រូវបានគេចាប់អារម្មណ៍ ដោយសារតែប្អូនត្រូវបានគេស្គាល់ថាជាកូនខ្មែរ ដែលបានចូលប្រលងក្នុងកម្មវិធី The Voice Kids Canada ហើយបានល្បីពីការប្រលងមួយនោះ ជាពិសេសក្នុងពេលដែលប្អូនបានបង្ហាញបទជាភាសាខ្មែរលើឆាក The Voice Kids Canada ហើយទម្រាំធ្លាក់គឺបានបន្តដំណើរដល់វគ្គចុងក្រោយ។ ប្អូនបានបង្ហាញខ្លួនឡើងឆាកហង្សមាស និងបានប្រកាសថានឹងផលិតបទចម្រៀងមួយចំនួនជាភាសាខ្មែរអោយបានយ៉ាងហោចមួយចំនួន មុនចាកចេញពីកម្ពុជា។
កុមារា ឃុន អែនឌី បានថ្លែងបញ្ជាក់ថា ប្អូនបានមកដល់ប្រទេសកម្ពុជាកាលពីថ្ងៃទី២៥ តុលា ដោយតាមគម្រោងលោក និងម្ដាយនឹងស្នាក់នៅកម្ពុជាចំនួន១ខែ ដើម្បីមានពេលផលិតចម្រៀងដែលម្ដាយរបស់ប្អូន បានទាក់ទងផលិតកររួចជាស្រេចមុនពេលចុះមក។
ប្អូនថាខ្លួនមានឪពុកម្ដាយជាជនជាតិខ្មែរទាំងអស់ ប៉ុន្តែដោយសារតែបានចាប់កំណើត និងធំធាត់នៅលើទឹកដីកាណាដា ទើបមិនសូវយល់ដឹងពីវប្បធម៌ខ្មែរ ប៉ុន្តែឪពុកម្ដាយនៅតែបង្រៀនអោយប្អូនអាចនិយាយខ្មែរបានមួយចំនួន ទោះជាមិនភ្លាត់។
ក្នុងនោះប្អូនប្រុសក៏ចេះច្រៀងបទចម្រៀងរបស់លោក ស៊ិន ស៊ីសាមុត មួយចំនួនផងដែរ ទើបក្នុងពេលប្អូនមានឱកាសចូលប្រលងក្នុងកម្មវិធី The Voice Kids Canada កាលពីឆ្នាំ២០១៦ ប្អូនបានលើកយកបទរបស់អធិរាជលោក ស៊ិន ស៊ីសាមុត បកស្រាយអោយគ្រូបង្វឹក និងអ្នកគាំទ្របានស្គាល់បទខ្មែរនៅក្នុងពេលនោះ។ ប្អូនបានបង្ហាញពីមោទនភាព ដែលប្អូនគឺជាជនជាតិខ្មែរតែម្នាក់ដែលបានបង្ហាញខ្លួនក្នុងការប្រលង The Voice Kids Canada កាលពីឆ្នាំ២០១៦ ហើយបានឆ្លងចូលវគ្គផ្ដាច់ព្រ័ត្រ ដែលធ្វើអោយអន្តរជាតិបានស្កាល់សមត្ថភាពរបស់កូនខ្មែរ និងបទចម្រៀងរបស់ខ្មែរ។
មកទល់ពេលនេះ ប្អូនទទួលបានការគាំទ្រយ៉ាងខ្លាំង ដោយត្រូវបានអ្នករៀបចំកម្មវិធីប្រគំតន្ត្រីតូចធំច្រើនឡើងនៅក្នុងប្រទេសកាណាដា ជាពិសេសកម្មវិធីដែលរៀបចំដោយជនជាតិខ្មែរ អញ្ជើញអោយប្អូនបានធ្វើជាតារាចម្រៀង ដើម្បីអោយប្អូនឡើងច្រៀងទាំងបទអង់គ្លេស និងបទខ្មែរដែលប្អូនចេះចាំ។ អ៊ីចឹងហើយ ទើបម្ដាយរបស់ប្អូន គឺអតីតតាចម្រៀង ឃុន វណ្ណា សម្រេចចិត្តដឹកដៃប្អូនចុះមកកម្ពុជា នៅក្នុងពេលនេះ ដើម្បីមកផលិតបទចម្រៀងមួយចំនួនទុកគ្រាន់បង្ហោះនៅលើយូធូប និងគ្រាន់ឡើងឆាកនៅលើទឹកដីអាមេរិក។
នៅមិនទាន់ដឹងថាតើនឹងមានប៉ុន្មានត្រូវបានផលិតរួចរាល់ មុនពេលប្អូនចាកចេញពីកម្ពុជានោះទេ ដោយតាមគម្រោងគឺមានច្រើនបទ ប៉ុន្តែលុះត្រាតែបទណាដែលប្អូនថតហើយ យល់ថាទទួលបានការគាំទ្រខ្ពស់ ទើបសម្រេចដាក់បង្ហោះ។ យ៉ាងណាមិញ ប្អូនជឿជាក់ខ្លាំងថានឹងទទួលបានឱកាសល្បីឈ្មោះ ដោយសារតែក្រោយក្លាយជាអតីតបេក្ខភាពក្នុងកម្មវិធី The Voice Kids Canada និងត្រូវគេដឹងថាប្អូនគឺជាជនជាតិខ្មែរ គឺសន្ទុះចាប់អារម្មណ៍មានច្រើនទាំងនៅកាណាដា អាមេរិក និងនៅកម្ពុជា។ ប្អូនប្រុស ឃុន អែនឌី បន្តថា ប្អូននឹងដើរតាមគន្លងម្ដាយដោយនឹងផលិតបទចម្រៀងជាភាសាខ្មែរ និងបទនិពន្ធថ្មីជាភាសាបរទេសអោយបានច្រើន ដោយសារតែក៏ចេះ៥ភាសាអាចប្រើការបាន គឺភាសាអង់គ្លេស ភាសាបារាំង អេស្ប៉ាញ និងភាសាខ្មែរ ដែលជាភាសាកំណើតរបស់ឪពុកម្ដាយ។
អ្នកស្រី ឃុន វណ្ណា អតីតារាចម្រៀងនៅកម្ពុជាកាលពីអំឡុងឆ្នាំ១៩៨០ បានថ្លែងបញ្ជាក់ថា អ្នកស្រីចង់ជំរុញអោយកូនរបស់ខ្លួនបន្តអាជីពចម្រៀង ទើបលើកទឹកចិត្តអោយកូនចូលប្រលងក្នុងកម្មវិធី The Voice Kids Canada តែមិននឹកស្មានថាកូនប្រុសរបស់ខ្លួន បានឈានដល់វគ្គផ្ដាច់ព្រ័ត្រនោះទេ។ គាប់ជួនជាក្រោយការប្រលង កូនរបស់អ្នកស្រីក៏មានទីផ្សារក្នុងចេញច្រៀងជាហូរហែរផង គឺកាន់តែជំរុញអោយអ្នកស្រីត្រូវតែទាក់ទងផលិតករនៅកម្ពុជាផលិតបទចម្រៀងអោយកូនបានច្រៀងទៅទៀត ដោយអ្នកស្រីនឹងចំណាយធនធានផលិតបទជាភាសាខ្មែរអោយកូនប្រុសបានច្រៀង ដើម្បីអោយមានការចាប់អារម្មណ៍ពីសំណាក់បងប្អូនខ្មែរទាំំងនៅកាណាដា អាមេរិក និងកម្ពុជា៕